Cecafa: APR muri1/4, izahura hagati ya Gor Mahia, Yanga cyangwa Khartoum

Yanditswe na Rwanda Football ku wa 25.07.2015 saa 10:06 | Yasuwe : 1,741

Mu mikino yabaye ku wa gatanu, Gor Mahia yanganyije na Al Khartoum igitego 1-1, Yanga Africans itsinda KMKM ibitego 2-0 babona itike ya ¼ cy’irangiza mbere yo gukina imikino isoza itsinda, iya gatatu ikine na APR FC yo mu Rwanda.

Nyuma yo gutsinda imikino ibiri ibanza mu itsinda A bakabona itike ya ¼ cy’irangiza, Gor Mahia ya Kenya ikinamo Kagere Meddie, Sibomana Abuba na Nizigiyimana Kharim yagombaga kwikiranura na Al Khartoum nayo yatsinze imikino yombi.

Ku munota wa gatandatu, ku ikosa ry’umunyezamu Boniface Olouch, ba myugariro be Musa Mohamed na Harun Shakava bananiwe gukura uyu mupira mu rubuga rwabo maze Osumaila Baba atsinda igitego.

Amin Ibrahim Elmani wa Al Khartoum yashoboraga gutsinda igitego cya kabiri ariko umupira yateye ukubita igiti cy’izamu rya Gor Mahia.Mbere yo kujya kuruhuka, Gor Mahia yagomboye iki gitego binyuze kuri Eric Ochieng wari uhawe umupira na Khalid Aucho.

Nyuma y’umukino umutoza Gor Mahia, Frank Nuttal yavuze ko babaye abanyamahirwe kudatsindwa kuko Al Khartoum yabonye amahirwe menshi kubarusha.

Undi mukino wabaye muri iri tsinda, Yanga Africans ya Haruna Niyonzima yatsinze KMKM ibitego 2-0 babona itike ya ¼ cy’irangiza.

yanga_vs_kmkm

Mu gihe igice cya mbere cyari cyarangiye baguye miswi, Malimi Busungu yatsindiye Yanga bagitangira igice cya kabiri.Wari umukino ukomeye wahuzaga Yanga yatwaye igikombe cya shampiyona muri Tanzania yahuraga n’iyatwaye icyo mu kirwa cya Zanzibar.

Myugariro wa KMKM yaje kwitsinda igitego nyuma y’igihunga yagize ari kumwe na rutahizamu w’Umurundi Amissi Tambwe wa Yanga.

Yanga yagize amanota atandatu, inyuma ya Gor Mahia ifite arindwi izigamye ibitego bitatu inganya na Al Khartoum yo izigamye ibitego bitandatu.

Ikipe ya gatatu muri iri tsinda izahura na APR FC yabaye iya mbere mu itsinda B nyuma yo gutsinda imikino itatu yose harimo uwa Lydia Ludic kuri uyu wa Kane ibitego 2-1.

APR FC izamenya iyo bizahura ku Cyumweru nyuma y’umukino uzahuza Gor Mahia izahuramo na Telekmo Djibouti naho Yanga Africans yisobanure na Al Khartoum.

Kuri uyu wa Gatandatu

KCC vs Malakia saa saba

Adama City vs Azam saa cyenda

Tity Thierry Kayishema

Tanga igitekerezo na Facebook

Tanga igitekerezo