Bimwe wamenya kuri Rutanga Eric wagaruriwe icyizere na Rayon Sports

Yanditswe na Rwanda Football ku wa 23.12.2017 saa 10:51 |

Gufata icyemezo gikomeye cy’ubuzima si ikintu cyorohera buri muntu. Hari abagira ubwoba bwo kwirengera ingaruka mu gihe amahitamo yabo yaba mabi, ku rundi ruhande hari n’abandi bavuga bati bigende uko byakabaye.

Rutanga Eric ni umwe mu bantu bafashe ikemezo gikomeye, amaze kubura umwanya muri APR FC yazamukiyemo ajya muri mukeba Rayon Sports. Rutanga yafashe iki kemezo amaze kubona ko umupira we ushobora kurangira azira kwicazwa na Imanishimwe Emmanuel abona ko banganya ubushobozi.

Rutanga yageze muri Rayon Sports abona umwanya uhoraho agarura ikizere cyo gukina, akundwa n’abafana, agaruka mu ikipe y’igihugu “Amavubi”. Mu kiganiro kirambuye yagiranye n’Ikinyamakuru Imvaho Nshya yagize byinshi avuga ku buzima bwe.

Rutanga ni muntu ki?

Yabonye izuba tariki 03 Ugushyingo 1993, mu Bibare ku Kimironko mu mujyi wa Kigali. Ni umuhungu wa kane mu muryango w’abana batandatu ba Kabengera Ignace na Mukanyarwaya Anathalie ucuruza imyenda mu isoko rya Kimironko. Mukuru we yitwa Ntarengwa Aimable akaba umuyobozi ushinzwe imibereho y’abakinnyi mu Isonga FC naho murumuna we Habineza Olivier akina mu ishuri ry’abana rya APR FC.

Yize amashuri abanza kuri Remera Protestant, agiye mu mashuri yisumbuye mu 2008 yoherejwe muri Eto Kicukiro binahurirana n’uko iri shuri ryafungaga imiryango abigagamo bajya kuri EFOTECH i Kanombe.

Rutanga wari umaze kujya mu Isonga mu 2012 yasoreje amashuri yisumbuye kuri APEA Rugunga mu ishami ry’amateka, Ubukungu n’Ubumenyi bw’Isi (HEG), akanifuza ko mu myaka ibiri yatangira Kaminuza n’ubwo ataratekereza ibyo aziga .

Mu ishuri ry’abana rya APR FC 

Rutanga yatangiriye umupira mu ishuri ry’abana ryari i Remera rya Nyakwigendera Kalisa Jean Paul bitaga Mourinho nyuma ajya mu ishuri ry’umupira rya APR FC rigishingwa mu 2009 aho yari kumwe na ba Yannick Mukunzi n’ubwo batari baziranye.

Ati ’’Batoranyije mu mashuri yose mu gihugu, njye nakoreye i Remera, tujya i Kinyinya bashaka abana 30. Bwa mbere mu rugo ntibari babizi ariko kuva twari tugiye kuhaba, nabibwiye mu rugo baransengera, barantoranya mpita mba na kapiteni”.

Nyuma y’umwaka umwe Rutanga yageze mu ikipe yakinye igikombe cy’Afurika cy’abarengeje imyaka 17, ku busabe bwa Richard Tardy wari umuyobozi wa tekiniki wa FERWAFA, ahita ajya mu Isonga FC ahamara umwaka umwe, mu 2013 agaruka mu ikipe ya APR FC.

Ibihe byiza mu myaka ibiri ya mbere muri APR FC 

Rutanga wazamuwe ku busabe bwa Andreas Spier, umudage wari umaze kuzamurwa avuye mu ikipe y’abana yaje kugirirwa ikizere cyo kubanza mu mikino hafi ya yose usibye iy’amakipe akomeye nka Rayon Sports na APR FC ahakinaga Ngabo Albert wari ufite ubunararibonye.

