Etincelles FC yasubiye mu cyiciro cya kabiri

Yanditswe na Admin ku wa 09.05.2015 saa 11:22 | Yasuwe : 715

Etincelles FC yasubiye mu cyiciro cya kabiri nyuma yo gutsindwa na Marines FC 2-0 mu mukino w’ikirarane wari umaze gusubikwa inshuro nyinshi.

Mu mukino wari ukomeye nkuko bisanzwe kuri aya makipe y’amakeba atuye mu mugi umwe wa Rubavu icyakora hiyongeragaho ko Ikipe ya Etincelles yari ku mwanya mubi washoboraga gutuma imanuka, Ikipe ya Marines yihereranye Etincelles iyitsinda ibitego bibiri ku busa. Ibitego byombi byagiyemo mu gice cya kabiri.

Ibitego bibiri byatsinzwe byatsinzwe na Ruhosha Claude Bertrand ndetse na Ibrahim bakunze kwita Kibonke byatumye amahirwe ya Etincelles yo kuguma mu cyiciro cya mbere ayoyoka kuko yahise imanuka mu cyiciro cya kabiri.

etincelles15

Mu gihe habura imikino ibiri gusa ngo Shampiyona y’Umupira w’Umupira w’Amaguru y’uyu mwaka isozwe , Etincelles yagumye ku mwanya wa 13(ubanziriza uwa nyuma) n’amanota 17 aho irushwa na Musanze FC iyibanziriza amanota 7 kuko ifite 24. Bivuga ko n’aho Etincelles FC yatsinda imikino yose isigaje itashyikira Musanze.

Abdulkarim Nduhirabandi uzwi ku izina rya Choka  yatanhaje ko batsinze Etincelles bagamije kuvanaho ibihuha byavugaga ko bazabererekera ikipe ya Etincelles ngo bayifashe kuguma mu cyiciro cya mbere.

Twabibutsa ko Marines FC yatsinze Etincelles idafite rutahizamu wayo Mugenzi Bienvenu wigaragaje cyane muri shampiyona igiye kurangira kuko ari kumwe n’Ikipe y’Igihugu Amavubi y’abatarengeje imyaka 23 iri muri Djibouti aho yitegura umukino wo kwishyura na Somaliya.

Ese ni iki gitumye Etincelles imanuka?

Bamwe mu basesengura ruhago nyarwanda bavuga ko ikipe ya Etincelles yaba yarazize kudaha cyane umwanya abana b’i Rubavu bazi neza icyo Etincelles ari cyo. Aba babivuga bamwe babishingira ku bimaze iminsi bivugwa ko haba hari abakinnyi b’iyi kipe baryaga ruswa ngo bitsindishe.

Tubajije Nduhirabandi Abdulkarim Choka utoza Marines icyo avuga kuri ibyo, Choka uvuga ko na we ubusanzwe ari umufana wa Etincelles yadusubije ko atemeranywa na byo kuko ngo muri uyu mwaka Etincelles yari ifite abakinnyi beza ndetse barimo n’Abanyarubavu benshi.

Nduhirabandi avuga ko icyateye iyi kipe izwiho kuba yarazamuye abakinnyi benshi kwitwara nabi ari uburyo abo bireba batakoze akazi na bo neza, ni ukuvuga abakinnyi, abatoza ndetse n’ubuyobozi n’abandi bose bagira aho bahurira na Etincelles.

Etincelles izasubirana mu cyiciro cya kabiri n’Isonga FC.

Si ubwa mbere iyi kipe ya Etincelles isubira mu cyiciro cya kabiri. Hari n’ubwo yari igiye kumanuka ikizwa n’uko Ikipe yitwaga Electrogaz yari yivanye muri shampiyona. Ubundi na bwo yakijijwe n’isenyuka ry’ikipe ya La Jeunesse.

Tanga igitekerezo na Facebook

Tanga igitekerezo