Didier Gomes Da Rosa yatangije igikorwa cyo gufasha Rayon

Uwahoze ari umutoza w’ikipe ya Rayon Sport Didier Gomes Da Rosa yatangije igikorwa cyo gufasha ikipe yahozemo aho yatanze angana n’amadolari 500 ahwanye n’ibihumbi 350 by’amafaranga y’u Rwanda.

Nkuko ubutumwa burebure buri mu rurimi rw’ikinyarwanda bugaragara ku rukuta rwe rwa Facebook rubivuga ahamya ko hatariho ikipe ya Rayon Sports umupira wo mu Rwanda nawo waba urimo ucumbagira.

Ubutumwa bw’umutoza Didier Gomes Da Rosa bukubiye mucyo yise KUGOBOKA RAYON bugira buti:” Hatarimo Rayon, umupira w’amaguru mu Rwanda nta gaciro kanini wagira. Rayon ifite uruhare runini mu kumenyekanisha iyi sport mu Rwanda: ni club izwi kandi ikunzwe kurusha izindi, ihuruza abantu benshi baba bifuza kuyireba.

gomes1

Mu mutwe wanjye, sinshobora gutekereza na gato ko championnat y’icyiciro cya mbere mu Rwanda yabaho nta GIKUNDIRO yanjye, nta Mukura Victory Sport, nta Kiyovu, Clubs eshatu zifite amateka akomeye kandi zizwiho guteza imbere umupira w’amaguru mu Rwanda! Tugoboke Rayon, Club izwiho kuba indashyikirwa mu gukundwa n’abanyarwanda benshi!”

Uyu mutoza wakoze amateka akomeye mu Rwanda aho ariwe wahesheje iyi kipe igikombe nyuma y’igihe kinini amaso y’aba Rayon yaraheze mu kirere ahamya ko akunda iyi kipe ndetse ko kuri we ari nk’umuryango.

Yakomeje agira ati:” Rayon ni umuryango wanjye. Ndayikunda ku buryo ntashobora kwemera kuyibona igenda izimira. Ku bw’ibyo, ndagerageza guhwiturira abantu bose barangwa n’ubushake ngo bayifashe. Kuva ejo mu gitondo, niyemeje gutanga chèque y’amadolari maganatanu (500 US dollars), nkayoherereza abayobozi ba Rayon, nizera ko iki gikorwa kizagera no ku bandi, uhereye ku bayobozi ubwabo. Aho bigeze ubu, ikihutirwa cyane ni ugukora kuruta kuvuga. Rayon Sport iradukeneye twese, natwe tuyereke ko tuyikunda, ko tuyitayeho. Iyi niyo nzira rukumbi yakoreshwa ngo twizere ahazaza harushijeho kuba heza.”

Gomes yatoje Rayon Sports mu mwaka wa 2013 ndetse abasha no kuyihesha igikombe cya Shampiyona iyi kipe yari imaze imyaka 7 idakozaho imitwe y’intoki. Yaje kuva muri iyi kipe yerekeza mu gihugu cya Cameroon mu ikipe ya Coton Sport, ikipe nayo akomeje kugiriramo ibihe byiza.

Ikipe ya Rayon Sports iherutse gukurwaho amanota atatu bitegetswe n’ishyirahamwe ry’umupira w’amaguru ku isi FIFA kubera kunanirwa kwishyura umwenda ibereyemo umutoza Raoul Shungu.

Uyu mwenda bivugwa ko ari uwo mu mwaka wa 2008 aho umutoza Raoul Shungu yakoresheje amafaranga ye mu kugura ibikoresho bitandukanye birimo imyenda y’imyitozo n’ibindi.

Tanga igitekerezo na Facebook

Tanga igitekerezo