Habyarimana Innocent ‘Di Maria’ yageze muri Kiyovu Sports

Yanditswe na Rwanda Football ku wa 17.08.2017 saa 17:24

Nyuma yo kurokoka kuzakina icyiciro cya kabiri ihawe umwanya n’Isonga FC yasezeye, Kiyovu Sports ikomeje kwiyubaka igura abakinnyi bafite amazina akomeye mu Rwanda bazayifasha mu mwaka w’imikino utaha bayobowe n’umutoza Cassa Mbungo André.

Iyi kipe y’Urucaca nk’uko abakunzi bayo bakunda kuyita, yamaze gusinyisha Habyarimana Innocent uzwi nka ‘Di Maria’ wakiniraga APR FC umwaka ushize w’imikino ariko ntayigiriremo ibihe byiza.Uyu musore ukina asatira izamu aciye ku ruhande, wari amaze iminsi akora igeragezwa muri Rayon Sports yamaze gusinyira Kiyovu Sports amasezerano y’imyaka ibiri nk’uko Umuvugizi wayo, Omar Munyengabe, yabitangaje.

Yagize ati : “Nk’ikipe ishaka kwiyubaka kandi ntizongere kwitwara uko byagenze umwaka ushize, hari abakinnyi turi kugura batandukanye bazaza kudufasha. Ku mugoroba [wo ku gatatu] twasinyishije abakinnyi babiri barimo Habyarimana Innocent wakiniraga APR FC ndetse na Hakubaho Vincent wavuye muri Pépinière FC, aba bose bahawe imyaka ibiri ndetse hari n’abandi turimo kuganira ku buryo bigenze neza uyu munsi twababatangariza bamaze gusinya.”

Habyarimana Innocent wambaye numero 8 ntiyatsinze igerageza muri Rayon Sports

Munyengabe yashimangiye ko Kiyovu Sports yize amasomo akomeye cyane umwaka ushize w’imikino kuko mu ntangiriro zawo yari yaguze abakinnyi batari ku rwego rwayo, abanyamuryango bamwe na bamwe nabo barayitererana ijya mu bibazo by’amikoro ku buryo bisanze ikipe yamanutse. Yagize ati “Umwaka ushize habayemo gucika intege ku banyamuryango bamwe na bamwe ariko ubu babonye aho byagejeje ikipe. Niyo mpamvu uyu mwaka bakangutse, bayitera inkunga ndetse nkaba nsaba n’abataraza kwikubita agashyi kuko ikipe ni iyabo.”

Uretse Habyarimana Innocent na Hakubaho Vincent, iyi kipe yamaze no kugura Mbogo Ally wakiniraga Espoir FC, Mugheni Fabrice wavuye muri Rayon Sports, Maombi Jean Pierre wakiniraga Musanze FC kimwe na Uwihoreye Jean Paul wavuye muri Police FC.Aba bakinnyi kimwe n’abari basanzwe mu ikipe ndetse n’abashobora gusinya vuba aha, bagomba gutangirana imyitozo ikomeye n’Umutoza Cassa Mbungo ku wa Mbere w’icyumweru gitaha bitegura umwaka w’imikino 2017-2018.

Kiyovu Sports izatangira shampiyona yakira Musanze FC tariki 1 Ukwakira, naho ku musni wa kabiri ikazacakirana na mukeba w’ibihe byose, Rayon Sports tariki 15 Ukwakira kuri Stade ya Kigali i Nyamirambo.

Tanga igitekerezo

Tanga igitekerezo