Ati ’’Twahasanze abakinnyi bafite ubunararibonye b’Abanyarwanda nka ba Kodo, Iranzi, Migi, tuba aba gatatu mu mwaka wa mbere, mu 2014 dutwara igikombe cya shampiyona n’uwakurikiyeho dutwara shampiyona n’icy’Amahoro’’.

Arakomeza ati’’Nkijyamo dutozwa na Andreas wanadutoza mu ikipe nto, nari mfite umwanya, bashaka kunyijiza mu kibuga buhoro buhoro.Twakina na Rayon Sports nkajya ku ntebe. Ndetse dutwara igikombe cya mbere ni njye watsinze igitego i Rusizi cyaduhesheje igikombe’’.

Kuza kwa Imanishimwe, impamvu yo kuva muri APR FC

Rutanga wari utangiye kwigaragaza yaje kubura neza umwanya nyuma y’aho Imanishimwe Emmanuel yari amaze kugera muri iyi kipe bituma asoza umwaka w’imikino wa 2016-2017 akinye imikino 5 gusa.

Ibi byatumye asaba kuva mu ikipe ariko abayobozi bakuru baramwangira. Ati ’’Ntabwo urwego rwanjye rwari rwagabanutse. Ubundi APR FC iyo iguze umukinnyi iba imuharaye pe, uwakinaga basa nk’aho bamwibagiwe. Bitewe n’imyaka nari nkinnyemo n’uko nari mbazi bakimugura nari mbizi ko agomba gukina, njye nababwiye ko nakwigendera ariko Minisitiri ( Gen Kabarebe ) wankundaga aravuga ngo oya, muzagabana imikino’’.

Yungamo ati ’’Imanishimwe ntiyari umukinnyi wo ku rundi rwego mvuga ngo nakwigiraho , cyane ko ari imyaka ibiri yari akinnye, njye maze igihe nkina. Najyaga mbwira umutoza nti ubona ndi umuswa ku buryo nabura n’umukino n’umwe nakina? Nawe akabura icyo ansubiza. Ndebye umuntu unshyira ku ntebe kandi tungana nti reka mfate ikemezo aho kuzisanga nsoje umupira ntateye imbere’’.

Rutanga yanze kwirirwa agira uwo agisha inama yo kuva muri APR FC kuko yabonaga hari abamubwira ngo nahagume.

Rutaga avuga ko muri Werurwe 2017, Gacinya Chance Denis wari Perezida wa Rayon Sports yamuhamagaye kuri telefoni amubwira ko bamwifuza, amusaba ko bazongera kuvugana nyuma ya shampiyona. Ibi byakomejwe n’uko AS Kigali yaje kumusaba APR FC, maze abayobozi ba APR FC bafata ikemezo cy’uko bazamutanga muri AS Kigali aho kumureka akajya mu bakeba.

Ati ’’Nabanje kuvugana na AS Kigali, turicarana tunanirana kumvikana ku mafaranga banyima miliyoni esheshatu, njya kwa Rayon Sports byose barabyemera, ndababwira nti ngiye kubitekerezaho. AS Kigali ibonye ko byakomeye yongera amafaranga ariko ndavuga nti reka njye muri Rayon Sports niho nzahita nzamuka, ikipe irebwa n’abafana.’’

Rayon Sports yamuhaye umwanya, ikizere n’ikerekezo

Nyuma yo gufata iki kemezo, Rutanga yaje muri Rayon Sports anagira amahirwe yo kwitwara neza mu mikino yo kwitegura shampiyona, anasubira mu ikipe y’igihugu. Ati ’’No muri APR FC narakoraga cyane, ariko ntibihabwe agaciro kuko bumvaga bafite umukinnyi ugomba gukina. Muri Rayon Sports nabonye umwanya ndavuga nti reka nkore byikubye kabiri, nerekane ko ari byo naburaga. Rayon Sports yagaruye izina ryanjye, yangaruriye ikizere. Ubu mu Rwanda ndi umukinnyi wubashywe , ukina mu ikipe y’igihugu kandi si iya CHAN gusa kuko n’inkuru abo nicaza nibo twongera guhurirayo’’.

