Bimwe mu byaranze umukino Rayon Sports yatsinzemo APR ibitego bine ku busa

Ni umukino w’amateka wari witezwemo byinshi bidasanzwe dore ko amakipe yombi akurikirana ku rutonde rwa shampiyona, aho ikipe ya APR FC yarushaga Rayon Sports ya 2 amanota 4, ariko Rayon Sports ifite umukino w’ikirarane na Etincelle.

Uyu mukino wabereye kuri Stade Amahoro i Remera ku masaha y’umugoroba wari uwo kwishyura dore uko ubanza amakipe yombi yari yanganyije ubusa ku busa. Wari umukino wabaye amakipe yombi aheruka intsinzi dore ko muri Week end iheruka APR yari yatsinze Rwamagana FC 2-1 mu gihe Rayon Sports yari yanyabitse bidasubirwaho ikipe ya Police FC ibitego 3-1.

Davis Kasirye umukinnyi w’umunsi
Davis Kasirye umukinnyi w’umunsi

Dore bimwe twaguhitiyemo nk’ibidasanzwe utamenye ubwo iyi kipe ya gisirikare yanyagirwaga  na mukeba wayo Gasenyi (Rayon Sports), ibitego 4-0.

Didier Gomez asengera Rayon Sports amasaha 3 mbere y’umukino

Umutoza Didier uheruka guhesha igkombe cya Shampiyona ikipe ya Rayon iheruka muri 2013 ari nawe waherukaga kwandagaza APR FC, mbere y’umukino wo kuri uyu wa kabiri yari yanditse ku rukuta rwe rwa Facebook ko ari gusengera Rayon Sports kandi ko umutima we ari ho uri nk’umwe mu bafana b’imena b’iyi kipe.

Didier Domez ni we wandikiye amateka akomeye kuri APR FC nk’umukeba ubwo yabatsindaga ibitego 4- 0 akanayihesha igikombe nyuma y’imyaka 9.

Kasirye utari kubanzamo ni we ucunguye Rayon Sports FC

Rutahizamu w’umugande Davis Kasirye nyuma y’umukino yatangaje ko yishimiye cyane kuba abashije gutsindira ikipe ye Rayon Sports ibitego 3 muri 4, mu gihe atarari ku rutonde rw’abagombaga gukina uyu mukino.Davis Kasirye umutoza Masudi Djouma ngo yari yahisemo kumwicaza kubera umubare w’abanyamahanga, aho yari yahisemo gukinisha umunye-mali Diarra Ismael, Pierrot na Fabrice Mugeni nk’abanyamahanga batatu batemerewe kurenga mu kibuga.

Ku byo twakwita amahirwe, Mugheni Fabrice yaje kuvunika mu myitozo yo kuwa mbere mbere y’umunsi umwe ngo umukino ube, bityo biha amahirwe Kasirye Davis yo kubanzamo.Ibi byatumye nyuma y’umukino, Davis Kasirye mu kiganiro yahaye teleziviyo imwe yo muri Tanzania atangaza ko yishimiye cyane kuba atsinze mu gihe atari yahawe icyizere n’umutoza.

Kasirye yanditse amateka ya mbere mu myaka 23

Mu mateka y’imibereho y’ikipe ya APR FC,  rutahizamu w’umugande ukinira Rayon Sports Davis Kasirye ni we wenyine wihereranye APR FC akayitsinda ibitego 3 mu mukino umwe, ibizwi ku isi nka Hat Trick, by’umwihariko muri mukeba Rayon Sports.

Abakinnyi nka Kamana Bokota, Cedric, Kambale Salita Gentil bagiye batsinda ibitego bibiri APR FC ariko ntawari wakagejeje ku bitego bitatu mu mukino umwe.

Nubwo Stade yari yuzuye, benshi mubari muri Stade binjiriye Ubuntu

Nubwo ntawavuga ko APR FC yari yakiriye umukino yahombye, ariko ntanuwabura kuvuga ko imyinjirize y’akagali yatumye menshi mu mafranga APR FC yagombaga kubona yayahombye, kuko benshi mu bari muri Stade binjiriye mu muvundo abandi bagataha kubera kubura amatike kandi agihari.

kwinjira

Ku miryango twagezeho ari ureba ku ruhande rwo mu Migina, ari kuri Controle technique benshi wasanga babuze uko binjira mu gihe umukino waburaga iminota itagera kuri itanu ngo utangira, imiryango ifunze, abandi barwanira kugura amatike dore ko bavugaga ko yatangiye gucuruzwa bitinze. Byageze aho abafana basunika inzugi ku ngufu bakinjira, ahandi biba ngombwa ko abasirikare ba Military Police binjiza batitaye kufite itike cyangwa atayifite, ari nabyo byatumye impande za stade nka VIP zuzura, abantu bakamanurwa hasi mu kibuga.

