Haruna Niyonzima yongereye amasezerano muri Yanga

Nyuma y’imyaka ine akinira Young Africans yo muri Tanzania, kapiteni w’Amavubi Haruna Niyonzima yongereye amasezerano y’umwaka umwe mu gihe agitekereza kujya gukina mu kindi gihugu cyane Sudani na Afurika y’Epfo.

Amakuru ava muri Tanzania avuga ko Niyonzima wavuye mu Rwanda mu 2011 akinira APR FC yemeye kongera amasezerano nyuma y’ibiganiro by’igihe kirekire ku kongererwa umushahara ku kwezi (3000$) ho ¼. Niyonzima azajya ahembwa ku kwezi 2.700.000 FRW.
Niyonzima watwaye igikombe cya shampiyona avuga ko yahisemo kongera amasezerano y’umwaka umwe kuko hari izindi gahunda afite imbere zo kujya gukina mu bindi bihugu.

harunaniyonzima

Niyonzima yongereye umwaka akinira Yanga ahembwa miliyoni 2 n’ibihumbi 700 FRW ku kwezi.Ni umwaka wa gatanu Niyonzima Haruna agiye gukinira Yanga nyuma yo kuva muri APR FC.
Yagize ati “ Buriya mu buzima habamo gupanga ariko ndacyafite gahunda nyinshi ariyo mpamvu nasinye umwaka umwe gusa. Nibyo mfite gahunda nyinshi ariko ndasaba Uwiteka kongera kumpa shampiyona nziza, kugera kure bishoboka no gufasha ikipe yanjye.”Umwaka w’umupira w’amaguru muri Tanzania urangiye Niyonzima Haruna atsinzemo ibitego bine, akemeza ko wabyea umwaka mwiza ugereranyije n’ushize aho yagize n’ibibazo by’imvune, kurwara no hanze y’ikibuga apfusha umwana n’inzu yabagamo Dar Es Salaam irashya.

Niyonzima ati “ Urebye izi shampiyona ziratandukanye, iy’uyu mwaka ntiyariyoroshe na gato ariko narabikunze kuko byatumye dukanguka hakiri kare kandi dutwara igikombe kare kuko twarakoze cyaneeee.”

Niyonzima Haruna yatsinze ibitego bine muri uyu mwaka batwara igikombe cya shampiyona hakiri kare.Niyonzima yashimiwe n’abafana ba Yanga uko yitwaye muri uyu mwaka w’imikino

Hari amakuru yavugaga ko hifujwe ko Niyonzima Haruna agaruka gukinira mu Rwanda mu 2015 bityo azakine igikombe cy’Afurika cy’abakina imbere mu gihugu kizabera mu Rwanda mu 2016.

Kuri iyi ngingo, Niyonzima ntiyahakanye ko bitashobokaga ariko avuga ko ntawigeze abimusaba bituma ahitamo kongera amasezerano muri Yanga.
Yagize ati “ Sinigeze mbona unsaba ko nzagukina mu Rwanda byatumye nanjye mfata izindi gahunda kuko umupira w’amaguru nibwo buzima bwanjye.”
Abandi bongereye amasezerano muri Yanga, ni Mbuyu Twite wahoze ari myugariro wa APR FC n’Amavubi wasinye umwaka umwe naho umunyezamu Deogratius Munishi “Dida” asinya ibiri.

Tanga igitekerezo na Facebook

Tanga igitekerezo