FERWAFA izajya yinjiza hejuru ya miliyoni 230 buri mwaka

Yanditswe na Admin ku wa 21.04.2015 saa 14:33 | Yasuwe : 647

Jérôme Dufourg, umuyobozi ushinzwe gushaka amasoko n’itumanaho mu ishyirahamwe  ry’umupira w’amaguru mu Rwanda “FERWAFA” ,  atangaza ko amafaranga make  FERWAFA izajya yinjiza buri mwaka ari miliyoni 230 ariko  ashobora  kugera no  kuri miliyari y’amafaranga y’u Rwanda.

Aya mafaranga ngo azaturuka mu baterankunga b’ikipe y’igihugu  no ku mafaranga yo  kugurisha imikino ya shampiyona,  kimwe n’abandi baterankunga bazajyenda bazamo hagati. Muri yo harimo miliyoni 129  z’amafaranga y’u Rwanda azaturuka  ku kugurisha uburenganzira  bwo  kwerekana imikino ya shampiyona ; na miliyoni 103 zizava  ku muterankunga wa shampiyona “uzitirirwa  shampiyona”.

Uyu mugabo avuga ko aya mafaranga ari  munsi cyane ya miliyari y’amafaranga y’u Rwanda  we yifuza, gusa yayafatiraho  nk’ifatizo agereranyije  n’ibihugu  byo  mu Karere nka Kenya, yinjiza miliyoni 800 z’amafaranga y’u Rwanda buri mwaka muri shampiyona yayo .

Nkuko yabitangarije Imvaho Nshya nyuma y’amezi 2 ashinzwe  iyi  mirimo , akimara  kugera  muri aka kazi,  yihutiye  gusaba FERWAFA kugira gahunda ihamye ya shampiyona kugira ngo abone uko yegera abaterankunga. Anatangiza ibiganiro na za  kampani zirenga 50  zo  mu Rwanda  n’izindi mpuzamahanga (nk’uko yabyeretse Imvaho Nshya , ariko ayisaba kuzigira ibanga  mu  gihe ntacyo barasinyana).   Kuri Dufourg, hazabaho  abaterankunga  bakuru na bo yita abafatanyabikorwa.

Iyi  mpuguke mu gushaka abaterankunga yavuze shampiyona y’icyiciro cya mbere kuva  umwaka utaha izaba ifite abaterankunga batari munsi ya  bane.    Barimo uzaba yaraguze uburenganzira  ku mashusho (Televisiyo imwe izagura imikino yose ya shampiyona, nayo igurishe ku bandi)  n’umuterankunga nyirizina witirwa  shampiyona. Aha yagize ati “Mu mezi abiri, ndatekereza ko   ku byo kwerekena imikino ya shampiyona tuzaba twamaze gusinyana n’uzabikora  ari nako bimeze  ku muterankunga wa shampiyona. Yego  shampiyona  izatangira  muri Nzeli, turacyafite  igihe”.

Mu minsi yashize, televisiyo mpuzamahanga “Supersport” yari yavuzwe  mu bashobora  gukorana na FERWAFA  kugira ngo yerekane iyi mikino. Hari kandi na  televiziyo ya AZAM na yashyize  imbaraga mu kwerekana  imikino ya shampiyona.

dufourg

Dufourg yemeza koko ko yamaze  kugiranira n’izi televiziyo zombi , hamwe n’izindi ariko nta  n’umwe  barasinyana.

Yongeraho  ko n’abanyamakuru b’amaradiyo bashaka kogeza imipira bazajya bishyura mu  gihe bamamariza ibigo bikora ibintu bimwe n’abaterankunga ba shampiyona. Aha yagize ati “Iki ni  igitecyerezo cyacu  abashinzwe gushaka amasoko, ariko n’abayobozi ba FERWAFA   bafite  uko babyumva.  Abanyamakuru bo ku maradiyo nibaza, tugomba  kumenya ko bakiriwe neza, ntawabirukana. Ariko tugomba gusuzuma uburyo bamamazamo. Niba aterwa inkunga na Banki,  haba hari benshi bakurikiye  uyu mukino kuri radiyo zabo;  tuzareba neza niba bitabangamira abaterankunga bacu. Niba hari aho bihuriye, uwo munyamakuru uzamusaba nawe kwishyura. Niba  wamamaza Banki, umuterankunga wa shampiyona akaba Banki ,  urumva  ko tuzirukana uwo  mu  nyamakuru”.

Aya mafaranga aturutse ku kugurisha imikino ya shampiyona  , azajya agabanywa amakipe yo mu cyiciro cya mbere.

Nta byinshi ategereje kuri CHAN 2016

Dufourg avuga ko CHAN 2016 izabera i Kigali, ari irushanwa ry’impuzamashyirahamwe y’umupira w’amaguru   muri Afurika “CAF”, bityo FERWAFA itategereza inyungu nyinshi  kuri ryo. Yongeraho ko  nk’Amavubi akwiye  kujya muri CHAN 2016 , yambaye  imyenda  mishya y’umuterankunga. Yagize ati ”  CHAN ni  igikorwa cya CAF. Ushaka  kuzanamo abaterankunga, ubyumvikana nayo,  ndetse n’abategura irushanwa. Uba ushobora  gutera  inkunga ikipe  y’igihugu, hari nk’abo turi  kuvugana bazaduha imyenda y’ikipe  y’igihugu. Bigeze ahantu heza, ku buryo mbere ya CHAN 2016 , hazaba hari  imyenda  ibikoresho bigezweho by’Amavubi”.

Mu busanzwe Amavubi , yambaraga imyenda y’uruganda rwa Adidas,  binyuze mu bufatanye rugirana na CAF. Icyo gihe amakipe  y’ibihugu, akagabanyirizwa ku myenda y’ikipe  y’igihugu.

Miliyoni 100 mu gikombe cy’Amahoro

Dufourg yemeza ko habonetse abaterankunga b’’igikombe cy’amahoro bazatanga miliyoni 100 ndetse  bamaze kumvikana n’aba baterankunga bamaze hasigaye gusinyana gusa. Ati “Hari za kampani  zamaze kutwegera.  Ariko mbere ya byose bisaba ko tugira  ikirangaminsi gihamye. Kinerekana aho imikino izabera. Kugira ngo bigende neza. Mu gikombe cy’amahoro  twateganyije miliyoni 70, ariko  dukeneye miliyoni 100“.

Abajijwe  aho aya mafaranga azava, uyu mugabo yavuze ko hari na za kampani  zemeye  kuyatanga ariko atatangaza. Igikombe cy’amahoro  kizatangira nyuma ya shampiyona izasozwa taliki 10 Gicurasi 2015.

 

Tanga igitekerezo na Facebook

Tanga igitekerezo