Ferwafa yasezereye abana 14 b’ikipe y’igihugu U 17

Yanditswe na Admin ku wa 14.11.2014 saa 20:31 | Yasuwe : 901

Hashize icyumweru Ishyirahamwe ry’umupira w’amaguru mu Rwanda risezereye abana 14 bakiniye ikipe y’igihugu y’abatarengeje imyaka 17 babaga mu mazu yaryo babana n’Isonga, mu gihe umutoza w’Amavubi avuga ko uru rwego ruyobora uyu mukino rutari kwita ku bana bakiri bato.

Ese kuki abari bagize ikipe y’igihugu basezerewe bagasubizwa mu miryango yabo?

Ubwo u Rwanda rwiteguraga amajonjora y’igikombe cy’furika cy’abatarengeje imyaka 17 na Uganda, FERWAFA yatoranyije abana mu gihugu, bahurizwa hamwe baba mu mazu y’iri shyirahamwe ryubakiwe n’Ishyirahamwe mpuzamahanga (FIFA) mu mushinga wa Goal project, aya mazu niyo yakuriyemo abakinnyi nk’aba bagiye mu gikombe cy’Isi mu 2011 cyabereye muri Mexique.

Aba bakinnyi bashakiwe amashuri i Kigali kugira ngo bibashe kwitegura baniga dore uko igihe cyo kwiteguriraho Uganda cyari kibaye gito.Nyuma yo gutsindwa ibitego 4-0 mu mukino ubanza wabereye i Kampala, umutoza wabo Lee Johnson yavuze ko afite abakinnyi bafite impano ariko batabonye umwanya wo gutozwa umupira w’amaguru w’ibanze no gukina imikino myinshi byo kubongerera ubunararibonye.

Uganda imaze gusezerera Amavubi U17 ntawongeye kwita kuri aba bana bari bakuwe mu miryango yabo, ntibakoraga imyitozo, ntibemererwa no kwerekeza mu yandi makipe ariko bafashwa gukora ibizamini bya Leta no kurangiza umwaka w’amashuri.

Aganira nikinyamakuru  IGIHE ducyesha iyi nkuru, Hakizimana Moussa, umuvugizi wa FERWAFA yavuze ko aba bana 14 bagomba gusubira mu miryango yabo, ko bari bategereje ko amashuri afunga.

Abajijwe niba hari icyizere ko urwego rw’imikinire aba bakinnyi bari bafite rutazasubira inyuma, Hakizimana yavuze ko bazasubira mu masentere bakinagamo bakagerageza gushaka amakipe, ko igihe ikipe y’igihugu izajya ibakenera izabahamagara.

 Ikipe y’igihugu U17 yakinnye na Uganda 

 Isonga yatatiye umurongo nubwo izasenyuka vuba

Isonga FC yashinzwe mu 2011 igizwe n’abakinnyi bari bavuye mu gikombe cy’Isi cy’abatarengeje imyaka 17 cyabereye muri Mexique.Iyi kipe yari ifite inshingano yo gufasha aba bakinnyi bavuye mu masentere gutozwa n’umutoza ushoboye no kubona umwanya uhagije wo kwitoza no gukina imikino myinshi mpuzamahanga, ikaba inzira yo guteguriramo ikipe y’igihugu y’abatarengeje imyaka 17 na 20.

Isonga iri gukina mu cyiciro cya mbere ni iya nyuma ku rutonde rwa shampiyona n’amanota abiri. Benshi mu bari bagize ikipe y’igihugu y’abatarengeje imyaka 20 babarizwa mu yandi makipe byahaga umwanya ab’Amavubi U17 kuba bakinira Isonga.

kuki abari bagize Amavubi U17 basezerewe Isonga ikinamo bande?Amavubi U20 azava he?

Hakizimana yagize ati “ Kugeza ubu Isonga irimo abakinnyi benshi, umubare urarenze, niyo mpamvu aba basubiye mu miryango yabo.”

