Habuze utorerwa kuyobora Ferwafa, Degaulle akomeza kuyobora inzibacyuho

Yanditswe na Rwanda Football ku wa 30.12.2017 saa 12:37 |

Inteko Rusange idasanzwe yo gushaka usimbura Nzamwita Vincent de Gaulle ku buyobozi bwa Ferwafa, yateranye kuri uyu wa Gatandatu, muri 52 batora amajwi asabwa kuko umukandida rukumbi Rwemalika Félicité yagize 13, imfabusa ziba 39.

Rwemalika Félicité yari umukandida rukumbi wiyamamariza kuyobora Ferwafa nyuma yaho Nzamwita Vincent de Daulle akuyemo kandidatire ye ku munota wa nyuma.

Kugira ngo umuntu atorerwe kuyobora ishyirahamwe ry’umupira w’amaguru mu Rwanda, nibura umukandida yasabwaga kugira kimwe cya kabiri cy’amajwi. Ibi bisobanuye ko kuko abatora bari 52, byasabaga ko agira 27 ariko Rwemalika yagize 13.Abatatoye Rwemalika ku mpapuro zabo bandikagaho ngo ‘oya’, ibyo komisiyo ishinzwe amatora yemeje ko ari ‘imfabusa’.Nyuma y’aho habuze utorerwa kuyobora Ferwafa, Komisiyo ishinzwe amatora yasohotse mu cyumba yaberagamo ijya kwiherera kugira ngo ishake umwanzuro ugomba gukurikiraho.

Komite ishinzwe amatora nyuma yo kwiherera, Perezida wayo Adolphe Kalisa yavuze ko Rwemalika atagize amajwi asabwa kugira ngo abashe gutorwa. Ashingiye ku ngingo ya 28 igenga aya matora, yavuze ko Komite Nyobozi ya Ferwafa igomba gukomeza imirimo yayo kugeza ubwo hazaba indi Nteko Rusange ya Ferwafa ari nayo izatorerwamo Perezida mushya.

Perezida wa Komite Nyobozi ya Ferwafa, Nzamwita Vincent de Gaulle, yahawe ijambo avuga ko abo ayoboye bazahurira hamwe mu minsi mike bakagena itariki nshya izaberaho Inteko Rusange idasanzwe ya Ferwafa ari nayo izatorerwamo ugomba kumusimbura.

Uwari yoboye akanama k’amatoraKalisa Adolphe ’Camarade’ yagize ati : “Iyo habonetse urutonde rw’abiyamamaza rumwe gusa, bigomba kubahirizwa. Niko twabigenje, Rwemalika abona amajwi 13, imfabusa ziba 39.Nyuma yo kubona ibyavuye mu matora, hakurikijwe ingingo ya 24, agace ka 2, amatorwa akorwa ku bwiganze busesuya bwa 50+1% ku uwatsinze. Nanone twiyambaje ingingo ya 28 uko imirimo ikomeza gukorwa, inzego za Ferwafa zikomeza gukora kugeza igihe cy’amatora gishojwe. Natwe twasubijeho komite nk’uko Inteko rusange yabidusabye.”

Kalisa Adolphe yemeje ko kuri ubu amatora afunguye kuri buri wese, yaba abatsinzwe n’abandi banyarwanda bose bifuza kuyobora umupira w’amaguru mu Rwanda.

Mu kiganiro n’abanyamakuru kandi, umuyobozi wa Ferwafa; Nzamwita Vincent De Gaulle yavuze ko yafashe icyemezo cyo kwegura saa Cyenda mu rukerera ari we, ndetse nta wamuhatiye gukuramo kandidatire nk’uko bivugwa.

Ku ruhande rwa Rwemalika Felicite watsinzwe yiyamamaje wenyine, yavuze ko atari ahanganiye intebe yo kuyobora Ferwafa, ahubwo yaharaniraga impinduka muri Ferwafa ndetse azakomeza kuziharanira.Uyu wari umukandida yakomeje avuga ko yashimishijwe no kuba yarabashije kwiyamamaza ari umugore kandi hari n’abandi bagabo benshi babitinye.

Constant Omari Selemani, ni we ndorerezi mu matora ya Perezida w’ishyirahamwe ry’umupira w’amaguru mu Rwanda (Ferwafa) wemejwe n’Ishyirahamwe ry’umupira w’amaguru ku Isi (FIFA). Uyu mugabo ni umwe mu bagize akanama ka FIFA akaba Visi Perezida wa CAF na Perezida w’ishyirahamwe ry’umupira w’amaguru muri Repubulika iharanira Demokarasi ya Congo (Fecofa).

Tanga igitekerezo na Facebook

Tanga igitekerezo

Powered by Live Score & Live Score App