Bayisenge Emery agiye gukora igeragezwa muri Autriche

Yanditswe na Admin ku wa 13.07.2015 saa 15:23 | Yasuwe : 1,312

Myugariro Bayisenge Emery ukinira APR FC n’ikipe y’igihugu Amavubi  arimo gushaka uruhushya “Visa” rumwemerera kwinjira mu gihugu cya Autriche  ,  aho  agomba kujya gukora  isuzumwa ry’ubuzima  mu ikipe yo mu cyiciro cya kabiri Lask Linz FC.

Umunyamabanga mukuru wa APR FC, Kalisa Adolphe « Camarade »  avuga ko Bayisenge arimo gufashwa  n’ubuyobozi bwa APR FC kugira ngo abone iyi Visa nk’umukinnyi wababereye intangarugero mu myaka ibiri  bari bamaranye. Ngo ibi ni nyuma yaho Lask Linz FC  ibandikiye, ibasaba uyu musore.

Camarade yagize ati ” Dufite  umukinnyi umwe wasabwe n’ikipe yo hanze  muri Autriche, natwe turimo turamufasha mu bisabwa ngo agende,  ndatekereza ko ibijyanye na Visa  ye biri muri Ambasade. Igisigaye ni Visa n’aho ibindi byangombwa  bisabwa n’ikipe imushaka byaratunganye. Mwumve ko agiye gukora igeragezwa ry’ubuzima, atari bya bindi by’igeragezwa wumva ngo ejo yagarutse,  kuko Bayisenge babanje kumwitegereza azagenda asinya”.

Mu gihe yarimo asoza amasezerano ye muri APR FC , Bayisenge azagenda nk’umukinnyi wigurisha. Kuri Camarade nta gihombo kirimo, kandi batewe ishema no  kurekura umwana wabafashije kugira ngo ajye gukomeza gukina nk’uwabigize umwuga.

Aha Camarade yongeye gushimangira ko nta mukinnyi APR FC ijya yanga kurekura mu gihe binyuze mu nzira zemewe n’amategeko agira. Ati ” Ntabwo duhombye pe! Uriya mwana yadukiniye neza. Niba agiye kuba uwabigize umwuga,  izo ni inyungu kuri twe  no ku gihugu, iyo mwabanye neza, umukinnyi turamureka akagenda  kuko aba agiye gushakishiriza ahandi. Twanabibwiye abakinnyi uzajya azana ubusabe bw’ikipe yo hanze, tuzajya tumureka agende”.

bayisenge1

Iyi kipe Bayisenge agomba kwerekezamo ya LASK Linz yasoje shampiyona y’icyiciro cya kabiri  iri ku mwanya wa gatatu. Iyi kipe yashinzwe mu 1908, inatwara ibikombe byinshi byo muri iki gihugu. Yambara  umukara n’umweru nka APR FC.

Si ubwa mbere bivuzwe ko Bayisenge agiye kwerekeza ku mugabane w’u Burayi kuko no muri 2013 yagombaga kujya muri Zulte Walgem yo mu Bubiligi ariko ntibyamuhira. Ahandi ni muri 2012, aho yagiye muri Toulouse  mu Bufaransa nabwo ntibyakunda.

Uretse Lask Linz FC , Bayisenge ngo afite n’ubutumire bw’ikipe ya  AS Nancy-Lorraine mu Bufaransa  hamwe n’umukinnyi wahoze akinira Rayon Sports Ndatimana Robert.

Abajijwe niba kujya muri Autriche,  yumva ari ahantu hazamufasha kumenyekana ku buryo twamubona arambagizwa n’amakipe akomeye nka Real Madrid, Barcelona, ManchesterUnited  n’andi,  cyane ko  yari yifujwe n’ikipe yo mu Bufaransa ya Nancy iri hafi kuzamuka mu cyiciro cya mbere, Bayisenge yasubije ko nabifashwamo n’Imana bizakunda.

Yagize ati “Autriche ifite shampiyona nziza, ndakeka nta shampiyona bingana hano muri Afurika y’u Burasirazuba, hari iyo uzi se? Kereka niba mwarashakaga ko njya muri Yanga cyangwa Simba zo muri Tanzaniya.Ku byo mu Bufaransa, nawe uri umuntu mukuru ntabwo umuntu yakubwira ngo ngwino utangire akazi, undi akubwire ngo ngwino nkugerageze kandi ari ahantu hanganya urwego ngo ujye aho bakugerageza.Ku giti cyanjye ntabwo kujya muri Autriche nahisemo nabi”.