Kuba abari bagize Amavubi U17 batagaragara mu Isonga bivuze ko hazashakwa abandi bakinnyi bashya ubwo hazaba hategurwa Amavubi U20 badafite ubunararibonye nta mikino mpuzamamahanga babonye.Nta kabuza ko umutoza wabo azavuga ko abakinnyi babuze ubumenyi bw’ibanze n’imikino.

Minisiteri y’umuco na siporo na FERWAFA baherutse gutangaza ko kubera ingengengo y’imari nini iyi kipe itwara ntitange umusaruro bijyanye n’intego yari ifite izasenyuka nyuma y’uyu mwaka wa shampiyona.

Umutoza w’Amavubi aranenga imitegurire y’amakipe mato, imbogamizi ku masaruro w’ikipe z’igihugu

Nyuma yo guhamagara ikipe yateguraga umukino wa gicuti na Maroc, umutoza w’Amavubi Stephen Constantine yagarutse ku bakinnyi bahamagawe bwa mbere muri iyi kipe batarengeje imyaka 23 ariko bakaba batarakina umukino n’umwe mpuzamahanga.

Constantine yavuze ko bigoye kuba haboneka umusaruro mu gihe amakipe y’igihugu atabona imikino ya gicuti kuko ariho abakinnyi bakura ubunararibonye, kumenyerana n’umutoza akabona uko akosora amakosa.

Yagize ati “ Ubu si bwo buryo bwo gutegura ikipe y’igihugu, ubundi hategurwa iy’abatarengeje imyaka 17 n’aba 20, ntibyakozwe dufite abakinnyi b’imyaka 21 bagiye gukina umukino wa mbere mpuzamahanga nta bunararibonye.”

Uyu mutoza ufite inshingano zo gutagura igikombe cy’Afurika cy’abakina imbere mu gihugu, CHAN, kizabera mu Rwanda mu 2014, avuga ko ubu ntawemenya aho Amavubi U17 na U20 abarizwa mu giha bakabaye bari hamwe hategurwa imikino ya gicuti na bamwe mu bazaba bagize ikipe y’igihugu y’abatarengeje imyaka 23 izatangira amajonjora y’imikino olimpiki n’igikombe cy’Afurika cy’abatarengeje imyaka 23 muri Mutarama 2015.

Imyiteguro idahagije, umusaruro mubi muri CHAN na CAN U23

Kuba u Rwanda rutagira abakinnyi bakomeye bakina hanze n’urwego rw’imikinire ya shampiyona rukaba rukemangwa, inzira igana ku ntsinzi y’ikipe y’igihugu yashakirwa kwitegura neza, guhuriza hamwe abakinnyi bagakina imikino ya gicuti myinshi yo kwipima.

Mu gihe ibihugu nka Maroc na Algeria bisanzwe bifite shampiyona zikomeye byatangiye imyiteguro n’imikino ya gicuti bitegura CHAN 2016, kuva Constantine ageze mu Rwanda muri Kamena ni ubwa mbere ahamagaye ikipe ifite icyerekezo cya CHAN.

Harabura ukwezi hagatangira amajonjora y’igikombe cy’Afurika cy’abatarengeje imyaka 23 n’itike y’imikino olimpiki izabera Rio de Janeiro mu 2015, nta mwiherero urategurwa mu gihe mu ntangiriro za 2015 bazakina na Somalia.

Umusaruro wa CHAN 2016 na CAN U23 mu isura ya CAN U20

Nyuma y’imyiteguro mike y’ikipe y’igihugu y’abatarengeje imyaka 20 yagombaga kwakira igikombe cy’Afurika cyabereye mu Rwanda mu 2009, Amavubi U20 yatsinze umukino umwe wa Mali ibitego 2-1 mu itsinda A bahita basezererwa.

Mu gihe abatarengeje imyaka 17 bari babanje guhurizwa mu ishuri ry’umupira w’amaguru rya FERWAFA bakina n’imikino myinshi ya gicuti, mu 2011 batsindiwe ku mukino wa nyuma na Burkina Faso ibitego 2-1 mu gikombe cyabereye mu Rwanda. Amavubi U17 abona itike y’igikombe cy’Isi cyabereye muri Mexique.

Inkuru : Igihe

Tanga igitekerezo na Facebook

Tanga igitekerezo