CHAN 2016: impuguke za CAF zishimiye aho imyiteguro igeze

Yanditswe na Admin ku wa 22.05.2015 saa 14:36 | Yasuwe : 710

Itsinda ry’impuguke z’impuzamashyirahamwe y’umupira w’amaguru muri Afurika “CAF” zari zimaze iminsi mu Rwanda aho zasuye  ibirimo gukorwa mu kwitegura imikino ya CHAN 2016 izabera mu Rwanda kuva taliki 16 Mutarana  kugeza 07 Gashyantare 2016. Binyam Junior, umuyobozi muri CAF ushinzwe  itangazamakuru yatangaje ko basanze imyiteguro irimo kugenda neza.

Nyuma yo gusura imijyi 3 izakira imikino ya CHAN 2016, Binyam Junior yangaje ko  nta mpugenge zihari ku bijyanye n’imyiteguro kuko babonye byose biri mu nzira nziza. Yakomeje avuga ko abashinzwe gutunganya ibi bikorwa bemeje ko mu kwezi k’Ukwakira 2015  byose bizaba byarangiye. Yagize ati “CAF yemerera u Rwanda kwakira iyi mikino nta ngingimira bari bafite ko rutazabishobora”. Avuga ko hari ibyo basanze bigomba kunozwa  ariko bizeye ko igihe cyagenwe kizagera byose biri ku murongo.

Impuguke-za-CAF

Umuyobozi wa Siporo muri MINISPOC, Bugingo Emmanuel  akaba Perezida wungirije ndetse n’umuvugizi  wa komite itegura  CHAN 2016,  yatangaje ko  izi mpuguke zasuye Rubavu, Huye na Kigali aho basuye amasitade, ahazabera imyitozo ndetse n’amahoteli azacumbikira abakinnyi.

Ubwo izi mpuguke zasuraga Sitade ya Rubavu  hagaragaye ikibazo cy’imyanya mike  iyi sitade ifite nyamara yabarirwaga imyanya myinshi. Aho bivugwa ko yakira ibihumbi 4 nyamara yarabarirwaga ibihumbi 7. Aha Bugingo yavuze ko ibyo byabaye ariko ko izi mpuguke icyo zireba ari ikibuga abakinnyi bakiniraho, urwambariro, aho abanyamakuru bakorera ko iby’imyanya biterwa n’ubushobozi bw’igihugu. Bugingo Emmanuel akaba ashimangira ko igihe  bihaye bizagera imyiteguro yarangiye.

Izi mpuguke zizagaruka mu Rwanda muri Nzeli 2015, Bugingo Emmanuel yavuze ko nta mpungenge bafite kuko abahawe isoko ryo kubaka ari bo bemeye ko mu Ukwakira 2015 bizaba birangiye. Akomeza avuga ko  kuba  bagaruka muri Nzeli 2015 nta kibazo kirimo . Yagize ati  “Bazaba bareba aho imyiteguro igeze  cyeretse uko babisize ariko babisanze ariko  ndumva bizaba birimo kurangira”.

Tanga igitekerezo na Facebook

Tanga igitekerezo