Espoir FC ibereyemo abakinnyi umwenda wa miliyoni imwe

Yanditswe na Rwanda Football ku wa 22.06.2015 saa 13:25 | Yasuwe : 759

Ikipe ya Espoir yo mu cyiciro cya mbere ikaba ibarizwa mu mu Karere ka Rusizi ifitiye abakinnyi amafaranga miliyoni itarabishyura.

Umuyobozi w’ikipe ya Espoir FC, Gatera Egide yatangaje ko ayo mafaranga ari make kandi bateganya kwishyura abakinnyi mu cyumweru kimwe gusa ati “ibirarane ntabwo ari menshi ni miliyoni dufitiye abakinnyi bose muri rusange, hari aho usanga ibihumbi 100, 150, iyo imwe turayishaka vuba iboneke tuyibishyure”.

Espoir

Gatera avuga ko bitazarenga icyumweru kimwe batarayabaha bose umwenda ugashira. Ati “ni amafaranga tugiye dufitiye abakinnyi make make, twagiye tubishyura ibice hagasigara andi ubwo rero tubasigayemo miliyoni hamwe kandi nayo turaza kuyishyura vuba”.

Uyu muyobozi avuga ko ayo bari bababereyemo yari menshi ariko bamaze kuyishyura hasigaye ayo gusa. Gatera arangiza avuga ko n’andi bayabishyuye kandi n’ayo bateganya kuyabishyura kugira ngo ikipe yabo ikomeze kwitwara neza.

Ikipe ya Espoir yarangije shampiyona iri ku mwanya wa 8 n’amanota 32.

Tanga igitekerezo na Facebook

Tanga igitekerezo