Rayon sports yateye intambwe igana 1/8 inyagira Costa de Sol-Amafoto

Yanditswe na Rwanda Football ku wa 06.04.2018 saa 23:02 |

Kuri uyu wa gatanu tariki 6 Mata 2018 nibwo Rayon sports yateye ikirenge kimwe muri 1/8 cy’igikombe gihuza amakipe yatwaye ibikombe iwayo ‘CAF Confederation Cup 2018’.

Ni mu mukino wabaye mumvura ariko itahagaritse umukino wahuje iyi kipe yatwaye igikombe cya shampiyona y’u Rwanda y’umwaka w’imikino ishize, na Clube de Desportos da Costa do Sol yatwaye igikombe cy’igihugu muri Mozambique.

Rayon sports yari imbere y’abafana bayo ntiyabatengushye muri iyo mvura kuko yatangiye umukino ishaka ibitego by’impamba yabafasha kugera mu cyiciro gikurikiraho. Byayihiriye ku munota wa 43 ubwo Manishimwe Djabel wari umaze ukwezi adakina kubera imvune yazamukanaga umupira awuha rutahizamu rukumbi wari mu kibuga Shaban Hussein Tchabalala atera mu izamu ariko ugarurwa n’akaboko ka myugariro w’umunya-Mozambique Jone Feliciano umusifuzi ahita yemeza ko ari penaliti yinjijwe na Tchabalala.

Igice cya mbere kirangiye bamwe mu bakinnyi na Team Manager wa Costa Do Sol Arturo Faria batari bishimiye icyi cyemezo bihutiye ku musifuzi benshi bakeka ko bagiye kumusagarira ariko abashinzwe umutekano barabakiza. Byatumye uyu Team Manager avanwa ku ntebe y’abatoza ajya mu bafana.

Mu gice cya kabiri Rayon yagarukanye intego yo gukomeza gusatira. Umutoza Ivan Jacky Minnaert yakoze impinduka Muhire Kevin asimbura Manishimwe Djabel naho Ismaila Diarra asimbura Yassin Mugume. Byatanze umusaruro kuko ku munota wa 77 yatsinze igitego cya kabiri cya Muhire Kevin warobye umunyezamu Jose Ventura Guirrugo .

Nyuma y’iminota ibiri gusa Rayon yahawe ikarita itukura yeretswe Kwizera Pierrot wakoze amakosa menshi hagati mu kibuga. Ariko ntibyahinduye umuvuduko w’umukino ikipe ye yakoreshaga kuko yahise inabona igitego cya gatatu ku munota wa 83 kinjijwe na Tchabalala ku mupira ahawe na Muhire Kevin.

Umukino wo kwishyura uteganyijwe tariki 17 Mata 2018 i Maputo muri Mozambique.

Abakinnyi babanjemo ku mpande zombi.

Rayon Sports: Bakame,Nyandwi Saddam, Faustin Usengimana, Manzi Thierry, Rutanga Eric,Ange Mutsinzi, Yannick Mukunzi, Kwizera Pierrot, Hussein Shaban “Tchabalala”,Djabel Imanishimwe, Yassin Mugume.

Clube Desportivo Costa Do Sol: Ventura Guirrugo, Miocha, Feliciano Jone, Nelson Divrassone, Chawanangwa Kaonga, Mathiew Sibale, Isaac Decarvalho, Jorge Muholove, Nilton Ernesto, Agero Jonasse ,Salomao Mondlane.

Mu mukino wo kwishyura uzabera i Maputo muri Mozambique Rayon Sports niramuka yihagazeho ntiyishyurwe ibitego yatsinze izahita ikatisha kujya mu matsinda ya CAF Confederation cup aho izaba ikipe ya mbere yo mu Rwanda igeze muri iki cyiciro.

Amafoto :

 

Tanga igitekerezo na Facebook

Tanga igitekerezo

Powered by Live Score & Live Score App