Dylan na Samuel bageze mu mwiherero w’Amavubi U20 bakora imyitozo ya mbere

Yanditswe na Rwanda Football ku wa 11.04.2018 saa 15:09 |

Ku munsi wa kabiri w’imyitozo y’ikipe y’igihugu y’abatarengeje imyaka 20 abakinnyi bose bahamagawe bakina hanze y’u Rwanda bagaragaye muri iyi myitozo n’ubwo babiri baturutse mu Bubiligi batakoranye n’abandi bitewe n’ikibazo cy’umunaniro.

Ku munsi w’ejo hashize ku wa Kabiri tariki ya 10 Mata 2018 nibwo umwiherero w’ikipe y’igihugu y’abatarengeje imyaka 20 watangiye bakaba barahise bakora n’imyitozo ya mbere mu rwego rwo kwitegura Kenya mu mukino wo kwishyura wo gushaka itike y’igikombe cy’Afurika cy’abatarengeje imyaka 20 kizabera muri Niger mu 2019. Umukino ubanza amakipe yombi yanganyije 1-1.

Mu myitozo yabaye ku munsi w’ejo umukinnyi Mugabo Tumwine Azeedi ukinira ikipe ya BIDCO Bul y’abato muri Uganda yayikoranye n’abandi, ni myitozo kandi itaragaragayemo abakinnyi nka Byiringiro Lague ukiri kumwe na APR FC ndetse na Buregeya Prince ufite akabazo k’imvune.

Mu rukerera rwo kuri uyu wa gatatu tariki ya 11 Mata 2018 nibwo abakinnyi babiri bahamagawe bakina mu gihugu cy’u Bubiligi ari bo Dylan Maes w’ikipe ya Waasland Beveren y’abatarengeje imyaka 18 na Samuel Gueulette wa KAA Gent y’abatarengeje imyaka 19 bageze mu Rwanda aho banze kuguma kuri hoteli baruhuka bagahitamo kujya gukorana imyitozo n’abandi.

N’ubwo bagiye ku kibuga I Nyamirambo ahabereye imyitozo ntibakoranye imyitozo n’abandi kuko bakoze imyitozo micye yo kunanura imitsi gusa.

Mugabo Tumwine

Kapiteni w’iyi kipe Buregeya Prince ntiyakoranye imyitozo n’abandi kuko afite akabazo k’imvune yakuye muri Kenya ariko akaba azatangira gukorana n’abandi ku munsi w’ejo. Ni myitozo yari yiganjemo ibongerera imbaraga ndetse no gukora ku mupira.

Abahamagawe bose :

Abazamu: Cyuzuzo Gael (Unity Fc), Ntwari Fiacre (Intare Fc) and Iratugenera Edouard (Mukura VS)

Myugariro:Uwineza Aime Placide (SC Kiyovu), Songayingabo Shaffi (APR Fc), Buregeya Prince (APR Fc), Ndayishimiye Thierry (Marines Fc), Ishimwe Christian (Marines Fc), Nshimiyimana Marc Govin (Intare Fc), Hakizimana Felicien (Intare Fc), Niyigena Clement (Intare Fc), Nkubana Marc (Unity Fc) and Dylan Maes
(Waasland Beveren U-18).

Hagati: Nyilinkindi Saleh (APR Fc), Nshimyumuremyi Gilbert (Intare Fc), Bonane Janvier (SC Kiyovu), Ishimwe Saleh (Unity Fc), Byukusenge Yakuba (Intare Fc), Uwimana Emmanuel (Intare Fc), Mugabo Tumwine Azeedi (Bul Fc Junior team) and Samuel Gueulette (KAA Gent U-19).

Imbere: Sindambiwe Protais (INtare Fc), Cyitegetse Bogarde (Bugesera Fc), Byiringiro Lague (APR Fc), Tumusiime Aloysious (Intare Fc) and Mugisha Patrick (Marines Fc)

Amafoto :

Mugabo Tumwine
Yakoranye imyitozo n’abandi
Dylan na Samuel bakoze imyitozo yoroheje
Imyitozo yo kwitegura Kenya irakomeje
Tanga igitekerezo na Facebook

Tanga igitekerezo

Powered by Live Score & Live Score App