Hitimana Thierry yanze kongera amasezerano muri Rayon Sports

Hitimana Thierry wari ushinzwe imibereho   “Team Manager” muri Rayon Sports  atangaza ko yanze gusinya andi masezerano  bitewe  n’uko  yari amaze igihe  kinini adahembwa.

Uyu mugabo yemeza ko yamaze gutandukana na Rayon Sports mu mpera  z’icyumweru  gishize.  Hitimana avuga ko atari kongera amasezerano mu ikipe amaramo amezi 5 atarabona umushahara. Ati “Amasezerano yanjye yari arangiye. Ntabwo twabashije  kuyavugurura kuko maze amezi 5 ntafata umushahara. Nasezeye muri Rayon Sports kubera Miliyoni 3 bandimo”. Hitimana avuga ko ubuyobozi  bwa Rayon Sports bwamwijeje  gukemura  iki kibazo muri iki cyumweru.

thierryhit

Amasezerano y’uyu mugabo yarangiye kuwa 31 Mutarama 2015 nyamara ntiyavugururwa nyuma y’imyaka 2 yari amazemo.  Ubuyobozi  bwa Rayon Sports bwo buvuga  ko hari  ibitarumvikanwe  hagati y’impande zombi  bityo bahitamo kudakomezanya.

Ku kibazo  cy’ibibirarane bamufitiye Niyomusabe Emmanuel, umuvugizi wa Rayon Sports yemera ko bayamubereyemo  ariko bitaba impamvu  yo  kutavugurwa kw’amasezerano hagati y’impande zombi. Yagize ati “Hari  imishahara atari yabona kimwe n’abandi  bose, kandi  si we wenyine ikipe  ifitiye umwenda. Ibyo ntibyakabaye impamvu yo kutongera amasezerano. Iyo  umwenda uhari  n’umukoresha akaba awemera, bareba uko bawusohokamo ariko  ntibivuga ko  uwo  mwenda ari  inkingi  yo  kuvugurura amaserano”.

Amakuru atugeraho yavugaga ko Hitimana  yari atagifite umwanya uhagije biturutse  ku kazi  kenshi asigaye afite  mu kigo  cy’ubwiteganyirize (RSSB) ishami rya Ruhango. Impande zombi zikanyomoza aya amakuru. Niyomusabe yanatangaje ko n’abakinnyi bafitiwe ibirarane by’ukwezi kwa Gashyantare 2015.

Tanga igitekerezo na Facebook

Tanga igitekerezo