Byarangiye Eric Nshimiyimana agiye muri As Kigali

Yanditswe na Admin ku wa 15.07.2014 saa 22:02 | Yasuwe : 1,557

Ubwo yerekanwaga ku mugaragaro  nk’umutoza wa Kiyovu Sports, nta numwe watekerezaga ko Nshimiyimana Eric yasinya imyaka ibiri gutoza As Kigali asimbuye Casa Mbungo Andre werekeje muri Police FC.

Ku gicamunsi cyo kuri uyu wa kabiri nibwo nibwo inkuru yasesekaye muri Kigali ko AS Kigali ariyo yegukanye  Nshimiyimana  ngo ayibere umutoza mu gihe cy’imyaka ibiri . Uubuyobozi bwa AS Kigali bwari bumaze guhura inshuro ebyiri na Nshimiyimana mu biganiro byo kugira ngo asimbure Casa Mbungo werekeje muri Police FC nyuma y’iyegura ritunguranye rya Sam Ssimbwa.

Amakuru yo gusinya kwa Nshimiyimana yemejwe na Masengesho Felix, umuyobozi wa AS Kigali wavuze ko bamusabye gukomeza guteza imbere umupira w’amaguru nkuko biri mu ntego za AS Kigali.

nshimiyimanaericEric Nshimiyimana

Yagize ati “ Nshimiyimana yasinye imyaka ibiri tumusaba gukomeza gutera intambwe y’aho twari tugeze kuko tutifuza gusubira inyuma.”.Nyamara ariko Umurundi Kaze Cedric wahoze atoza muri Mukura VS yari yageze i Kigali kuri uyu wa mbere aho nawe yari mu bategereje gukorana ibiganiro n’abayobozi ba AS Kigali.

Ku ruhande rwa Kiyovu Sports, Byumvuhore Muddy, umuvugizi wayo avuga ko batunguwe no kumva Nshimiyimana Eric asinye muri AS Kigali cyane ko yari amaze icyumweru yaratangiye akazi.Yagize ati “ Nshimiyimana yari yatangiye gutoza Kiyovu Sports nubwo yari atarasinya kuko amasezerano twari tukiyanonosora. Twari twarumvikanye byose n’umushahara.”

Kugenda kwa Nshimiyimana bitumye ubuyobozi bwa Kiyovu Sports butegura inama idasanzwe kuri uyu mugoroba hashakwa ingamba zatuma abatoza batajya bagenda uko bashatse no gushaka umusimbura.  Byumvuhore ati “ Abatoza bo barahari kuko mbere yo gufata Nshimiyimana hari abandi bari basabye akazi ariko tugomba gufata ingamba ntitukabure abatoza muri ubu buryo.”

Si Nshimiyimana uvuye muri Kiyovu Sports adateguje kuko na Kanyankole Gilbert “Yaounde” yeguye ageze i Burundi byakurikiye Kayiranga Baptista na Ntabwabira Jean Marie.

Nyuma yo gutwara igikombe cy’Amahoro, AS Kigali yaserukiye u Rwanda mu mikino nyafurika, CAF confederation cup, igera muri ¼ cy’irangiza isezererwa na Difaa Hassani El Jadida yo muri Maroc.

Kuba AS Kigali ikinisha Abanyarwanda gusa benshi bakiri bato, ni imwe mu mpamvu yatumye ubuyobozi bw’iyi kipe buvugana na Nshimiyimana watoje Isonga yari igizwe n’abakinnyi bari bavuye mu gikombe cy’Isi cy’abatarengeje imyaka 17 cyabereye muri Mexique bahise bajyana nawe muri APR FC.

Si ubwa mbere, Nshimiyimana atoje AS Kigali kuko mbere yo kujya muri APR FC mu 2011 yabanje kuyitoza.

Tanga igitekerezo na Facebook

Tanga igitekerezo