Gicuti : Amagaju FC 1-1 Police FC

Yanditswe na Admin ku wa 06.10.2014 saa 16:29 | Yasuwe : 582

Mu rwego rwo kwitegura shampiyona izatangira mu mpera z’icyi cyumeru dutangiye, amakipe akomeje gukina imikino ya gicuti

Umukino wa gishuti wahuje ikipe y’Amagaju na Police fc ku kibuga cya Nyagisenyi mu karere ka Nyamagabe warangiye amakipe yombi anganyije igitego kimwe kuri kimwe.

Umukino watangiye  imvura ihitutse nubwo bwose ikibuga cya Nyagisenyi cyari ibiziba hafi ya cyose, ntibyabujije abakinnyi ku mpande zombi gukina maze igice cya mbere kkirangira ari igitego kimwe ku kindi.

Ikipe y’Amagaju niyo yatanze Police Fc mu mukino cyane ko yakiniraga ku kibuga imenyereye. Ku munota wa gatanu gusa w’umukino kapiteni w’Amagaju Yumba Kaite yahaye umupira mwiza umusore Nkurunziza Didier imbere y’izamu awuteye uca hejuru gato y’izamu rya Ntaribi Steven umunyezamu wa Police Fc.

amagaju

Amagaju ( Photo Ububiko )

Ntibyatinze  ikipe ya Police fc nayo yakomeje gusatira ariko ba rutahizamu bayo barimo kapiteni wayo Tuyisenge Jacques na Sebanani Emmanuel Crespo kuboneza mw’izamu rya Tiger umuzamu w’Amagaju bikomeza kubabera ingorabahizi.

Ikipe y’Amagaju niyo yafunguye amazamu ku gitego cyiza cyane cyatsizwe n’umusore Nkurunziza Didier k’umupira yahawe na Bakundikize Adolphe wanitwaye neza cyane muri uyu mukino.

Mbere y’uko igice cya mbere kirangira ikipe ya Police fc yakomeje gusatira cyane iza kubona corner iterwa neza na Innocent Habyarimana maze kapieni Tuyisenge Jacques atsinda  igitego  cy’umutwe amakipe yombi ajya kuruhuka anganyije, ari nako byaje kurangira kuko mu gice cya kabiri nta kindi gitego cyabonetse ku mpande zombi.

Umutoza w’Amagaju Bekeni ati”Ikipe si inzu y’ibyatsi wubaka ugahita uyijyamo,ahubwo ikipe nitegurwa igihe kirekire,ati niba umwaka ushize kubona inota byari ingorabahizi none tukaba tubashije kuribona kuri Police fc nukuvugako hari byinshi byahindutse.Nta mugabo ugenda ngo asige ibye byose ahubwo umugabo n’ugendana ibyo atunze,bivuze ko umunzenze nari mfite muri Etincelles umwaka ushize nkiwufite,ahubwo ubu mfite iminzenze, abakunzi b’amagaju babone ko dutangiye kuko iyo tuza kuba dutsizwe benshi ubu bari kuba batashye bagiye kwinywera inzagwa ndetse n’imisururu,nicyo gihe rero cyo gutangira bagashaka amafaranga bakajya baherekeza ikipe yabo”.

bekeni

Yakomeje agira ati “Ikipe yanjye imeze neza ndetse n’iteguye gutangira shampiyona ntsinda.”Abajijwe intego ye ya mbere mu cyiciro cya mbere Becken yagize ati “Njyewe ubu ndashaka kuza mu makipe arindwi ya mbere muri uyu mwaka wa shampiyona.”

Abajijwe impamvu yumva agomba kuza nibura ku mwanya wa karindwi adashaka igikombe, Becken aseka ati “Hhaha! None se wowe urumva natwara igikombe gute nkoresha ingengo y’imari (Budget) y’amafaranga miliyoni 60 mu gihe APR na Rayon Sports zikoresha miliyoni 350 zirenga? Ubwo se nazitwara igikombe, niba Amagaju ashaka igikombe azampe nibura miliyoni 350 ndebe ko ntagitwara!”

Becken yakomeje avuga ko ikipe ye nta wundi mukino wa gicuti izakina mbere y’itangira rya shampiyona kuko ngo abakinnyi be yamaze kubabona ndetse n’udukosa yagomba gukosora yamaze kutubona.

Umutoza w’ikipe ya Police Fc,Cassa Mbungo Andre ati“kunganya n’ikipe y’Amagaju ku kibuga cyayo kitameze neza ndabona ntacyo bitwaye,kuko imikino yacu myinshi ibanza ya Shampiyona tuzayikinira ku bibuga nkibingibi,twagombaga kumenyera cyane ibibuga nkibingibi.Kuba twaratakaje abakinnyi benshi ndetse banabanzaga mu kipe ya mbere ntibigomba kuduca intege kuko twagiye tuzana n’abandi bakinnyi kandi beza,ubu turimo gukina imikino myinshi ya gishuti kugirango abakinnyi bacu babashe kumenyerana.

Ikipe ni 14 kandi zose ziba zishaka gutwara igikombe, na Police fc iri muri izo kipe zishobora kuba zatwara igikombe,gusa nanone uko imikino ipanze nabyo ntabwo ari byiza kuri Police kuko ubu tuzasohoka inshuro 5 mugihe Apr fc izasohoka 2 kandi muri ako kabiri harimo na Marines fc, Rayon Sports izasohoka 4,As kigali isohoke 4 Kiyovu isohoke 3,byumvikane ko Police fc ariyo izasohoka kenshi ibyo byose ushobora kubyibaza cyane”.

Ikipe y’Amagaju muri gahunda yo gushaka inkunga mu bakunzi bayo ndetse no kwegereza abakunzi ikipe yabo Amagaju yateguye tombola irimo ibihembo byinshi bitandukanye ,muri byo rero harimo inka za kijyambere,imwe murizo ikaba yaratombowe ku munsi w’ejo ku mukino w’Amagaju na Police fc.

Umugabo usheshe akanguhe  Bikina Joseph akaba umwarimu mw’ishuri ry’impfubyi ariko ryigamo n’abandi bana rya Villages d’enfants SOS riri mu mujyi wa Nyamagabe niwe wagize amahirwe yo gutombora inka.

Shampiyona y’umupira w’amaguru mu Rwanda y’umwaka wa 2014-2015, izatangira tariki ya 18 Ukwakira, ikipe y’Amagaju izatangira ikina n’ikipe ya Rayon Sports.

Tanga igitekerezo na Facebook

Tanga igitekerezo