Cecafa : APR yasezerewe na Khartoum yo muri Sudani iyinyagiye 4-0

Yanditswe na Admin ku wa 28.07.2015 saa 16:55 | Yasuwe : 1,046

Ikipe  yari ihagarariye u Rwanda muri CECAFA Kagame Cup muri Tanzania  APR FC yasezerewe inyagiwe ibitego 4-0 na Khartoum National muri ¼ cy’irangiza.

APR ibaye ikipe ya kabiri itsinzwe ibitego byinshi muri iri rushanwa nyuma ya Telecom yo muri Djibouti.Nubwo yari yasoje imikino yo mu matsinda idatsinzwe, mu minota 20 ya mbere y’uyu mukino,APR FC yari imaze gutsindwa ibitego bibiri harimo icya Altayeb yasonzemo nyuma y’aho Rwatubyaye Abdul agaruye umupira wari uri mu izamu n’umutwe ku munota wa 10.

APR FC yatsinzwe icya gatatu nyuma y’umupira abakinnyi ba Khartoum baherekanyije inshuro eshanu mu rubuga rw’iyi kipe yatwaye igikombe cya shampiyona mu Rwanda, ku ishoti yatereye muri penaliti Elmani atsinda igitego.

APR FC yasoje igice cya mbere itabonye amahirwe yo gutera mu izamu ry’umutoza Kwesi Appiah mu gihe Khartoum yo yari yagerageje inshuro zirindwi muri zo imipira itanu yerekeza ku munyezamu Ndoli Jean Claude.

Umutoza wa APR FC Dusan yakoze impinduka igice cya kabiri gitangira Bigirimana Issa asimbura Ruhinda Farouk, yabonye uburyo bwa mbere bwo gutsinda igitego ku munota wa 48.Ndahinduka Michel yaje kwihesha ikarita y’umuhondo ubwo yasifurwaga, agasunika umukinnyi wa Khartoum.

Nkinzingabo Fiston yasimbuwe na Sibomana Patrick ariko noneho APR FC yari imaze kubona uburyo bubiri imbere y’izamu rya Khartoum yo ifite butanu.

aprkhartoum15a

Bilal Salah yaje gutsindira Khartoum igitego cya kane ku munota wa 83 ku ikosa ry’umunyezamu Ndoli wasohotse mbere y’igihe babona itike ya 1/2 cy’irangiza ku nshuro ya mbere bitabiriye iyi mikino.

Umunya kenya  ukinira AL Khartoum Antony Akumu yagize ati :   ” Urebye mu kibuga, bsanga nk’abadahri neza. Sinzi, ubusanzwe ni ikipe nziza APR FC, ariko buretse uwari wambaye nimero 8 (Djihad Bizimana), washakaga kugumana umupira, abandi bose, basanga nk’abatari mu mukino.”

Ndoli Jean Claude we ati : ” Njye nabonye Ngabo atera umupira n’umutwe, niba yashakaga kuwumpa, niba yashakaga kuwutera imbere, ntabyo nzi. Birumvikana n’ibintu bibabaje, sinzi aho nahera ngira icyo mvuga, ariko mu mupira w’amaguru ni uku bigenda rimwe, na rimwe iyo utiteguye neza.”

Umutoza Mashami Vincent nawe ati : ” Ntabwo mfite byinshi navuga, gusa uyu munsi ntabwo abakinnyi bahagaze neza mu kibuga, byatuviriyemo gutsindwa ibitego bikurikiranye mu minota ya mbere. Nsabye Imbabaze abakunzi ba APR FC n’abanyarwanda bari badushyigikiye muri iyi mikino, tuvuyemo nabi, kuko APR FC, atari ikipe yo kuvamo muri 1/4 kirangiza, byongeye akageni nk’aka.”

Umutoza Kwesi Appiah, ugaragara buri munsi atuje, akaba yavuze ko umukino wamworoheye, kuko ibyo yasabye abakinnyi be babikoze neza, yongeraho ko abasore ba APR FC yabonye basaga nk’abatiteguye, ariko avuga ko ari ikipe yabonye igizwe n’abakinnyi bato, wenda ejo hazaza, bashobora kuzavamo, ikipe ikomeye cyane.

Umva Ikiganiro n’abanyamakuru :

 Dore uko byari byifashe mu mafoto :

Tanga igitekerezo na Facebook

Tanga igitekerezo