CHAN 2016- Sitade Huye ntirarangira

Yanditswe na Admin ku wa 20.05.2015 saa 12:01 | Yasuwe : 947

Inzobere za CAF zikomeje kuzenguruka imijyi izakira igikombe cya Afurika gikinwa n’abakinnyi bakina imbere mu gihugu, aho nyuma yo gusura Rubavu, kuri uyu wa mbere tariki ya 19/5/2015 basuraga umujyi wa Huye.

Imirimo yo kubaka Stade Huye imaze iminsi igaragaza ibibazo, aho abakozi bakora iyi stade bamaze ukwezi n’igice badakora nkuko amakuru ava i Huye abitangaza. Kugeza ubu, ibikorwa birmo Running Track,Amatara ,Kubaka Parking ,ndetse no kubaka ibindi bibuga ntabwo biratangira mu gihe imirimo yo kubaka ikibuga cy’imyitozo cya Kamena na yo ari bwo igitangira.

Ku bijyanye n’amahoteli Huye biragaragara ko naho hari hotel imwe isa nk’iri kurwego mpuzamahanga aho bigoranye kugirango hazabe habonetse izindi mbere y’ukwezi kwa cumi.

Mu byo inzobere za CAF zasabye Ferwafa kuri stade Huye, harimo ko bareba uburyo abantu bashyira intebe muri iyi stade cyane ko idashaka ko abantu bazicara kuri sima kuko bitari ku rwego mpuzamahanga. Ibi, ngo bishobora gutuma imyanya yari yabazwe muri iyi stade igabanuka.

stadehuye

Izi nzobere zikaba zatangarije itangazamakuru ko mu mijyi ibiri bamaze gusura hari inzitizi zimwe na zimwe bagiye babona hombi, gusa ko bizeye ko bizaba byarangiye mu gihe bihaye kandi ko irushanwa rizagenda neza nkuko u Rwanda rwagiye rubigaragaza mu marushanwa yabanje.

Ku kibazo cyuko muri iyi mikino ya CHAN abafana bashobora kubura nkuko byagenze muri shampiyona, Perezida wa Ferwafa Nzamwita Vincent De Gaulle, yatangaje ko ibi byose biterwa n’itangazamakuru ryo mu Rwanda.

“Ikibazo gikomeye ni itangazamakuru. Ni ryo ryagakwiye kuzana abafana, ariko bisa nkaho itangazamakuru ribaca intege”.

“Twibaza impamvu itangazamakuru rimwe na rimwe tuba tubanye neza ubundi bikaba bibi kandi ntakibazo na kimwe twe tuba tubona dufite”.

“Twagiriwe inama yo kuzakora lisiti y’abanyamakuru tukabakura mu mujyi wa Kigali nk’iminsi itatu bagakora amahugurwa ku buryo bamenya uruhare rwabo muri CHAN kuko abafana batazaza abanyamakuru batabigizemo uruhare”.

Tuzazana abanyamakuru(mu mwiherero) bavuga amakuru agamije kubaka gusa. Ntabwo tuzazana uvuga De Gaulle kuva mu gitondo kugeza nimugoroba.

Inzobere za CAF kuri ubu ziri kubarizwa mu mujyi wa Kigali, ahateganyijwe gusura ibibuga bya Nyamirambo na stade Amahoro.

Tanga igitekerezo na Facebook

Tanga igitekerezo