FERWAFA yabonye umunyamabanga mukuru mushya

Yanditswe na Rwanda Football ku wa 29.05.2018 saa 12:36 |

Kuri uyu wa kabiri tariki ya 29 Gicurasi 2018, ishyirahamwe ry’umupira w’amaguru mu Rwanda, FERWAFA ryatangaje ko Francois Regis Uwayezu ariwe munyamabanga mukuru waryo mushya.

Uwayezu Regis w’imyaka 35, afite icyiciro cya gatatu cya Kaminuza muri ‘Business Administration (MBA)’ yakuye muri Kaminuza ya Mount Kenya, akaba ari we watsinze ibizamini byatanzwe na FERWAFA mu minsi yashize ku mwanya wahatanirwaga n’ abantu 73.

Uwayezu Regis

Atangaza uyu munyamabanga mushya , Perezida wa FERWAFA (Rtd) Sekamana Jean Damascene,  yatangaje ko ashimishijwe no kuba agiye gukorana na Uwayezu. Ubunararibonye bwe mu mupira w’amaguru ngo buzafasha cyane FERWAFA.Yagize ati ” Nishimiye kwakira Uwayezu nk’umunyamabanga mushya wa FERWAFA, ndetse nejejwe no kuzakorana na we. Ubuhanga bwe mu bigendanye n’imiyoborere ndetse n’ubumenyi afite ku mupira w’amaguru bizafasha cyane FERWAFA.”

Uwayezu we yatangaje ko yishimiye kuba yinjiye muri FERWAFA kugira ngo na we ashyire itafari rye mu kubaka umupira w’amaguru w’u Rwanda. Ati ” Umupira w’amaguru wahoze ariyo ‘Passion’ yanjye. Nishimiye cyane kwinjira muri FERWAFA ndetse niteguye gukorana neza na komite ya FERWAFA n’abandi bafatanyabikorwa mu kubaka umupira w’amaguru w’u Rwanda kandi nizeye ko tuzakora akazi k’indashyikirwa.”

Uwayezu yari asanzwe ari umuyobozi ushinzwe ubutegetsi n’umutungo mu kigo cy’Inteko y’Ururimi n’umuco, RALC. Ni umwanya yari ariho kuva muri 2012.Yari asanzwe kandi ari umuyobozi wungirije w’ishyirahamwe ry’abatoza ba ruhago mu Rwanda. Yabaye umutoza mu makipe atandukanye arimo Kaminuza y’u Rwanda yabayemo imyaka itatundetse na APR FC Academy n’ikipe nkuru nayo yamazemo imyaka itatu.

Umwanya w’umunyamabanga mukuru wa FERWAFA ni umwanya w’umuyobozi uhoraho wa FERWAFA ukurikirana ibikorwa n’abakozi b’ishyirahamwe ry’umupira w’amaguru, umunsi ku munsi.

Uwayezu afite ‘Certificat’ z’ubutoza zo ku rwego mpuzamahanga arizo DFB C-Licence na UEFA B-Level yakuye Koblenz mu Budage mu mahugurwa yahigiye kuva tariki 30 Kanama kugeza tariki 17 Nzeli 2010. Muri 2010 yegukanye igikombe cya Copa Coca-Cola U17 ubwo yari umutoza wungirije muri APR Football Academy.

Uwayezu aje gusimbura Habineza Emmanuel wari Umunyamabanga Mukuru w’Ishyirahamwe ry’Umupira w’Amaguru mu Rwanda kuva muri Gashyantare uyu mwaka, weguye ku mirimo ye nyuma y’iminsi 16 hatowe Komite nshya.

Habineza wari wagizwe Umunyamabanga wa Ferwafa ubwo Nzamwita Vincent de Gaulle yayoboraga FERWAFA, muri Gashyantare 2018, asimbuye Uwamahoro Tharcille Latifah, yeguye nyuma y’uko iri Shyirahamwe ribonye umuyobozi mushya, (Rtd) Brig Gen Sekamana Jean Damascène watowe tariki 31 Werurwe 2018.

Tanga igitekerezo na Facebook

Tanga igitekerezo

Powered by Live Score & Live Score App