Bizimana Djihad agiye kongera amasezerano muri Rayon Sports

Yanditswe na Admin ku wa 06.07.2015 saa 17:14 | Yasuwe : 998

Umukinnyi Bizimana Djihad uri kwitwara neza muri ino minsi wari asanzwe akina hagati mu ikipe ya Rayon Sports agiye kongera amasezerano yo gukomeza kuyikinira.

Djihad yagize ibyo atangariza ikinyamakuru Izuba Rirashe ducyesha iyi nkuru agira ati “Amasezerano yanjye yararangiye, ariko nishobora kumvikana n’ikipe yanjye ya Rayon Sports nzayikinira. Ibiganiro byanjye na Rayon Sports bigeze nko kuri 70% nibiramuka biciyemo nzayikinira“.

Abajijwe niba na APR FC imwifuza, yavuze ko aribyo, ariko nta kintu kigaragara bari baganira ku buryo yayikinira.

Bizimana atangaza ko icyo yifuza cya mbere atari ukwihutira amafaranga cyangwa ibindi, ati ” ndashaka ahantu ngomba kugenda nkakomeza ngatera imbere nkakina neza muri rusange”.

djihad

Abajijwe ku bwo kuba yaragiriwe inama na nyirarume kapiteni w’Amavubi Niyonzima Haruna kuba yakomeza gukinira Rayon Sports indi myaka ibiri, yagize ati ” nka marume ibyo yanyifuriza ni ibyiza, ntabwo yanyifuriza kuba yambwira ngo njye ahantu habi cyangwa se wenda ngo abe yanjyana muri Tanzania areba uko ambona abona ntaragira uburambe, kubwanjye ngomba gukina nk’indi myaka ibiri mu Rwanda kugira ngo mbashe kujya hanze”.

Djihad yari asanzwe akinira ikipe Rayon Sports, ariko amasezerano akaba amaze kurangira.

Umuvugizi w’ikipe ya Rayon Sports, Niyomusabye Aime Emmanuel atangaza ko barimo bavugana n’abakinnyi bose barimo kurangiza amasezerano.

Bizimana yabaye umukinnyi mwiza w’irushanwa ry’igikombe cy’Amahoro cyashojwe kuwa gatandatu tariki ya 4 Nyakanga 2015, ubwo ikipe ya Rayon Sports yatsindwaga na Police FC ku mukino wa nyuma igitego kimwe ku busa.

Tanga igitekerezo na Facebook

Tanga igitekerezo