FIFA yategetse Ferwafa gukuraho Rayon Sports amanota atatu

Yanditswe na Admin ku wa 17.03.2015 saa 13:08 | Yasuwe : 847

Ishyirahamwe ry’umupira w’amaguru kw’isi, FIFA ryategeste FERWAFA guhana ikipe ya Rayon Sports iyikuraho amanota atatu, nka kimwe mu bihano yafatiwe iyi kipe nyuma yo kwanga kwishyura umwenda ibireyemo uwahoze ari umutoza wayo Raoul Shungu.

Ibi bikubiwe mu ibaruwa FIFA yanditsiwe Ferwafa tariki ya 09/03/2015 ndeste igaha kopi ikipe ya Rayon Sports hamwe n’umutoza Raoul Shungu.

Alejandra Salmeron Garcia, umunyambanga w’ungirije w’akanama w’akanama gashinzwe imyitwarire myiza muri FIFA yavuze ko, “Nyuma yaho tumenyeshejwe ko ikipe yanyu ya Rayon Sports yanze kubahiriza umwanzuro wari ukubiye mw’ibaruwa y’akanama gashinzwe imyitwarire myiza muri FIFA ya 25/11/2014, mwabonye kopi yayo,”

“Turabasaba ko federasiyo yanyu ikurikiza intego rya kane ry’uwo mwanzuro ryo gukuraho amanota atatu ku ikipe ya Rayon Sports ikina mu cyiciro cya mbere kandi mukatugezaho ikirekana ko ayo manota mwayakuyeho kuri iyo kipe,”

“Nk’umunyamuryango wa FIFA, FERWAFA isabwe kubahiriza iri tegeko nk’uko bisabwa. Turabibutsa ko mu gihe mwaba mutabikoze mugaragaza ko ayo manota mwayakuyeho kuri iyo kipe, ishyirahamwe ryanyu rizafatirwa ibihano n’akanama k’imyitwarire myiza bishobora kugera aho mukurwa mu marushanwa yose ya FIFA,”

Umunyamabanga Mukuru wa FERWAFA, Me Olivier Mulindahabi yavuze ko “Ibisabwa na FIFA turahita tubishyira mu bikorwa bidatinze hanyuma tuyimenyeshe ko byakozwe,”

rayonlogo

Rayon Sports irishyuzwa na Raoul Shungu miliyoni 13 Rwf arimo umwenda w’ibihumbi 9,583$ n’ibihumbi 861,647 Rwf n’amande ya 5% byayo kuva mu 2009 yirukanwa.

Shungu yari umutoza wa Rayon Sports mu 2009 yirukanwa agifite amasezerano ntiyahabwa imperekeza, areze mu Ishyirahamwe ry’umupira w’amaguru ku Isi (FIFA), umwanzuro ufatwa tariki ya 26 Werurwe 2012.

FIFA yemeje ko Rayon Sports izishyura Raoul ibihumbi 31,218 by’amadorali asaga miliyoni 21,900,000 Rwf.Rayon Sports yari yandikiye FIFA imenyesha ko kubera ibibazo by’amikoro bagize bishingiye ku guhinduranya abatoza, bazishyura Raoul Shungu amafaranga bamusigayemo bitarenze tariki ya 31 Mutarama 2015.

Ariko nyuma y’ibiganiro mu kwezi kwa kabiri uyu mwaka, ubuyobozi bwa Ferwafa bwagiranye ibiganiro n’ubwa Rayon Sports bwemera gufasha iyi kipe kurangiza burundu ikbazo bafitanye na Raoul Shungu.

Ni muri ubwo buryo habayeho inama hagati ya Ferwafa na Rayon Sports igamije kurebera hamwe Ferwafa yaguriza iyi kipe amafaranga bakishyura umwenda wa Raoul Shungu.

Ubusabe bwaje kwemerwa ariko nyuma ikipe ya Rayon Sports yanga gutanga ingwate (ikintu kigaragaza ko ayo mafaranga Ferwafa yari kwishyura izayagaruza) mu gihe Ferwafa yo yari yemeye kwishyura Raoul Shungu.

Nyuma yo gukurwa ho ayo amanota, aka kanama gashobora kongerera ibihano ikipe ya Rayon Sports mu minsi iri imbere bishobora kugera aho imanurwa mu cyiciro cya kabiri.

Tanga igitekerezo na Facebook

Tanga igitekerezo