Cecafa : Police yageze muri kimwe cya kane

Yanditswe na Rwanda Football ku wa 11.08.2014 saa 23:31 | Yasuwe : 991

Imwe mu makipe ahagarariye u Rwanda ariyo  Police  FC imaze gukatisha itike yo gukina kimwe cya kane cy’irushanwa rya Cecafa Kagame Cup.

Ibyo yabigezeho imaze  gutsinda Vital’o y’i Burundi ari nayo ifite ikki gikombe ibitego 3-1 kuri uyu wa mbere kuri Stade ya Kigali.

Ibitego bya Jerome Sina, Jacques Tuyisenge na Jimmy Mbaraga byari bihagije kugirango ikipe itozwa n’umutoza Andre Cassa Mbungo igere muri kimwe cya kane cy’aya marushanwa.

Igitego cya mbere cyinjijwe na Sina Jerome  ku munota wa 30 ku mupra mwiza yari aherejwe  na Jacques Tuyisenge wacenze neza ba myugariro babiri ba Vital’o.

Abarundi nabo ntibyabaciye intege kuko nyuma y’iminota irindwi gusa ubwo hari ku munota wa 37, Shaban Hussein yishyuye  iki gitego n’umutwe.

cecafa14police1

Ku munota wa 44, Tuyisenge Jacques yahise abona igitego cya kabiri nawe yatsinze n’umutwe kuri koroneri yari itewe na Peter Kagabo, amakipe  yombi ahita ajya  kuruhuka Police Fc ifite ibitego 2-1.

Police yakomereje aho basatira ikipe ya Vital’o mu gice cya kabiri maze ku munota wa 69 Jimmy Mbaraga aza gushiramo igitego cya gatatu n’umutwe mwiza kuri kufura yari itewe na Mwemere Girinshuti.

Iyi tsinzi yatumye Police Fc iba ikipe ya mbere ibonye tike yo gukina imikino ya kimwe cya kane muri aya marushanwa nubwo bagifite umukino umwe uzabahuza na Banadir. Police iyoboye itsinda C n’amanota atandatu mu mikino ibiri.

Vital’O hamwe na El Merriekh ziranganya amanota atatu ariko Vital’O ifite iki gikombe iyirusha umubare w’ibitego.

El Merreikh yatsinzwe umukino wa mbere na Police, nayo yanyangiye Banadir yo muri Somalia ibitego 4-0. Ibi bitego byatsinzwe na Allan Wanga, Ahmed Elbasha, Serge Wawa na Mohamed Trorie.

Banadir imaze gutsindwa ibitego cyenda mu mikino ibiri, niyo yanyuma mu itsinda C na n’inota iifte.Ikipe izatsinda hagati ya Vital’O na El Merreikh kuri uyu wa gatanu izahita isanga Police muri kimwe cya kane.

Mu itsinda B, ikipe ya Gor Mahia yo muri Kenya yongeye gutsindwa umukino wayo wa kabiri n’ikipe ya Atletico yo mu Burundi ku gitego 1-0. Alexis Kitenge Hakizimana yahesheje Atletico itsinzi yabo yambere maze bisiga Gor Mahia ahantu habi aho ishobora gusezererwa itageze muri kimwe cya kane.

Kugirango Gor Mahia yizere gukomeza nuko yatsinda imikino yayo ibiri isigaye aho bazakina na Telecom ndeste na APR FC.

Itsinzi ya Atletico yatumye amakipe ane yose agira amanota atatu. Telecom iyoboye itsinda B ku bitego byinshi aho ikurikirwa na APR, KCCA na Atletico.

Imikino irakomeza kuri uyu wa kabiri aho, KMKM yo muri Zanzibar ikina na Adama City yo muri Ethiopia saa cyenda naho Azam yo muri Tanzania ikine na Atlabara yo muri South Sudan saa kumi n’imwe, kuri Sitade ya Kigali.

Tanga igitekerezo na Facebook

Tanga igitekerezo