Bombori Bombori ku gahimbazamusyi muri Ferwafa

Yanditswe na Admin ku wa 08.10.2014 saa 20:56 | Yasuwe : 816

Inkuru yiriwe mu bitangazamuru bitandukanye hano mu Rwanda kuri uyu wa gatatu ni iyerekeranye n’uduhimbazamusyi ( primes) twaba twarahawe abayobozi muri Ferwafa mbere y’abakinnyi.

Abashyirwa mu majwi ni Umuyobozi wa Ferwafa Nzamwita Vincent De Gaulle na Rubega Patrick ushinzwe kwamamaza no kumenyekanisha ibikorwa bya Ferwafa.

MINISPOC yemereye agahimbazamusyi abakinnyi b’ikipe y’igihugu y’umupira w’amaguru mu gihe baramuka batsinze Congo-Brazaville umukino wo kwishyura. Amavubi yaje kubigeraho asezerera Congo-Brazaville ari na bwo abakinnyi baje kwaka ako gahimbazamusyi.

Abakinnyi b’ikipe y’igihugu Amavubi  bari bemerewe amadorali 3000 (2 097 000 Frw) mu gihe bari gusezerera Congo Brazzaville maze bagakomeza mu mikino y’amatsinda yo gushaka itike yo kujya mu gikombe cya Afurika kizabera muri Maroc umwaka wa 2015.

Uyu mukino waje kurangira ikipe y’igihugu iwutsinze ariko  iza gusezerererwa muri iyi mikino izize gukinisha umukinnyi Daddy Birori byagaragaye ko afite ibyangombwa bibiri. Kuba abakinnyi nta ruhare bagize muri iri sezererwa byatumye babwirwa ko uko bizagenda kose bazahabwa amafaranga yabo nubwo na nubu ngo batarayabona.

degaulle1

Biravugwa rero ko bamwe mu bayobozi bo muri Ferwafa  barimo Perezida wayo Nzamwita Vincent De Gaulle na Kagabo Rubega Patrick ushinzwe Marketing , na bo batse primes z’amadorali 3000 yari yemerewe abakinnyi kubera gutsinda Congo Brazzaville ndetse bikaba bitangazwa ko bo ayo mafaranga barangije kuyabona mbere y’abakinnyi.

Mu ibaruwa yashyizwe ahagaragara n’ibinyamakuru, FERWAFA yandikiye MINISPOC isabira abakinnyi agahimbazamusyi, ndetse hagaragaraho n’urutonde rw’abakemerewe.

Nk’uko bigaragara mu ibaruwa nayo yasohotse mu binyamakuru MINISPOC yandikiye FERWAFA iyimenyesha ko « agahimbazamusyi k’imikino ikipe yatsinze kagenerwa abakinnyi na staff technique [abayobozi b’ikipe] gusa. Abandi baherekeza ikipe bahabwa amafaranga y’urugendo (Frais de Mission) »

Mu gushaka kumenya impamvu abayobozi ba FERWAFA bishyize ku rutonde rw’abaka agahimbazamusyi kandi batakemerewe, Umuyobozi w’ishyirahamwe ry’umupira w’amaguru mu Rwanda avuga ko atazi neza ko agaragara kuri urwo rutonde.

Nzamwita Vincent De Gaulle yavuze ariko ko atahamya neza ko atari kuri urwo rutonde, ariko ko aramutse aruriho haba harakozwe amakosa ku ruhande rw’Umunyamabanga Mukuru wa FERWAFA wanditse iyo baruwa isaba agahimbazamusyi.

Yagize ati: “hari igihe habaho kwibeshya muri administration (mu buyobozi) kuko twe nk’abayobozi duhabwa frais de mission (amafaranga ya misiyo) ntabwo dufata prime (agahimbazamusyi) nk’abakinnyi cyangwa abagize staff technique (abayobozi b’ikipe”.

Nzamwita yakomeje avuga ko ataniyumvisha uburyo yaba yaragizwe nimero ya mbere ku rutonde rw’abasaba agahimbazamusyi kandi atanakemerewe, avuga ko n’iyo yaba akemerewe atari kugahabwa mbere y’abakinnyi.

Tanga igitekerezo na Facebook

One thought on “Bombori Bombori ku gahimbazamusyi muri Ferwafa

  • 09/10/2014 at 07:34
    Permalink

    Mbega umugabo ubeshya wagirango neza neza avukana na Semuhanuka, ubwo se ko yayakiriye niba avuga ko Secretaire yibeshye, sha reka ubeshyere Olivier ni wowe wamwizaniye nawe uzumve akome yubaha Boss we kubi.

    Reply

Tanga igitekerezo