Didier Gomes Da Rosa yaba agiye kugaruka muri Rayon Sports ?

Yanditswe na Admin ku wa 05.08.2015 saa 10:18 | Yasuwe : 1,279

Nyuma yo gutorerwa kuyobora ikipe ya Rayon Sport, Perezida mushya  Denis Gacinya mubyo yavuze ko azahita akora vuba harimo kuzana umutoza mushya atahise avuga amazina ariko avuga ko ari umwe mu batoza bakunzwehano mu Rwanda

Amakuru atugeraho aturuka mu bantu baba hafi Rayon Sports  aremeza ko uwo mutoza ari  Didier Gomes da Rosa  ugiye kugaruka vuba gutoza iyi kipe y’i Nyanza.

Gomes da Rosa yavuye muri Rayon muri Mutarama 2014 kubera ikibazo cy’amikoro iyi kipe yari ifite bigatuma itari igishoboye kumuhemba uko bikwiye. Yatandukanye neza n’iyi kipe agaragaza ko ayikunze yerekeza muri Coton Sport de Garoua  muri Cameroun aho aherutse gutwara igikombe cya shampionat n’igikombe cy’igihugu.

Amakuru atugeraho aremeza ko ubu Didier Gomes da Rosa agomba kugera mu Rwanda mbere ya tariki 15 z’uku kwezi agasimbura Kayiranga Baptiste wari umutoza mukuru w’iyi kipe.

gomesnew

Ubuyobozi bwa Rayon Sports ntacyo buratangaza kuri aya makuru asa n’akigizwe ibanga. Gusa ubu buyobozi ngo bwamaze kumvikana by’ibanze n’uyu mutoza w’umufaransa w’imyaka 46.

Gomes afatwa nk’umutoza wagaragaje gukunda cyane Rayon Sports kandi wayikozemo ikintu gikomeye ubwo yayiheshaga igikombe cya shampionat ya 2013, igikombe yaherukaga mu myaka icyenda yari ishize.

Nyuma yo kwegukana igikombe cya shampionat muri Cameroun yatangaje ko yavukiye muri Rayon agakurira muri Coton Sports. Ndetse avuga ko iyo kipe y’i Nyanza ayikunda kandi imuhora ku mutima.

gomes1

Didier Gomes da Rosa akunzwe cyane n’abafana ba Rayon Sports

Biteganyijwe ko shampionat nshya ya 2015-2016 izatangira kuwa 18 Nzeri 2015. Didier Gomes akaba aza muri uku kwezi gutangiza imyitozo iyi kipe y’i Nyanza ngo yitegure guhatana.

Shampionat ishize Rayon Sports yafashe umwanya wa gatanu, umwanya utarishimiwe n’abafana bayo. Rayon ni ikipe kandi yatakaje benshi mu bakinnyi bari inkingi zayo ku gihe Gomes yari ayifite.

Tanga igitekerezo na Facebook

Tanga igitekerezo