Emmanuel Ngama ntiyumva impamvu Okoko atamukinisha muri Mukura

Yanditswe na Admin ku wa 05.03.2016 saa 00:05 | Yasuwe : 1,318

Rutahizamu mushya wa Mukura Emmanuel Ngama, ntiyumva impamvu atagirirwa icyizere cyo kuza mu bakinnyi 18 bakinira iyi kipe kuva yagurwa muri Mutarama 2016.

Ni nyuma y’uko abatari bake bibajije impamvu yatumye uyu rutahizamu wanditswe cyane mu itangazamakuru avuye mu ikipe ya Tusker nk’igihangange atagaragara n’ubu mu bakinnyi b’iyi kipe barimo kuyikinira.

Umwe mu bari hafi y’ikipe ya Mukura yatangaje ko Ngama yasanze hari abanyamahanga batatu (Ndayishimiye Christophe, Cyiza Hussein na Hakizimana Alimansi) bafite umwanya uhoraho ku buryo bigoye kuzajya mu bakinnyi 18 bitabira umukino.

Rutahizamu wa Mukura Ngama Emmanuel wibaza impamvu atarimo akina muri Mukura

Ngama umaze imikino itanu ataza mu bakinnyi 18 ba Mukura yavuze ko nta mpamvu n’imwe azi zituma atagirirwa icyizere.Ati “Nta munsi n’umwe umutoza wanjye yari yansobanurira igituma ntakina. Nta na rimwe arambwira ngo ufite iki kibazo”.

Ngama yavuze ko afite ubushobozi bwo gukina imyanya myinshi mu kibuga ku buryo atabura umwanya akinaho. Ati ” Byose ni gahunda y’umutoza, nshobora gukina mu busatirizi no hagati, njye sinshobora kubura umwanya. Byose ni akazi k’umutoza”.

N’ubwo ataragirirwa icyizere, Ngama yishimira ko bagenzi be babona intsinzi; akanemeza ko nta kibazo afitanye n’ubuyobozi bwa Mukura kuko bwamuhaye amafaranga ye yose yo kumugura.

Umutoza wa Mukura, Okoko avuga ko kutabanza Ngama nta kibazo kirimo, cyane ko umwicaza atanga umusaruro. Ati “Kwitoza ni kimwe no gukina ni ikindi. Akazi kacu ni ukureba uko umukinnyi yitwara tukabona kumugirira icyizere. Muri Mukura harimo guhangana kuva ku munyezamu, nta muntu uvuga ngo sinzakina ngo Mukura igire ibibazo“.

Mukura ifite abanyamahanga batanu, barimo Hakizimana Alimansi, ba rutahizamu Amani Mugisho (RDC), Cyiza Mugabo Hussein, Ngama Emmanuel na Ndayishimiye Christophe bakomoka i Burundi kandi ikipe yemerewe abanyamahanga 3 ku mukino.

Tanga igitekerezo na Facebook

Tanga igitekerezo