Birangiye Zinedine Zidane agarutse gutoza Real Madrid

Yanditswe na Rwanda Football ku wa 11.03.2019 saa 20:37

Umufaransa Zinedine Zidane yemeye kugaruka gutoza ikipe ya Real Madrid mu gihe cy’imyaka itatu nk’uko ikinyamakuru Marca gikurikiranira hafi ibyo muri Real Madrid kimaze kubitangaza.

Ni nyuma y’ibiganiro uyu mugabo yari amaze igihe agirana n’ubuyobozi bwa Real Madrid burangajwe imbere na Florentino Perez. Marca yatangaje kandi  ko agomba kurangiza uyu mwaka atoza Real Madrid, akongeraho indi itatu.

Byitezwe ko abayobozi ba Real Madrid bahura na Santiago Solari wari umutoza wayo, kugira ngo bamusezerere burundu.

Real Madrid yafashe icyemezo cyo gutandukana na Solari ukomoka muri Argentina wari umutoza wayo, nyuma y’umwaka w’imikino wa 2018/2019 yagize. Magingo aya iyi kipe y’ubwami bw’i Madrid iri ku mwanya wa gatatu ku rutonde rwa shampiyona ya Espagne, aho irushwa amanota 12 na FC Barcelona bahora bahanganye. Iyi kipe kandi yamaze no gusezererwa mu marushanwa ya UEFA Champions league ndetse n’igikombe cy’umwami.

Zinedine zidane witezweho kujya kuzahura ikipe ya Real Madrid, ayifitemo izina rikomeye cyane. Uretse kuba yarayibereye umukinnyi w’igitangaza, yayibereye umutoza mwiza wayihesheje UEFA Champions league eshatu zikurikiranya.Mu mpera za Gicurasi 2018 ni bwo Zidane yatangaje ko atandukanye na Real Madrid.

Zinedine Zidane agiye kuba umutoza wa gatatu uyitoje mu mezi icyenda ashize, Nyuma ya Julen Lopetegui na Santiago Solari.

Tanga igitekerezo