Kimwe mu bintu bikomeye bimusaba gukora ni abafana ba Rayon Sports bakunda insinzi ari nabyo bituma agomba gukina buri mukino abishyizeho umutima kugira ngo ahaze ibyifuzo by’abafana.

Rutanga yatsinze igitego APR FC, umubyeyi we ahabwa amafaranga 

Intangiriro nziza za Rutanga muri Rayon Sports zatangijwe n’igitego yatsinze APR FC tariki 16 Nzeri 2017 ubwo bakinaga mu irushwana ryo kwitegura shampiyona ry’Agaciro, byanatumye nyina ahabwa ibihumbi 100 n’abafana.

Ati ’’Uriya ni umukino uba wakaniwe cyane mu Rwanda, nkiza muri Rayon Sports hari abataremeraga ariko ni umukino watumye njya mu mitima y’abakunzi ba Rayon kubera igitego natsinze ku munota wa 88”.

Anagaruka ku byabaye ku mubyeyi we. Ati ’’Ubundi ntiyari azi iby’umupira, yatangiye kubikunda ndi muri APR FC , iyo ndibukine, mama arampagara kandi naho acuruririza aba afite akaradiyo. Nsinda igitego APR FC buri wese yarazaga akamuha ibiceri n’inoti ku buryo yatahanye ibihumbi 100’’.

Gutera imipira iteretse no kujya hanze

Mu bindi Rayon Sports yamuhaye ni ukongera kwigirira ikizere cyo gutsinda imipira iteretse aho kuri ubu ari we wa kabiri utera iz’ibumoso nyuma ya Kwizera Pierrot.


Ati “Ni ikintu nari nifitemo ariko ntahabwa umwanya wo kubikora. Njye burya kuva nkiri umwana natsindaga koruneli, no muri academie nijye wazitsindaga. Muri APR FC Iranzi niwe wateraga iz’ibumoso, iburyo ari Bayisenge. Ngeze muri Rayon Sports twakoraga imyitozo yazo, Karekezi abona mfite impano, dukina na APR FC Pierrot ntiyari yakinnye, nyiteye ijyamo, mu ikipe y’igihugu nyiteye ijyamo’’.

Yungamo ati ’’Pierrot andusha gutera neza imipira iteretse, gusa turumvikana, hari aho afite ingufu, hari iyo areba akambwira ngo yitere. Ubundi ni we uzitera nka nimero ya mbere izindi z’iburyo zikaba iza Djabel ’’.

Rutanga hari ibyo yishimira

Kimwe mu byo umupira wamariye Rutanga harimo kubasha kubaka inzu iri ku Kimironko azimukiramo muri Mutarama 2018, yigurira imodoka agendamo anabasha gufasha umuryango we, ari nabyo bimutera ishema ku myaka ye.

Rutanga nyuma yo gukina yumva azaba umucuruzi kuko ari byo abona byamuha amafaranga yabona akanya agafasha za centres atari nk’umutoza.

Abana na Mukunzi Yannick kuko ari inshuti magara. Mu buzima busanzwe kandi Rutanga ni umukristu Gatolika, akaba anafite umukobwa w’inshuti witwa Umunyana Shemissa.

Ubutumwa ku bana bakizamuka

Ati ’’Igikuru ni ukugira ikinyabupfura. Nitanzeho urugero, nyuma y’umukino mpita ntaha mu rugo nkaruhuka kuko umupira usaba kuruhuka, ibyo gusohoka ntibimbamo. Ndakina nkataha, nkatekereza icyo ntakoze kugira ngo ikipe yacu itsinde’’

Tanga igitekerezo na Facebook

Tanga igitekerezo

Powered by Live Score & Live Score App