Cecafa: Rayon Sports yatsinze umukino wa kabiri

Yanditswe na Admin ku wa 10.08.2014 saa 22:53 | Yasuwe : 773

Ku mukino wayo wa kabiri muri Cecafa Kagame Cup Rayon Sports ibonye itsinzi imbere ya Adama FC yo muri Ethiopia ku bitego 2-1 .

Ibitego 2 bya Rayon Sports byose byatsinzwe na Rutahizamu Kambale Salita Gentil (Papy Kamanzi) ku mupira yombi yari ahawe na myugariro Nizigiyimana Kalim Makenzi naho igitego cya Adama FC cyatsinzwe na Desaleny Debesh.

Nkuko abakunzi benshi ba Rayon Sports bagiye babivuga nyuma y’umukino wa mbere ikipe yabo yanganirijemo na Azam 0-0, ikipe yabo yari nziza gusa abakinnyi bari bataramenyerana neza .

Uyu munsi rero impinduka zagaragaraga kuko abakinnyi wabonaga bakurikije amabwiriza y’umutoza Jean Francois Losciuto. Uyu mutoza atangaza ko gutsinda uwo mukino bibahaye imbaraga zo kwegera muri ¼, ariko hakaba hakibura ibindi. 

Mu ntangiriro z’umukino rutahizamu Yossam Bertrand yahushije uburyo bubiri bwari bwabazwe nyuma ku munota wa 15, Yossam yahawe umupira na Makenzi awuteye  ugarurwa n’umutambiko w’izamu.

Ku munota wa 44, Yossam na none  yongeye kubona ubundi buryo bwiza, maze ishoti yari ateye  rigarurwa na myugariro Wonooson Milkesa, ubwo hari mbere gato ko amakipe yombi yerekeza mu kiruhuko.

Mu gice cya kabiri umutoza Jean Francois Luscuito wa Rayon yavanyemo Leon Uwambazimana yinjiza  Kambale Salita Gentil naho  Sekle Yao Zico afata umwanya wa  Mutombo Govin.

Izo mpinduka zahise zitanga umusaruro  kuko ku munota wa 58 Kambale Salita yatsinze igitego cya mbere kuri korineri yari itewe na Makenzi  ubwo abafana bose bahita bahagaruka.

Rayon Sports yakomeje gusatira Adama City Fc maze ku munota wa 79 Kambale yongezamo  icya kabiri ku mupira wari utewe na none na Makenzi.

Adam City nayo yinyaye mu isunzu kuko ku munota wa 90 Wonooson Milkesa yayiboneye igitego biturutse ku ikosa rya Serugendo Arafat .

Ubu Rayon Sports iranganya amanota atatu n’ikipe ya Azam gusa iyi kipe yo muri Tanzania irarusha Rayon Sports umubare w’ibitego bimaze gutsindwa.

cafa14rayadama0
Ashenafi Bekele umutoza wa Adama FC atangaza ko umukino wari mwiza.Bekele avuga ko ikipe yabo yegukanye igikombe cya shampiyona cy’icyiciro cya kabiri, bityo kwitabira CECAFA Kagame Cup byabashimishije.

Muri uyu mukino Ndayisenga Faudi kapiteni  wa Rayon Sports niwe ubaye umukinnyi w’umukino (Homme du match).Ndayisenga Faudi atangaza ko yumva yishimye cyane, kandi yishimye kuba batahanye intsinzi kuri uyu munsi.

Kuri iki cyumweru tariki ya 10 Kanama 2014, Telecom yo muri Djibouti itsinze KCCA ibitego 2-1 naho Azam FC itsinda KMKM 4-0.

Kuri uyu mbere tariki ya 11 Kanama 2014 kuri Sitade Amahoro i Remera, Benadir irakina na El Merreikh sa saba zuzuye, Gor Mahia ikine na Atletico saa cyenda naho Vital’O ikine Police FC saa kumi n’imwe.

Tanga igitekerezo na Facebook

Tanga igitekerezo