FERWAFA yaganiriye n’itangazamakuru

Yanditswe na Rwanda Football ku wa 12.09.2014 saa 11:03 | Yasuwe : 846

Kuri uyu wa Kane, ubuyobozi bw’Ishyirahamwe ry’umupira w’amaguru mu Rwanda (FERWAFA) buhagarariwe n’umuyobozi wabwo Bwana Nzamwita Degaulle bwagiranye ikiganiro nyungurana bitekerezo n’abayobozi b’ibitangazamakuru bikorera mu Rwanda .

Iki kiganiro cyari kigamije kwiga uko ibitangazamakuru mu Rwanda byagura uburenganzira bwo gucuruza shampiyona y’icyiciro cya mbere.Shampiyona y’icyiciro cya mbere izatangira tariki ya 20 Nzeli 2014 ndetse ubu buryo bukaba buzahita butangira gukoreshwa.

Nzamwita Vincent, Umuyobozi wa FERWAFA yasobanuriye abayobozi b’ibitangazamakuru ko bashaka ubufatanye n’imikorere hagati y’ibigo by’itangazamakuru ababwira gahunda nshya yo gucuruza shampiyona.

Umuyobozi wa FERWAFA yasobanuye ko shampiyona nka kimwe mu bicuruzwa bya FERWAFA bifuza ko ibitangazamakuru byagura uburenganzira bw’amashusho no kogeza kuri radiyo ndetse bakagira amasezerano y’imikoranire n’itangazamakuru ryandika kuburyo byaha umwanya umuterankunga wa shampiyona.

nzamwita

Perezida wa FERWAFA, Bwana Nzamwita Vincent ( Photo Ferwafa)

“Hazabaho amasezerano hagati ya FERWAFA n’ibigo by’itangazamakuru yo kureba uko dukorana ngo shampiyona irusheho kuba nziza, turebe niba hari icyo tugomba itangazamakuru cyangwa niba hari icyo batugomba.”

Ubusanzwe hari amafaranga Televiziyo n’ibindi bitangazamakuru byishyura kugira ngo bibashe kwerekana amashusho y’amarushanwa n’ibikorwa by’imikino aho baba bashobora kwamamaza no kugurisha ku bindi bitangazamakuru kuri ubwo burenganzira.

Mu bindi byaganiriwe, ni uko buri cyumweru hazajya hatangwa itangazo rigenewe abanyamakuru rivuga ibikorwa bya FERWAFA ndetse buri kwezi habe ikiganiro n’abanyamakuru.

Iyi nama yanzuye ko mu cyumweru gitaha, ibigo by’itangazamakuru bizagezwaho imiterere y’amasezerano n’icyo bisabwa ngo ibitangazamakuru byerekane iyi mikino no kuyogeza iri kuba. Abayobozi b’ibitangazamakuru basabye ko mu gukora aya masezerano harebwa ku nyungu z’impande zombi no ku iterambere ry’umupira w’amaguru.

Inkuru : Ferwafa

Tanga igitekerezo na Facebook

Tanga igitekerezo