Bugesera igiye guhagarika inkunga yageneraga Sunrise FC

Yanditswe na Admin ku wa 31.07.2015 saa 18:08 | Yasuwe : 1,439
Ikipe ya Bugesera y’umupira w’amaguru uyu mwaka yabonye itike yo kuzamuka mu cyiciro cya mbere nyuma yo gutsinda Muhanga FC mu mikino ibiri ibitego 3-0.
Ubuyobozi bw’aka karere buratangaza ko kuba bwarabonye ikipe yazamutse mu cyiciro cya mbere, inkunga yagenerwaga Sunrise ikipe y’Intara y’Iburasirazuba igiye guhagarikwa.
Rwagaju Louis, umuyobozi w’Akarere ka Bugesera akaba na perezida w’icyubahiro wa Bugesera FC, atangaza ko ubuyobozi bw’akarere ka Bugesera bugiye kuganira n’ubuyobozi bw’Intara y’iburasirazuba ari nayo ifasha Sunrise FC, busaba ko butakomeza gutera inkunga Sunrise kuko akarere ka Bugesera nako kabonye ikipe yako mu cyiciro cya mbere.
bugesera
Rwagaju yagize ati “ikipe yacu kuva yazamuka mu cyiciro cya mbere ubu natwe twatangiye gukusanya inkunga izatuma iyi kipe ibaho kandi ikabaho neza ku buryo itazahita isubira mu cyiciro cya kabiri, ubusanzwe Intara y’Iburasirazuba natwe tubarizwamo twayigeneye miliyoni 10 z’amanyarwanda umwaka ushize yo gufasha Sunrise ikipe y’intara, ariko ubu ayo mafranga tugiye gusaba ubuyobozi bw’intara ko tutayatanga uyu mwaka, kugira ngo tubanze natwe twiyubake.”
Uyu muyobozi avuga ko ataramenya ingengo y’imari Bugesera FC izakoresha muri uyu mwaka w’imikino, ariko basabye ubuyobozi bw’ikipe kubibategerurira.Rwagaju avuga kandi ko mu baterankunga b’iyi kipe harimo n’abacuruzi bakorera mu karere ka Bugesera bemeye kuyifasha.
Gashugi Jean Claude, Umunyamabanga Mukuru w’iyi kipe akaba n’umuvugizi wayo, avuga ko kugeza ubu ikipe yatangiye kongeramo amaraso mashya bahereye ku mutoza.
Tanga igitekerezo na Facebook

Tanga igitekerezo