Ibyatangajwe n’umutoza Masudi Djuma nyuma yo gutwara igikombe cya shampiyona

Yanditswe na Admin ku wa 19.05.2017 saa 07:40 | Yasuwe : 70

Umutoza w’ikipe ya Rayon Sports Masudi Djuma yatangaje ko yabaye umunyamahirwe abona akazi ko gutoza mu ikipe ya Rayon Sports, yabereye kapiteni, akayitwariramo shampiyona y’u Rwanda nk’umukinnyi none ubu akaba yongeye gutwara iki gikombe ari umutoza wayo.

Ibi, Masudi Djuma yabitangaje nyuma y’umukino w’ikirarane cy’umunsi wa 24 wa shampiyona batsinzemo Mukura Victory Sports ibitego 2-1, bikabahesha kwegukana shampiyona y’uyu mwaka w’imikino 2016/17 nubwo hasigaye imikino igera kuri ine.

“Ntabwo byari byoroshye, twahanganye n’amakipe akomeye, abatoza bakomeye, abakinnyi bakomeye ariko twari dufite intego mu gutangira shampiyona Ni shampiyona ni cyo cya mbere.Muri shampiyona hari aller na retour; ukajya hanze gukinira ku bibuga bibi, urumva ko gutwara shampiyona itararangira ni akazi kenshi twakoze. Ntabwo ari njye jyenyine, ni staff, abakinnyi, abafana, abayobozi, bose twagikoreye hamwe.”

Masudi Djuma yishimira igikombe cya shampiyona

“Ni nde wakubwiye ko byari byoroshye? Reba imikino yose twakinnye imeze nka finale! “

“Mu kuza mu Rwanda naje mfite intego zo gutoza ikipe eshatu nakiniye, nkatozamo imwe; APR, Rayon na Kiyovu. Mbona amahirwe mbona Rayon Sports, umwaka wa mbere twafashe igikombe (cy’amahoro), n’uyu mwaka dufashe ikindi. Ni ibyishimo ntakundi nabivuga uretse gushimira Imana n’umuryango wanjye n’abakunzi ba Rayon Sports bose muri rusange.”

Ikintu cyafashije Masudi kwitwara neza muri Rayon Sports

Ni uko abakinnyi nabagize bagenzi banjye, baranyumvira nanjye ndabumva. Ni icyo cyonyine cyadufashije.”- Masudi Djuma yo gutwara mu mwaka we wa mbere nk’umutoza mukuru wa Rayon Sports.

Masudi Djuma ni umutoza umaze kumenyera umupira w’amaguru mu Rwanda, dore ko yahageze mu 1998, agakinira APR FC imyaka ibiri, mbere yo kwerekeza muri Kiyovu Sports.

Mu 2003 nibwo yerekeje muri Rayon Sports, maze 2004 batwara shampiyona ubwo batozwaga na Kayiranga Baptiste, nyuma ava muri iyi kipe yerekeza mu gihugu cya Seychelles, mbere yo kugaruka mu bururu n’umweru mu 2006, agakina umwaka umwe.

Masudi Djuma yaretse gukina ruhago mu 2010 mu ikipe ya Inter Stars, agana mu butoza, aho kugeza ubu afite Licence B ya CAF yabonye mu 2013.

Rayon Sports ni yo kipe yabereye umutoza mukuru guhera muri Gashyantare 2016, dore ko ahandi yatoje, harimo: Inter FC na Inter Star z’i Burundi, yari umutoza wungirije ndetse no mu ikipe y’igihugu y’u Burundi y’abato yatoje mu 2015.

Tanga igitekerezo na Facebook

Tanga igitekerezo