Faustin na Kagere ntibazagaragara mu mikino yo ku munsi wa kabiri wa CAF CC

Yanditswe na Rwanda Football ku wa 15.05.2018 saa 07:51 |

Myugariro w’ikipe ya Rayon Sports; Usengimana Faustin azasiba umukino w’umunsi wa kabiri w’amatsinda ya CAF Confederation Cup nyuma y’uko ikipe ye imenyeshejwe na CAF ko kubera amakarita abiri y’umuhondo afite atemerewe kuwukina.

Rayon Sports izakirwa na Young Africans yo muri Tanzania mu mukino uzabera i Dar es Salaam kuri uyu wa gatatu  tariki ya 16 Gicurasi.

Usengimana Faustin wabonye ikarita ya kabiri y’umuhondo mu mikino ya CAF y’uyu mwaka ku mukino ubanza wo mu itsinda D bahuyemo na Gor Mahia i Kigali mu cyumweru gishize azasiba uyu mukino nk’uko Impuzamashyirahamwe y’Umupira w’Amaguru muri Afurika, CAF yabimenyesheje Rayon Sports mu ibaruwa yaboherereje.

Faustin Usengimana na Kagere Meddie bahanganye ntibazakina imikino ya kabiri y’itsinda.

Kuwa gatanu w’icyumweru gishize, Ivan Minnaert utoza Rayon Sports yari yatangarije itangazamakuru ko bategereje kumenyeshwa na CAF niba uyu mukinnyi atazakina kubera ko ari ari bwo bari bagitangira imikino y’amatsinda.

Kubura Faustin Usengimana bivuze ko Rayon Sports isigaranye Mutsinzi Ange, Manzi Thierry na Mugabo Gabriel nk’abakinnyi batatu bakina mu mutima wa ba myugariro ku mukino wa Yanga SC dore ko Rwatubyaye Abdoul wamaze kugaruka mu kibuga nta byangombwa byo gukina iyi mikino ya CAF afite.

Si Rayon Sports ifite ikibazo cyo kubura umukinnyi ku mukino wa kabiri mu itsinda ryabo kuko na Kagere Meddie, umunyarwanda ukinira Gor Mahia yo muri Kenya na we atazakina umukino ikipe ye izakiramo USM Alger yo muri Alger.

Kagere Meddie yabonye ikarita y’umuhondo ku mukino wa Rayon Sports, iyi yaje yiyongera ku yo yari yabonye ku mukino wa Esperance de Tunis muri 1/16 cya CAF Champions League.

CAF ikaba yamaze kwandikira Gor Mahia, na yo iyimenyesha ko uyu rutahizamu w’umunyarwanda atemerewe gukina umukino ikipe ye izakirira kuri Kasarani Stadium.

Tanga igitekerezo na Facebook

Tanga igitekerezo

Powered by Live Score & Live Score App