Bralirwa ishobora kongera gutera inkunga Shampiyona y’u Rwanda

Yanditswe na Admin ku wa 01.08.2015 saa 10:31 | Yasuwe : 970

Komite nyobozi y’Ishyirahamwe ry’umupira w’amaguru  mu Rwanda “FERWAFA” yaraye yemeje ko bidahindutse shampiyona y’uyu mwaka izatangira taliki 18 Nzeri 2015 ariko bikazabanza kunyura mu nama y’inteko rusange iteganyijwe taliki ya 29 n’iya 30 Kanama 2015.

Mu kiganiro yagiranye n’itangazamakuru kuri uyu wa gatanu, umuyobozi wa FERWAFA  Nzamwita Vincent De Gaule  yatangaje ko shampiyona ishobora gukinwa mu mibyizi biturutse ku myiteguro y’Amavubi ishobora kujya ituma habaho gusubikwa kw’iyi shampiyona.Yagize ati “Shampiyona iteganyijwe gutangira kuya 18 Nzeri 2015. Muziko tuzakira CHAN , bivuze ko  tuzagira imikino myinshi y’Amavubi. Dushobora kuzajya dukina kuwa gatanu, kuwa kabiri cyangwa se n’undi munsi”.

Nzamwita yemeje kandi ko n’umubare w’amakipe ushobora kwiyongera bitewe n’icyo abanyamuryango bazemeza mu rwego rwo kwegera imikino 40 yemewe na FIFA ku ikipe y’icyiciro cya mbere. Ibi bivuze ko amakipe azakina shampiyona y’umwaka utaha ashobora kuba 16.

Mu gihe hari amakuru yabanje kuvugwa ko habaho za “League” zirimo  amakipe yegeranye mu duce abarizwamo, Nzamwita yavuze ko uyu mwaka bitagishobotse ariko ari icyifuzo kigomba gukomeza kwigwaho ku buryo bikunze cyashyirwa mu bikorwa mu mwaka utaha.

Perezida-wa-ferwafa

Yabisobanuye  agira ati :“Dufite ibibazo bibiri bikomeye dushaka ko inteko rusange yigaho,  icyo tumva twabasaba  ni   ukongera umubare w’amakipe ariko ibyo guhindura uburyo shampiyona yakinwagamo byo twazabisuzuma umwaka utaha. Bizaterwa n’ingufu z’umuterankunga, ariko ubushobozi nibukomeza kuba buke tuzahindura uburyo bw’imikinirwe ya shampiyona”.

Mbere y’uko shampiyona itangira, biteganyijwe ko hazabaho  irushanwa “ Agaciro Pre Season Tournament”, irushanwa ryo gukusanya inkunga izashyirwa mu kigega “Agaciro Development Fund”, rikazitabirwa n’amakipe yose yo mu cyiciro cya mbere.

BRALIRWA ifite amahirwe yo kongera kuba  umuterankunga wa shampiyona

Ubwo yari abajijwe ku bijyanye n’abaterankunga b’uyu mwaka wa shampiyona, Nzamwita yasubije ko bari kuganira n’uruganda rwa BRALIRWA rwahoze rutera inkunga iyi shampiyona.

Mu gihe mu mwaka ushize, ibiganiro hagati ya BRALIRWA na FERWAFA byananiranye  biturutse ku kibazo cy’ikipe ya Rayon Sports yambaraga imyenda y’uruganda mukeba Skol, kuri iyi nshuro BRALIRWA yamaze kwemera ko mu gihe yasinyana na FERWAFA, Rayon Sports izakomeza kwambara imyenda ya Skol.

Amakuru atugeraho aremeza ko ibiganiro bigeze ku kigero cya 85% ku buryo uru ruganda rwakongera rukaba umuterankunga wa shampiyona 2015-2016.Usibye iby’abaterankunga, FERWAFA irategtanya ko izinjiza amafaranga avuye ku burenganzira ku kugurisha amashusho “TV Rights “, uburyo buzatangirana n’iyi shampiyona.

Tanga igitekerezo na Facebook

Tanga igitekerezo