Ese Constantine yaba agitoza Amavubis ?

Yanditswe na Rwanda Football ku wa 28.12.2014 saa 20:28 | Yasuwe : 1,042

Nubwo akomejwe kwifuzwa n’igihugu cy’Ubuhinde ko yababera umutoza mukuru,umutoza w’ikipe nkuru y’igihugu y’u Rwanda, Stephen Constantine avuga ko nta biganiro aragirana n’iki gihugu kandi ko afite akazi agomba kubanza gusoza n’igihugu cy’u Rwanda.

Kuri iki cyumweru, nibwo ibinyamakuru byo mu gihugu cy’Ubuhinde byatangaje ko Constantine ariwe uhabwa amahirwe kuba yatoza iki gihugu. Nkuko ikinyamakuru cyandikirwa mu Buhinde The Times Of India kibitangaza, Constantine azerekanwa nk’umutoza mushya w’igihugu cy’Ubuhinde mu cyumweru gitaha.

Constantine we ariko siko abibona kuko aganira n’urubuga rwa Internet rwa Ferwafa  yagize  ati : “Ibi nanjye mbyumva mu bitangazamakuru. Nta muntu numwe wo muri federasiyo y’Ubuhinde twari twavugana. Nubwo ndi mu biruhuko, ndimo ndategura gahunda zanjye z’ikipe y’igihugu y’abatarengeje imyaka 23 igomba gukina na Tanzania mu mukino wa gicuti wa FIFA hamwe na gahunda zirebana n’ikipe nkuru.”

Uyu mwongereza ufite amasezerano y’imyaka ibiri n’igihugu cy’u Rwanda yongeye agira ati : “Nzagaruka mu Rwanda tariki ya 17/01/2015 nkomerezaho n’umwiherero w’ikipe ya U23 hamwe n’izindi gahunda mfite zirebana n’igihugu cy’u Rwanda.”

constantinephilippe

Umutoza Constantine ari mu gihugu cya Cyprus mu biruhuko bya Noheli n’Umwaka mushya.Uyu mutoza wafashije u Rwanda kugera ku mwanya wa 68 kw’isi na 19 muri Afurika ku rutonde ngaruka kwezi rwa FIFA ateganya kugaruka mu Rwanda mu kwezi gutaha aho agomba gushyira mu bikorwa gahunda ndende y’umwaka afitiye amakipe y’igihugu inkuru na U23.

Ikipe ya U23 izakina amajonjora y’igikombe cy’Afurika n’imikino olimpiki ya 2016 guhera mu kwa kane 2015 kandi intego nuko u Rwanda rwegukana tike yo gukina imikino ya nyuma y’igikombe cya Afurika kizabera muri DR Congo.

Ikipe y’igihugu igomba kubanza gukina na Somaliya, Uganda na Egypt mu rugendo rukomeye kugirango ibone kwizera kwerekeza mu gihugu cya DRC.Naho ku ikipe nkuru  mu rwego rwo kwitegura CHAN 2016 izakina imikino ya gicuti itandukanye ngo  inakore imyiherero mu bihugu bitandukanye kugirango irusheho gukomera mbere y’uko yakira ibindi bihugu bya Afurika i Kigali mu kwa mbere 2016.

Intego izaba ari ugutsinda imikino yayo yose igashobora kwegukana iki gikombe cyegukanywe na Libiya mu marushanwa yabereye muri Afurika y’epfo uyu mwaka.

Kuva yagera  mu Rwanda muri Gicurasi uyu mwaka, mu mikino irindwi yatojemo ikipe y’igihugu Amavubi yatsinze ine anganyaibiri atsindwa umwe, ibi byatumye u Rwanda rurangiza umwaka ruri ku mwanya wa  68 ku Isi.

Nk’umutoza w’u Buhinde, Constantine yatwaye LG Cup muri Vietnam atwara  n’umwanya wa kabiri mu gikombe gihuza amakipe y’Afurika n’Aziya. Constantine yayoboye kandi ikipe y’Abahinde batarengeje imyaka 18 batwara Ian Rush Trophy yabereye muri Wales batsinze Botafogo yo muri Brazil.

Constantine yari ahanganye na Ashley Westwood utoza Bengaluru FC yo mu cyiciro cya kabiri mu Buhinde yatwaye igikombe cya shampiyona 2013-2014 na Ricki Herbert wabaye umutoza wa New Zealand, utoza NorthEast United FC mu cyiciro cya mbere cy’u Buhinde.

Mu Buhinde bari gushakisha  umutoza utarenza amadolari y’Amerika 20,000 Wim Koevermans wayitozaga yahembwaga ku kwezi mu gihe Constantine ahabwa umushahara mucye ugereranyije n’abandi batoza b’abanyamahanga banyuze mu ikipe y’igihugu Amavubi( $ 11,000 angana na Frw 7,469,000), abandi batoza barimo Sellas Tetteh na Blanko Tucak bahabwaga $ 20,000 naho Micho we yahabwaga $ 16,000.

Uretse uyu mushahara w’amadolari $ 11,000 ku kwezi, Constantine ahabwa $ 2,000 by’amadolari ku mukino mpuzamahanga w’irushanwa aba yatsinze na $ 1,000 ku mukino wa gicuti yatsinze  ndetse anemerewe ama tikeabiri2 y’indege mu mwaka yo kujya iwabo mu bwongereza gusura umuryango we.

Shampiyona y’Ubuhinde( India Super League) iherutse gusubukurwa nyuma y’igihe kinini itaba, aho yarimo amakipe icumi. Yakinwe mu mezi atatu iIbyumweru 12).Ni shampiyona igaragaramo cyane  abakinnyi  bagacishijeho ku mugabane w’i Burayi nka: David Trezeguet,Robert Pires, Nicolas Anelka,Marco Materazzi, Alessandro Del Piero, Franco Colomba,Luis García, Antonio López Habas, Zico, David James, Penni Orji, Peter Reid,Bojan Djordjic, Syed Rahim Nabi, Joan Capdevila, Ricki Herbert,   n’abandi.

Ubuhinde buri ku mwanya w’171 ku isi muri 2014 ku rutonde rusoza umwaka , mu gihe u Rwanda ruri ku mwanya wa 68,

Tanga igitekerezo na Facebook

Tanga igitekerezo