CHAN Rwanda 2016-Minisitiri Uwacu yasuye sitade z’i Nyamirambo

Yanditswe na Rwanda Football ku wa 09.07.2015 saa 13:07 | Yasuwe : 1,417

Guhera tariki ya 16 Mutarama 2015 kugeza ku ya 07 Gashyantare 2015,mMu Rwandahazabera imikino ya Afurika ikinwa n’abakinnyi bakina imbere mu gihugu “CHAN 2016”.

Mu rwego rwo kureba no gukurikirana aho imyiteguro igeze, ku wa gatatu tariki ya 08 Nyakanga 2015, Minisitiri wa Siporo n’Umuco, UWACU Julienne, yasuye stade ya Kigali iri i Nyamirambo anasura n’ikibuga cy’imyitozo cya Mumena.

Minisitiri yatambagijwe ibice bitandukanye bigize iyi stade asobanurirwa aho imirimo igeze ndetse banamubwira ibisigaye gukorwa kugira ngo imirimo irangire.

Minisitiri Uwacu Julienne yijejwe ko imirimo yo kubaka no gusana stade n’ikibuga cy’imyitozo igenda neza, ikaba izarangirira ku gihe cyagenwe. Minisitiri yishimiye aho imirimo yo kubaka no gusana igeze, gusa akaba yasabye ba rwiyemezamirimo gukora cyane kugira ngo igihe cyagenwe kizubahirizwe.

IMG_20150708_170434

Kugeza ubu byinshi mubyari biteganyijwe gukorwa biri hafi kurangira, ahazaterekwa tapis iri mu nzira haratunganyijwe, kuri vestiaire imirimo iri hafi kurangira kuko hasigaye gukora igisenge no gusakara.

Parking ya VIP nayo iri gukorwa neza, kubijyanye no gusiga irangi, rwiyemezamirimo yatangaje ko irangi bazarishyiraho imirimo yose irangiye kuko ngo baramutse barishyizeho ubu kandi hakirimo imirimo irimo ibitaka bishobora gutuma ryandura.

Imikino ya CHAN izabera kuri stade enye arizo: stade Amahoro, Stade ya Kigali iri i Nyamirambo, Stade ya Huye na Stade ya Rubavu.
Kubijyanye n’ibibuga by’imyitozo bifite urucaca rw’uruterano ( Natural grass) hari ikibuga kiri hafi ya FERWAFA n’ ikibuga kiri muri KIST bizunganira Stade Amahoro. Hari n’ibibuga bifite urucaca rw’urukorano ( Artificial turf) nk’ibya FERWAFA, Mumena, Kicukiro, Kamena i Huye n’ikibuga kiri hafi ya Stade ya Rubavu.

Imikino ya CHAN yakinwe ku nshuro ya mbere mu mwaka wa 2009, ikinirwa mu gihugu cya Côte d’Ivoire cyegukanwa ku nshuro ya mbere na Repubulika Iharanira Demokarasi ya Congo, umwaka ushize wa 2014 iyi mikino yabereye muri Afurika y’Epfo, igikombe cyatwawe na Libya itsinze Ghana kuri Penaliti 4 kuri 3.

Tanga igitekerezo na Facebook

Tanga igitekerezo