Djihad yagiye muri APR FC gusimbura Migi wageze muri AZAM FC

Yanditswe na Admin ku wa 10.07.2015 saa 17:11 | Yasuwe : 1,244

Bizimana Djihad  wari umukinnyi w’ikipe ya Rayon Sports ku mwanya wo hagati  yageze  mu ikipe ya APR FC aho yamaze gusinya amasezerano y’imyaka 2.

Djihad Bizimana wari umaze imyaka 2 avuye mu ikipe ya Etincelles  akajya muri Rayon Sports, yarangije kumvikana na APR izamuha miliyoni 6 z’amafaranga y’u Rwanda  n’ umushahara wa 400,000 Frw akazayikinira  mu gihe cy’imyaka 2.

Bizimana Djihad yari yarumvikanye na Rayon Sports mbere y’umukino wa nyuma w’ Igikombe cy’Amahoro kongera amasezerano y’ imyaka ibiri.Uyu mukinnyi w’ikipe y’igihugu yabanje gusaba ubuyobozi bwa Rayon Sports kubanza kugisha inama umuryango we harimo na nyirarume Niyonzima Haruna, kapiteni w’Amavubi, bamutegereza kuwa Kabiri ngo ashyire umukono ku masezerano baramubura.

Kuba Bizimana yasinya muri APR FC, iyi kipe ibonye ibyangombwa yamujyana muri CECAFA Kagame cup izatangira tariki ya 18 Nyakanga 2015 i Dar Es Salaam muri Tanzania.

migijihad

Djihad yageze muri APR gusimbura Migi watangiye imyitozo muri Azam

Kugeza ubu APR FC ntiramenya niba Migi watangiye imyitozo muri AZAM FC ashobora kubakinira, icyemezo iyi kipe yo muri  Tanzania ifata uyu munsi amaze gusinya amasezerano y’imyaka ibiri.

Bizimana Djihad yaba ageze ikirenge mu cya nyirarume Niyonzima Haruna wavuye muri Rayon Sports agasinya muri APR FC mbere yo kujya muri Yanga yo muri Tanzania mu 2011.

Naho umukinnyi warangije amasezerano muri APR FC, Mugiraneza Jean Baptiste bita Migi   yerekeje muri Tanzania kumvikana na Azam nyuma agasinya amasezerano yo kuyikinira umwaka utaha. Ni nyuma y’imyaka umunani Mugiraneza  amaze akinira ikipe ya APR FC.

migiazam

Migi akaba yahise atangira imyitozo muri iyo kipe yo muri Tanzaniya

Uretse Migi na Emery Bayisenge bari kumushakira ibyangombwa bya nyuma  kugirango ajye kugeragereza amahirwe muri Autriche.Emery atangaza ko ubuyobozi buri kumufasha ibishoboka byose kugira ngo ajye kugerageza amahirwe ndetse bishobotse ku cyumweru  tariki ya  12 Nyakanga uyu mwaka azagenda.

Ibi bije nyuma y’aho umuvugizi wa APR Gatete George umuvugizi w’ikipe ya APR FC avuga ko ibyo kugenda kwa Emery batabizi nk’ubuyobozi bw’ikipe ya APR ariko ngo n’iyo byaba bihari bikwiye guca mu biganiro bagirana.

Tanga igitekerezo na Facebook

Tanga igitekerezo