Djihad aratangaza ko azaguma muri Rayon Sports

Yanditswe na Admin ku wa 08.06.2015 saa 23:04 | Yasuwe : 1,137

Umukinnyi ukina hagati mu ikipe ya Rayon Sports akanaba n’umukinnyi w’ikipe y’igihugu Amavubi  Bizimana Djihad yavuze ko yifuza gukomeza gukina muri Rayon Sports anahakana amakuru avuga ko Nyirarume Niyonzima Haruna yaba ari kumushakira ikipe muri Tanzaniya.

Uyu musore ukomoka ku Gisenyi mu Karere ka Rubavu ni umwe mu bakinnnyi muri iyi minsi bari kwitwara neza mu kibuga hagati, ibi bikemezwa n’uko ubu nta kipe y’igihugu ihamagarwa atayirimo.

Uyu musore kandi mu ikipe ya Rayon Sports ari mu bakinnyi umutoza Kayiranga yemeza ko bari kumufasha ndetse banafite ikinyabupfura cyinshi.

djihad

Nubwo akomeje gushimisha abantu benshi cyane cyane abafana ba Rayon Sports, uyu musore ari mu bakinnyi barangije amasezerano muri iyi kipe y’i Nyanza. Ibi bivuze ko atongerewe amasezerano umwaka utaha atakinira Rayon Sports. Djihad yatangaje  ko nta yindi kipe yumva ashaka gukinira igihe cyose Rayon Sports yaba ikimushaka ndetse anemeza ko yatangiye ibiganiro nayo nubwo ngo ntacyo birageraho.

Yagize ati :”Ku bwange ndumva naguma muri Rayon Sports bitewe n’uko meze numva meze neza , ndakina sinakwihutira guhita mpindura ikipe ngo njye ahandi kandi hari aho bimeze neza kandi ntekereza ko atari habi. Twatangiye ibiganiro ariko nta kintu kizima turageraho, hagize andi makipe anganiriza byaterwa na Rayon Sports kuko njyewe ku bwange ndifuza kuyigumamo.”

Abajijwe niba amakuru avugwa ko Nyirarume Haruna Niyonzima akaba na Kapitenei w’ikipe y’igihugu ari kumushakira ikipe akinamo muri Tanzaniya ariyo, uyu musore yasubije mu magambo make ati :”Ayo makuru ntayo nzi nta n’ariho.”

Bizimana Djihad amaze imyaka 2 akinira ikipe ya Rayon Sports aho yaje azanywe n’umutoza w’Umufaransa wahoze atoze Rayon Sports, Didier Gomez da Roza akaba yaraje avuye mu ikipe ya Etincelles.

Tanga igitekerezo na Facebook

Tanga igitekerezo