Gasogi United iyoboye Shampiyona yanyagiye Gasabo United

Yanditswe na Rwanda Football ku wa 11.03.2019 saa 15:01

Muri shampiyona y’icyiciro cya kabiri , Gasogi United itaratakaza umukino n’umwe mu itsinda ryayo A, yanyagiriye Gasabo United ibitego 4-0 mu mukino wabereye kuri Stade ya Kigali i Nyambirambo, aho iyi kipe ifite intego yo kuzamuka mu cyiciro cya mbere isanzwe yakirira imikino yayo.

Uyu mukino wabanjirije uwa AS Kigali yakiraga Mukura VS watangiye ikipe ya Gasogi United irusha cyane Gasabo United, inyuze mu basore bayo bo hagati nka Kayitaba Jean Bosco ndetse na Kwizera Aimable, bihariraga umupira cyane maze ku munota wa 15 gusa Dusange Bertin abonera ikipe ye igitego ku burangare bwa ba myugariro ba Gasabo.

Ntibyatinze kuko nyuma y’iminota itandatu gusa Kayitaba Bosco, yaje gutsinda penaliti, icyizere cyo gutsinda uyu mukino kiriyongera ikipe ya Gasogi United yakomeje guhanahana neza ari nako Gasabo ikora amakosa atandukanye hagati mu kibuga.

Ku munota wa 24 Kayiranga Gentil wa Gasogi United yahushije igitego aciye hagati ya ba myugariro batatu ba Gasabo.

Ku munota wa 43 uyu Kayitaba Jean Boco wari umaze gutsinda penaliti nibwo yaje kubonera ikipe ye igitego cya gatatu ku burangare bwa ba myugariro ba Gasabo maze abacamo ari babiri aza kuroba umunyezamu Murenzi Samuel wasohotse nabi maze icya gatatu kiba kirinjiye.

Igice cya mbere cyaje kurangizwa n’igitego cya Kane cyaje gutsindwa na Niyonzima bakunze kwita Aguero, cyahise gishimangira intsinzi ya Gasogi United itaratsindwa muri iyi Shampiyona y’icyiciro cya kabiri, aho imaze kunganya rimwe gusa.

Igice cya kabiri Gasabo United yaje kubona uburyo bubyara igitego ku munota 65’ ku ishoti rikomeye ryatewe na Gahigi Jean de Dieu umupira ugonga umutambiko w’izamu ujya hanze. Gasabo yakomeje gusatira ibona ubundi buryo bw’umupira ugana mu izamu kuri coup-franc yatewe na Iradukunda Axel, Sibomana Amini ashyizeho umutwe umupira ujya hejuru y’izamu.

Ku munota wa 72, Gasogi United yabonye uburyo bubiri bwiza ariko ishoti ridakomeye ryatewe na Jean Bosco Kayitaba rifatwa n’umunyezamu mu gihe undi mupira wahinduwe na Rugangazi Prosper urenzwa na Iradukunda Axel.

Igice cya kabiri ntacyo kigeze gihindura ku mukino warangiye ku ntsinzi ya Gasogi United n’ibitego 4-0. Gutsinda uyu mukino byatumye Gasogi United ikomeza kuyobora itsinda A ryo mu cyiciro cya kabiri n’amanota 31 mu mikino 11 imaze gukina ikaba yaratsinze 10 inganya umwe gusa, mu gihe Gasabo United yo yagumye ku mwanya wa 10 n’amanota 10.

Ababanjemo ku mpande zombi:

Gasogi United: Cyuzuzo Aime Gael, Nkubana Marc, Niyonkuru Amani, Kazindu Bahati Guy, Kiwzera Aimable, Byumvuhore Tresor, Irakoze Gabriel, Kayitaba Jean Bosco, Habimana Yves, Dusange Bertin na Niyonzima Zachee.

Gasabo United: Murenzi Samuel, Bingabo Orly, Iradukunda Axel, Mukengere Christian, Kayiranga Gentil, Kagame Frank, Rutabagisha Joseph, Sibomana Amini, Sibomana Jonathan, Birashira Francis, Gahigi Jean De Dieu.

 

Tanga igitekerezo