Bidaciye kabiri, ikipe yasinyishije Muhire Kevin yamutije mu yindi kipe yo mu Misiri

Yanditswe na Rwanda Football ku wa 03.02.2019 saa 11:44

Ikipe ya Misr Lel-Makkasa SC uguze Muhire Kevin  mu minsi ishize, yahise imutiza  muri El Dakhleya Sporting Club nayo yo mu cyiciro cya mbere mu Misiri kubera ikibazo cy’umubare w’abanyamahanga 

Ikipe ya Misr Lel-Makkasa SC yasinyishije Muhire Kevin tariki 21 Mutarama 2019 imukuye muri Rayon Sports, imutangariza rimwe n’abandi bakinnyi batandatu barimo Khalid El-Sheikh, Hossam Abdelwahed, Ahmed Gamal, Omar El-Wahsh na Mido Gaber b’abanya-Misiri na Shimelis Bekele ukomoka muri Ethiopia.

Muhire Kevin

Bekele na Muhire Kevin bujuje umubare w’abanyamahanga bane muri iyi kipe kandi yemerewe gukoresha mu mikino abanyamahanga babiri gusa. Kuba Muhire Kevin atari afite amahirwe menshi yo kubona umwanya wo gukina byatumye asaba gutizwa bahita babimwemerera.

Misr Lel-Makkasa SC iri ku mwanya wa kane muri shampiyona ya Misiri yamutije muri El Dakhleya Sporting Club iri ku mwanya wa 15 muri shampiyona igizwe n’amakipe 18.

Muhire yagize ati “Ikipe yantije nyuma y’ibiganiro nagiranye n’abayobozi n’umutoza. Nasabye ko bantinza kuko twari abanyamahanga bane kandi mbona ko bizagorana ko mbona umwanya wo gukina. Abahari bose bamenyereye iyi shampiyona, niyo mpamvu nasabye ko natizwa aho nabona umwanya wo gukina. Ikipe nagiyemo nayo si mbi ntekereza ko amezi atandatu nzayimaramo azamfasha kumenyera.”

El Dakhleya Sporting Club yatijwe Muhire Kevin yashinzwe mu 2005. Yakirira imikino yayo kuri El Sekka El Hadid Stadium yakira abafana ibihumbi 25. Itozwa na Alaa Abdelaal wakiniye ikipe y’igihugu ya Misiri hagati ya 1998 na 2004.

El Sekka El Hadid Stadium niho ikipe nshya ya Muhire Kevin yakirira imikino

Muhire bita Rooney azatangira gukinira El Dakhleya SC kuri uyu wa Mbere tariki 4 Gashyantare 2019 ubwo iyi kipe izaba yakira Pyramids FC mu mukino w’umunsi wa 21 wa shampiyona ya Misiri.

Tanga igitekerezo