Cecafa : APR yasezereye Rayon Sports kuri Penaliti

Yanditswe na Admin ku wa 19.08.2014 saa 22:36 | Yasuwe : 917

Mu mikino ya 1/4 cya CECAFA Kagame Cup ikipe ya Rayon Sports FC yasezerewe na APR FC kuzi penaliti 4-3 nyuma y’uko umukino warangiye ari ibitego 2-2.

Ntiwari umukino woroshye  kandi wari witabiriwe n’abantu benshi.Abakunzi b’amakipe yombi bakaba bibajije impamvu umukino nkuyu uhuruza imbaga utajyanwa kuri Stade Amahoro nubwo wari umunsi w’umubyizi.

Muri uyu mukino wagaragayemo ishyaka ryinshi n’ubuhanga Rayon Sports niyo yatangiye isatira cyane izamu rya APR  ariko ntibyatinda kuko APR yahise yinjira nayo mu mukino ku munota wa 12′ ihita ibona igitego cyayo cya mbere cyatsinzwe na Ndahinduka Michel ku mupira wari uvuye muri corner.Ikipe ya APR FC nubwo itakinaga ibintu byinshi, ariko amahirwe yabonye yahise iyabyaza umusaruro.

cecafaaprayon14a

Ntibyatinze ariko Rayon Sports  nayo yakomeje ubusatirizi bwayo ari nako ikoresha impande zose z’ikibuga.Ibi byaje kuvamo urukurikirane rwa za corner nyinsi maze iya nyuma irangira ku kaguru kaguru ka Yossam Bertrand watsinze igitego cyiza cyane kiryoheye ijisho.

Ibyishimo by’abakunzi ba Rayon Sports bjaje gukomezwa na Fuadi Ndayisenga watsinze igitego nawe cyiza  ku ishoti atereye muri metero 25 igice cya mbere kirangira ari 2-1 bya Rayon Sports.

Mu gice cya kabiri amakipe yombi yaje yongereye imbaraga ari APR bigaragara ko ishaka igitego yaje kubona ku munota wa 55′ gitsinzwe na myugariro Rugwiro Hervé kuri corner yari itewe na Jamal Mwiseneza umaze ibyumweru bibiri gusa avuye muri Rayon Sports.

Nubwo umutoza Losciuto yongeyemo amaraso mashya mu busatirizi akavanamo Geulli Koffiw asimbuwe na Uwambazimana Leo hamwe na Hussein Sibomana wasimbuwe na Mutombo Govin, umukino wahise wihuta cyane kandi ukomeza kunogera ijisho urinda urangira bicyiri 2-2.

Nkuko amategeko agenga iri rushanwa rya Cecafa abiteganya, hahise hitabazwa za Penaliti maze APR itsinda Penaliti 4 kuri 3 za Rayon Sports ,abafana ba Gikundiro bataha barira ayo kwarika.

Penaliti  : Rayon Sports 3-4 Apr 

Rayon : Abahushije :Tubane James,Ndayisenga Fuadi

           Abinjije : Kambale Salita ,Sibomana Abuba ,Mutombo Govin.

APR :    Abahushije : Nshutinamagara Ismail.

           Abinjije :Mukunzi Yannick,Tibingana Charles , Rutanga Eric ,Mugiraneza J.Batiste

APR FC izahura na Police FC kuri uyu wa Gatanu kuri stade Amahoro.

Kuri uyu wa Gatatu harakinwa imikino ibiri ya 1/2, saa 2.30pm El Merreikh ikine na Azam naho KCCA saa 5.00pm yakire Atlabara yo muri Sudani.

Tanga igitekerezo na Facebook

Tanga igitekerezo