Ibihe by’ingenzi byaranze umwaka wa 2017 muri ruhago nyarwanda

Yanditswe na Rwanda Football ku wa 03.01.2018 saa 14:25 |

Muri ruhago nyawanda, abakunzi b’uyu mukino hari ibihe by’ingenzi byaranze umwaka ushize wa 2017 waje kubasigira ibyishimo kuri bamwe n’ibikomere n’icyasha ku mutima ku bandi batazibagirwa vuba.

Ikipe yangiwe gutwarira igikombe mu mukino wa shampiyona

Hari ku itariki 17 z’ukwezi kwa Gicurasi nyuma y’umukino wahuje ikipe ya Rayon Sport n’ikipe ya Mukura Victory Sports , nibwo iyi kipe yambara ubururu n’umweru yari yarangije gushyira akadomo ku gikombe cya Shampiyona 2017 imaze kucyegukana bidasubirwaho.

Nyuma yo kucyegukana iyi kipe yifuje ko yahabwa iki gikombe ku mukino yagombaga kwakira wari kuyihuza n’ikipe ya APR gusa ishyirahamwe ry’umupira w’amaguru mu Rwanda riza kuyibwira ko bidashoboka ko ahubwo igomba kugihabwa ku mukino usoza shampiyona wagombaga kuyihuza na Kiyovu Sports.

Ibintu byakuruye umwuka utari mwiza kugeza ubwo iyi kipe yanga nabwo kugifata ahubwo igahitamo kugihererwa ku mukino wa gishuti wayihuje n’ikipe ya AZAM FC yaturutse mu gihugu cya Tanzaniya ku itariki ya 8 Nyakanga 2017.

Ibura ry’umuriro kuri sitade ryatumye bamwe batabwa muri yombi

Abakunzi ba ruhago mu Rwanda ntibashobora kwibagirwa ibyabereye kuri sitade Umuganda iherereye mu karere ka Rubavu (Gisenyi) ku itariki ya 23 Nzeli 2017 ubwo umuriro wabuze ikipe ya Rayon Sports imaze gutsinda ibitego bibiri ku busa ikipe ya APR ku mukino wa Super Cup wagombaga guhuza ikipe yatwaye shampiyona n’iyatwaye igikombe cy’Amahoro.

Umuriro wabuze Rayon Sports ifite ibitego biriri kuri kimwe cy’APR

Ibintu byasigiye isura mbi FERWAFA kugeza ubwo hafashwe icyemezo cyo guhagarika umukino ukazasubukurwa hakinwa iminota micye yari isigaye ku gice cya kabiri cy’umukino ngo umukino urangire.

Abanyarwanda bakomeje na none kubabazwa n’Amavubi

Ikipe y’igihugu Amavubi uyu mwaka yasubiye inyuma ku buryo bugaragarira buri munyarwanda wese haba mu karere ndetse no muri Afurika muri rusange.

Amavubi nta cyizere yahaye abanyarwanda muri 2017

Mu kwezi k’Ukuboza umwaka wa 2016 kwasize ikipe y’igihugu Amavubi ahagaze ku mwanya wa 92. Ibintu byahise biba amateka kuva muri Mutarama 2017 ubwo yatangiye kugenda isubira inyuma umunsi ku munsi kugeza ubwo uyu mwaka ugeze ku musoza igihugu cy’u Rwanda kigeze ku mwanya w’113 kurutonde rwa FIFA.

Agatima kugaruka impembero ku banyarwanda kaje kugaruka ubwo Amavubi yabonaga itike yo gukina imikino ya CHAN igomba kuba muri uyu mwaka mu gihugu cya Maroc gusa nabwo bikaza gusaba andi mahirwe kuko aya mbere yo yari yananiwe kwikura imbere ya Uganda. Akaza guhabwa amahirwe yo gukina umukino na Ethiopia u Rwanda rukabasha gutsinda iki gihugu.

Urupfu gutwara abakinnyi n’abatoza imburagihe

Uyu mwaka by’umwihariko ku bakunzi b’ikipe ya Rayon Sports byabagora ko bakwibagirwa urupfu rwatwaye umunyezamu Evariste Mutuyimana apfuye urupfu rw’amarabira ndetse na Ndikumana Katauti tutibagiwe na Hategekimana Bonaventure Gangi bapfiriye umunsi umwe. Aba bose bakaba barakiniye iyi kipe mu gihe Katauti we yapfuye ari mu mirimo y’ubutoza muri iyi kipe.

Mutuyimana Evariste
Katauti na Gangi bakiniye Amavubi igihe kirekire

Ifungwa ry’abakinnyi n’abatoza bya hato na hato

Uretse kuba ikipe ya Rayon Sport yarabuze abakinnyi n’umutoza wayo bitabye Imana, uyu mwaka usize iyi kipe irimo ibibazo uruhuri ndetse bamwe bageze imbere y’ubutabera kujya gutanga ibisobanuro ku byaha baregwa.

Karekezi Olivier umutoza mukuru w’ikipe ya Rayon Sport ubwo Katauti yari atabarutse uyu mutoza nawe yari ari muri sitasiyo ya polisi yashyikirijwe parike ngo yisobanure ku byaha binyuranye bifitanye isano n’ikoranabuhanga nkuko polisi y’u Rwanda yabitangarije itangazamakuru.

Karekezi Olivier

Ntibyarekeyaho kuko abakinnyi babiri b’iyi kipe Eric Rutanga ndetse na Yannick Mukunzi nabo batawe muri yombi na polisi y’u Rwanda kubera amakuru bashakagwaho agendanye n’ikirego cya Karekezi.Gusa nyuma yaho gato Karekezi Olivier ndetse n’aba bakinnyi bakaba baraje kurekurwa ndetse bitangazwa ko ari abere ku byaha baregwaga.

Umwaka usize FERWAFA irangwamo akajagari

Ishyirahamwe ry’umupira w’amaguru mu Rwanda uyu mwaka wa 2017 ushize usize harangwamo n’ibibazo uruhuri bigenderanye n’itegurwa ry’amatora, umwaka ukaba ushize atanabaye nkuko byari byitezwe ko agomba kuba mu mpera za 2017.

Nzamwita Degaulle

Ibi byatumye bihagurutsa ishyirahamwe ry’umupira w’amaguru ku isi FIFA ryandikira FERWAFA ribasaba gukemura ibibazo biri muri iri shyirahamwe ndetse ribategeka kwigiza inyuma amatora ngo abashe gutegurwa neza.

Tanga igitekerezo na Facebook

Tanga igitekerezo

Powered by Live Score & Live Score App