D2 : Bugesera Fc yatangiye yitwara neza mu mikino ya 1/2

Yanditswe na Admin ku wa 09.07.2015 saa 14:22 | Yasuwe : 895

Ikipe ya Bugesera Fc irahabwa amahirwe yo kujya mu cyiciro cya mbere nyuma yo gutsinda ibitego 2-0 As Muhanga muri ½ mu mukino ubanza wabereye i Muhanga kuri uyu wa gatatu tariki ya 8 Nyakanga 2015.

Ikipe ya Bugesera Fc izakina umukino wo kwishyura kuwa gatandatu ku kibuga cya Eto Nyamata isabwa nibura kunganya kugirango igere ku nzozi zo kuba yakina muri shampiyona y’icyiciro cya mbere umwaka utaha.

bugesera

Umukinnyi watsinze ibitego bya Bugesera ni Ndikumana Ali watsinze igitego cya mbere ku munota wa 51 w’igice cya kabiri , igitego cya kabiri ku munota wa 59 w’igice cya kabiri cy’umukino.

Umutoza w’ikipe ya Bugesera Sazinga Noel avuga ko iyi ari intambwe ya mbere bateye kandi biteguye no gutsinda umukino wo kwishyura ari nawo uzabaha itike yo kuzamuka muri shampiyona y’icyiciro cya mbere umwaka utaha.

Yagize ati “urugendo ntirurarangira ariko dufite icyizere cyo gutsinda umukino wo kwishyura nubwo tutawutsinda tukanganya bizaba bihagije”.Akomeza avuga ko byari bigoye gutsindira hanze kuko ikipe iyo ikinira imbere y’abafana bayo iba ifite imbaraga zidasanzwe.

Rutayisire umutoza w’ikipe ya As Muhanga avuga ko uyu mukino utabashimishije kuko abasifuzi batabasifuriye neza.

Yagize ati “umukino ugitangira twagerageje gukina neza, ariko igice cya kabiri gitangiye abasifuzi badusifuriye nabi ku buryo abakinnyi bacu batanu babonye amakarita y’umuhondo ku mukosa adakwiriye guhanishwa amakarita”.

Avuga ko uyu wari wo mwaka wa mbere aba bakinnyi ba As Muhanga bakinnye shampiyona kuva Minispoc ndetse na Ferwafa bemeje ko amakipe agomba gukinisha abakinnyi bari munsi y’imyaka 20.Undi mukino wahuje Rwamagana Fc na Sorwathe Fc warangiye amakipe yombi anganyije igitego 1-1 ku kibuga cy’I Rwamagana.

Amakipe azageraku mukino wanyuma azabona itike yo gukina mu cyiciro cya mbere mu mwaka utaha w’imikino 2015/2016, asimbuye ikipe ya Etincelles n’Isonga zasoje mu myanya ibiri ya nyuma muri shampiyona y’icyiciro cya mbere uyu mwaka.

Imikino Ibanza
Kuwa Gatatu, 08/07/2015

AS Muhanga 0-2 Bugesera Fc
Rwamagana Fc 1-1 Sorwathe Fc

Imikino yo Kwishyura
kuwa Gatandatu, 11/07/2015

Bugesera Fc vs AS Muhanga (Eto Nyamata, 14.30)
Sorwathe Fc vs Rwamagana Fc (Kinihira, 14.30)

Tanga igitekerezo na Facebook

Tanga igitekerezo