Cecafa : Imikino yo mu matsinda yakomeje kuri uyu wa gatatu

Yanditswe na Admin ku wa 22.07.2015 saa 19:29 | Yasuwe : 846

Ikipe ya Al Khartoum yo mu gihugu cya Sudani ibonye itike ya ¼ mu irushanwa rya Cecafa Kagame Cup ririkubera muri Tanzaniya itsinze KMKM yo muri Zanzibar ibitego 2-1.

Muri uyu mukino wo mu itsinda rya mbere wabimburiye iyindi mikino kuri uyu wa gatatu, ukabera kuri stade y’I Dar es Salaam, kapiteni wa Al Khartoum, Osman Bilal Salah Eldin yongeye kubona inshundura hakiri kare, ku gitego yatsinze ku munota wa 7, kishyurwa na Matteo Saimon ku munota wa 58, mu gice cya kabiri.

Habura iminota 9 ngo umukino urangire, Anthony Akumu umunyakenya wigeze gukinira ikipe ya Gor Mahia yaboneye abanyasudani igitego cy’intsinzi maze umukino urangira ari ibitego 2-1.

Al Khartoum ikaba ibonye itike ya ¼ nyuma yaho yari yatsinze umukino ubanza ku bitego 5-0, itsinda Telecom yo muri Djibouti.

Kugeza ubu, Al Khartoum na Gor Mahia zimaze kubona itike yo gukina imikino ya ¼ n’amanota 6 mu mikino ibiri, mu gihe Yanga Africans ya Haruna Niyonzima itarabona inota na rimwe kuko yatsinzwe umukino ubanza na Gor Mahia ibitego 2-1.

IMG_5022

Ikipe ya Yanga Africans ya Haruna Niyonzima, yabonye amanota 3 ya mbere muri CECAFA Kagame Cup, itsinze ikipe ya Telekom Djibouti yo muri Djibouti, ibitego 3-0, kuri uyu wa gatatu.

NI umukino utagoye cyane ikipe ya Yanga Africans, ikaba yagiye ihusha uburyo bwinshi bw’ibitego bwari bwabazwe muri uyu mukino, wabereye kuri Uwanja wa Taifa, guhera saa kumi.

Nyuma yo guhusha ibitego bitagira ingano, umukinnyi Malimi Busungu yaje kubasha gufungura amazamu ku munota wa 27, ku mupira yaherejwe na Haruna Niyonzima, uvuye iburyo.

Iyi kipe yaje kubona amahirwe yo kubona igitego cya 2 ku munota wa 39, itewe n’umurundi Tambwe Amissi arayihusha.

Haciye iminota 3 gusa, umusifuzi Issa Kagabo, yongeye gusifura ko umukinnyi wa Telekom akoze umupira, ariko birangira na none Msuva wa Yanga ayihushije.

Mu gice cya 2, iyi kipe ikina isa nk’aho inaniwe, yakinaga imipira miremire, ari na yo yaje kubahira, ubwo umukinnyi Malimi Busungu, yabonaga igitego cya 2 ku munota wa 63, mbere gato yo gutera umupira ugafata umutambiko, wagaruka umuzamu Nzojikira Jeef akawukorao, ukijyana mu izamu.

Umukino warangiye nta gihindutse, ari ibitego 3-0 bya Young Africans, biyishyira ku mwanya wa 3, n’amanota 3, inyuma ya Al Khartoum National FC na Gor Mahia, zifite amanota 6.

Biramutse birangiye uku, ikipe ya Yanga Africans, isigaje imikino 2, iri ku mwanya wa 3, yahura na APR FC mu mikino ya 1/4 kirangiza.

Umukinnyi Tom Masiko kuri penaliti, yafashije ikipe ya Sam Ssimbwa KCCA, gutsinda Adama City yo muri Ethiopia, igitego 1-0, cyatsinzwe kuri penaliti, mu mukino wabereye kuri Karume Stadium.

KCCA yabonye igitego cyayo kuri penaliti yatsinzwe na kapiteni w’iyi kipe Tom Masiko, nyuma y’ikosa ryari rikorewe umukinnyi Derrick Nsimbabi mu rubuga rw’amahina.

Abasore ba Sam Ssimbwa, ntabwo berekanye umukino mwiza cyane, ariko icyo bari bakeneye ni ukubona amanota 3, bakizera ko bazagera muri 1/4 kirangiza.

Iyi kipe iramutse irangije iri ku mwanya wa 2, mu itsinda rya 3, iri kumwe na Azam na FC Malakia, yazacakirana n’ikipe ya 2 mu itsinda ririmo APR FC.

Kuri uyu Kane:

Hateganyijwe imikino 2, yose yo mu itsinda rya 2,

  • 14H00: Heegan (Somalia) vs AlShandy (Sudan)
  • 16H00: APR FC (Rwanda) Vs LLB AFC (Burundi)

Imikino yombi, ikazabera kuri Uwanja wa Taifa, Sitade nkuru y’igihugu cya Tanzania.

Tanga igitekerezo na Facebook

Tanga igitekerezo