CAF Champions league: Simba SC ya Kagere yanyagiriwe i Kinshasa

Yanditswe na Rwanda Football ku wa 20.01.2019 saa 08:42

Ikipe ya Simba Sports Club yo muri Tanzania, ntiyahiriwe n’umunsi wa kabiri w’imikino nyafurika y’amakipe yabaye aya mbere iwayo kuko yatsindiwe i Kinshasa na AS Vita Club yo muri Repubulika iharanira Demokarasi ya Congo ibitego 5-0.

Vita Club yatwaye iki gikombe mu 1974, yafunguye amazamu ku munota wa 14 w’umukino ,igitego cyatsinzwe na Jean-Marc Mukusu. Iyi kipe yakiniraga imbere y’abafana bayo yabonye igitego cya kabiri ku munota wa 20 ibifashijwemo na Botuli Bompenga, mbere yuko Luamba Ngoma atsinda igitego cya gatatu kuri penaliti. Igice cya mbere cy’umukino cyarangiye Simba imaze gutsindwa ibitego 3-0.

Ikipe ya Simba yari yarushijwe bigaragara yatsinzwe igitego cya kane ku munota wa 71 w’umukino. Ni igitego cyatsinzwe na Makwekwe Kupa. AS Vita Club yashoje akazi ibifashijwemo na Mukusu watsindaga igitego cye cya kabiri muri uyu mukino.

Ikipe ya Simba yashoboraga kubona impozamarira mu minota ya nyuma y’umukino, gusa Coup- Franc ya Emmanuel Okwi igarurwa n’umutambiko w’izamu.

Gutsinda uyu mukino byafashije Vita Club gufata umwanya wa kabiri muri iri tsinda D n’amanota atatu, inyuma ya Al Ahly yo mu Misiri iriyoboye n’amanota ane. Iyi Al Alhy yo yanganyije na JS Saoura yo muri Algeria 1-1.

Mu yindi mikino, ASEC Mimosas yo muri Cote d’ivoire yatsinze Lobi Stars yo muri Nigeria 1-0, Mamelodi Sundowns itsinda Wydad Casablanca 2-0, mu gihe TP Mazembe yatsinzwe na CS Constantine yo muri Algeria ibitego 3-0.

Tanga igitekerezo

Tanga igitekerezo