CHAN 2016: Haracyari ibigomba gukorwa ku bibuga bizakinirwaho

Yanditswe na Rwanda Football ku wa 20.05.2015 saa 07:27 | Yasuwe : 1,040

Nyuma yo gusura Sitade ya Rubavu ndetse na Huye zimwe mu zizakira imikino ya CHAN 2016, impuguke za CAF zasanze hari bimwe bigomba gukorwa kugira ngo aya masitade azabe ari ku rwego rwo kwakira iyi mikino.

Izi mpuguke za CAF zageza mu Rwanda, taliki 17 Gicurasi 2015, ku munsi wa mbere, taliki 18 Gicurasi 2015  zasuye Sitade ya Rubavu aho basanze iyi sitade ibarirwa imyanya idafite  ku buryo basabye ko yakongerwa ikava ku bihumbi 4 ikagera ku bihumbi 7 na 500.

Umunsi wa kabiri, ejo hashize taliki 19 Gicurasi 2015 basuye umujyi wa Huye, bareba Sitade ya Huye igeze mu cyiciro cya 3 ari nacyo cya nyuma  aho kizibanda ku kuyishyira ku rwego mpuzamahanga harimo gushyiramo amatara manini, ibyuma byerekana amashusho no gutunganya aho baparika  imodoka.

CAFstadehuye

Gusa izi mpuguke za CAF zasabye ko muri sitade bashyiramo udutebe  kugira ngo abantu ntibazajye bicara ku isima. Izi mpuguke zishimiye aho umujyi wa Huye ugeze witegura  kwakira iyi mikino  ariko basaba ko imirimo isigaye yakwihutishwa ikarangira bitarenze muri Nzeli 2015. Umunyamabanga uhoraho muri MINISOC, Kalisa Edward akaba yavuze ko ibyo basabwe bagiye kureba uko babyihutisha.

Uyu munsi taliki 20 Gicurasi 2015, izi mpuguke za CAF zirasura ibikorwa  biri mu mujyi wa Kigali  birimo Sitade ya Kigali-Nyamirambo  ndetse na Sitade Amahoro  nazo zizakira imikino ya CHAN 2016.

Nk’uko tubikesha FERWAFA, itsinda ry’izi mpuguke  ziri mu Rwanda aho zizamara iminsi 5 mu rwego rwo kureba aho imyiteguro igeze ya CHAN 2016, rigizwe na Shereen Arafa (Umuyobozi ushinzwe amarushanwa muri CAF), Tarek El Deeb (Umuyobozi ushinzwe ikoranabuhanga muri CAF), Salomon Binyam (Umuyobozi ushinzwe itangazamakuru muri CAF) na Iman Said (Umuyobozi ushinzwe kwamamaza no kumenyekanisha ibikorwa muri CAF).

Imikino ya CHAN 2016 izabera mu Rwanda kuva  taliki 16 Mutarama kugeza 07 Gashyantare 2016.

Tanga igitekerezo na Facebook

Tanga igitekerezo