Casa Mbungo yatsinze umukino wa mbere muri AFC Leopards

Yanditswe na Rwanda Football ku wa 05.03.2019 saa 07:56

Umunyarwanda utoza ikipe ya AFC Leopards mu cyiciro cya mbere muri Kenya Casa Mbungo André,yatsinze umukino we wa mbere nyuma y’imikino itanu,.

Yabigezeho ku wa Gatandatu tariki 02 Werurwe 2019, atsinda ikipe ya Sony Sugar igitego 1-0 cyatsinzwe na Wai Yeka wahoze mu ikipe ya Musanze ku munota wa 48 ku mupira yari ahawe neza na Whyvonne Isuza.

Iyi ntsinzi yatabaye Casa wageze muri iyi kipe mu byumweru bitatu bishize atsindwa na Nakumatt 2-1, Gor Mahia ya Tuyisenge  2-0, Ulinzi Stars 1-0 na  Mathare 2-0. Ni amanota ya mbere iyi kipe yanabonye mu gihe yatsinzwe imikino irindwi iheruka.

Ibi byatumye AFC Leopards iva mu murongo utukura aho kuri ubu iri ku mwanya wa 15 n’amanota 13 irusha inota rimwe andi makipe ayikurikiye.

AFC Leopards igomba guhura na Tusker ya kane ku rutonde rwa shampiyona tariki 09 Werurwe 2019, ibone gukurikizaho ikipe ya Sofapaka ya 6 ku rutonde mu kindi cyumweru.

Tanga igitekerezo