Kasirye yatsinze Hat trick ntiyahabwa umupira

Bimenyerewe kandi bizwi ko mu gihe umukinnyi utsinze ibitego 3 mu mukino ahabwa umupira (ballon) akayitahana, ariko si ko byagenze kuri Devis Kasirye watsinze igitego cya mbere icya kabiri n’icya kane, kuko atigeze ahabwa umupira wari wakinywe.

Umutoza Emmanuel Rubona ntiyigeze ahaguruka iminota 90

Umutoza Rubona Emmanuel wungirije mu ikipe y’APR FC umenyerewe mu gutanga amabwiriza ku bakinnyi bari mu kibuga byaba na ngombwa akanyuzamo agahangana na bagenzi be mu kibuga hasi, kuri uyu mukino ntiyigeze ahaguruka n’umunota n’umwe mu gihe umutoza mukuru atigeze yicara.

DSC_0240

Ubwabyo si ikibazo, ariko byibajijweho niba byaba ari ukubera gutsindwa hakiri kare cyangwa se ari ubushyamirane aherutse kugirana n’umutoza wa Police Casa Mbungu, akaba yarihanijwe n’abamukuriye byatumye acisha macye akicara iminota 90 dore ko ari we wumvwa n’abakinnyi mu rurimi ugereranyije na mugenzi we w’umunyatuniziya.

Masudi akoreye amateka ku makipe yombi afitemo ibigwi

Uretse kuba umutoza wa Rayon Sports Masudi Djouma ataratsindwa umukino n’umwe muri irindwi kuva yafata iyi kipe nk’umutoza mukuru, uyu mutoza yanakinnye muri aya makipe yombi aho yayagizemo ibigwi byiza ikipe imwe kuri imwe.

massudidier
Masudi wari kapitene wa Rayon Sports na Bizimana Didier wari uwa APR FC

Ubwo Masudi Djouma yakinaga muri APR FC kuva muri 1996 kugeza 2001, Masudi ni we washoboye gutsinda ibitego byinshi ikipe ya Rayon Sports, aho yayitsinze ibitego 6 mu bihe bitandukanye ari muri APR FC.

Ikindi ni uko uretse igikombe Rayon Sports yahawe na Didier Gomez, igikombe yaherukaga muri 2004 Masudi Djouma icyo gihe ni we wari kapiteni wa Rayon Sports, ubwo ikipe ya Rayon Sports nabwo yanyagiraga APR FC ibitego 4-1.

Benshi mu bafana ba APR FC barebye umupira iminota 46 gusa muri 90

Ibitego bya Kasirye ku munota wa 8 n’uwa 32 ntibyaciye intege cyane abafana ba APR FC kuko bumvaga ko uko Rayon Sports yabibonye mu minota 45 ari ko nabo bashobora kubibona mu yindi ndetse bakenzaho.

Abafana ba APR FC basohokaga gahoro gahoro umukino utararangira.
Abafana ba APR FC basohokaga gahoro gahoro umukino utararangira.

Ibintu byaje kuba bibi ku isegonda rya 40 ry’igice cya kabiri, ubwo Ismael Diarra yatsindiraga Rayon Sports igitego cya 3 cy’umutwe byatumye muri tiribune y’icyubahiro n’impande zayo ahari benshi mu bafana b’APR FC bahitamo kwitahira ako kanya batarangije umupira.

Ubushyamirane bw’abafana bwongeye kwigaragaza

Nyuma y’umukino abafana b’impande zombi bongeye gushyamirana mu bice byo muri 10 na 11, nyuma y’uko abareyo bashwazaga bakeba babo abandi nabo ntibabihanganire nubwo Polisi yahagobotse

Umukino warangiye abafana bamwe barataha abandi basigara baterana amavupa y’amazi n’ibikoresha bafanisha.
Umukino warangiye abafana bamwe barataha abandi basigara baterana amavupa y’amazi n’ibikoresha bafanisha.

Uyu ni umwe mu mukino ikomeye iba yitezwe na benshi, aho byagaragajwe n’ubwitabire budasanzwe kandi ari umukino wabaye mu mibyizi. Ikindi ni ubwa kabiri mu myaka itanu Rayon Spors inyagira mukeba wayo ibitego bine, mu gihe APR FC nayo yigeze kwigiza nkana kuri Rayon Sports tariki ya 22 Gashyantare 2015 iyitsinda nayo 4-0.

Tanga igitekerezo na Facebook

One thought on “Bimwe mu byaranze umukino Rayon Sports yatsinzemo APR ibitego bine ku busa

  • 04/05/2016 at 08:23
    Permalink

    ubu aba APR baraje bateze imyiryane muri rayon kugira isenyuke MANA ya rubanda rugufi udufatire rayon ikomeze kuriya uteshagaciro politic mbi ya apr yo kumva k yarya yonyine

    Reply

Tanga igitekerezo