Nk’uko abisobanura, kuri ubu ategereje  kubona  uruhushya rumwemerera kwinjira mu gihugu cya Autriche “Visa” mu minsi ya vuba akabona kwerekeza muri Lask Linz yasoje ku mwanya wa gatatu muri shampiyona y’icyiciro cya kabiri.

Inshamake y’ubuzima bwa Bayisenge Emery

Bayisenge Emery wabonye izuba ku ya 02 Ugushyingo 1994 i Huye,  ni  mwene Rwinyaguza Emmanuel na Bakunzi Marceline. Akomoka mu muryango w’abana 5 w’abahungu bane n’umukobwa umwe.

Yize amashuri abanza ku ishuri ry’abadiventiste ry’i Ngoma kugeza mu 2006, akomereza ku ishuri ryisumbuye rya Gisenyi riri i Rubavu  mu myaka ibiri ya mbere,  ageze muwa tatu yerekeza muri muri APE Rugunga ari naho yaboneye impamyabumenyi mu Ishami ry’amateka ubumenyi bw’isi n’ubukungu (HEG) muri 2013.

Yatangiriye umupira i Huye ku mutoza w’abana witwa Katibito, aho yavuye ubwo  mu muryango we bari bagiye i Rubavu, agakomereza mu ikipe y’abana yo ku mutoza Gitiada Mungo « Vigoureux ». Muri 2008, yinjiye mu ishuri ry’umupira w’amaguru rya FERWAFA nyuma yo gutoranywa mu bana bagaragazaga ko bafite impano zo gukina. Umwaka wakurikiyeho, yahamagawe mu Mavubi y’abatarengeje imyaka 17 yakinye CECAFA U-20 yabereye muri Eritrea. Muri 2011 yayoboye bagenzi be, banagera ku mukino wa nyuma mu gikombe cy’Afurika CAN-U17 i Kigali, batsindirwa ku mukino wa nyuma na Burkina Faso, banitabira igikombe cy’isi cyo muri Mexique. Mu makipe, yatangiriye mu Isonga FC yashinzwe  nyuma y’igikombe cy’isi cyo muri Mexique avamo muri 2012 yerekeza muri APR FC yarimo kugeza uyu mwaka. Yatangiye guhamagarwa mu Mavubi kuva muri Kanama 2011.

Mu byo yagezeho harimo gutwara ibikombe bine by’amakipe y’ibigo byisumbuye (Interscolaire) muri APE Rugunga, yegukana ibikombe 2 bya shampiyona muri APR FC (2014 na 2015) n’igikombe kimwe cy’Amahoro (2014). Yageze ku mukino wa nyuma wa CECAFA inshuro ebyiri (2014 na 2015)

Mu kiganiro yagiranye n’ Imvaho Nshya(IN) ducyesha iyi nkuru , Bayisenge Emery yavuze ku rugendo rwe mu mupira w’amaguru.

IN:Tuguhaye ikaze

Bayisenge: Murakoze.

IN: Mu minsi mike urava muri APR FC ujye i Burayi. Uvuye muri APR FC, wari umukinnyi  ngenderwaho wabikeshaga  iki?

Bayisenge: Nari umukinnyi usanzwe nk’abandi. Muri APR nageragezaga gukunda akazi kanjye no  kubishyira ku mutima, nkarangwa n’ ikinyabupfura, ibi byiyongeraho gukunda Imana nayo ikagufasha.

IN: Ugiye gukina nk’uwabigize umwuga mu Burayi, ni ikihe cyerekezo ujyanye hanze ?

Bayisenge: Mu buzima, umuntu ahora yifuza kugera kure cyane, iriya ni intangiro nziza, icyo nifuza ni uko Imana ibimfashijemo nazibona umunsi umwe mu Bwongereza.

IN: Mu 2011 wari mu Mavubi yagiye muri Mexique,  abo mwakinanye ni ba Raheem Sterling, amakipe menshi yifuza, mwebwe ntawarenze i Kigali habuze iki?

Bayisenge: Tubanze turebe ubushobozi bw’ibihugu, nk’uwo Sterling uvuze  akina mu Bwongereza igihugu gifite amafaranga, natwe ku bushobozi bw’igihugu cyacu n’umupira wacu hari urwego twagezeho. Natwe ntibiraragira, buri kintu kigira igihe cyacyo, iyo ukoze cyane ukihangana ibintu birakunda, ntituracika intege .

IN: Mu myaka umaze mu mupira wavuga ko ari iki wakugezejejeho?

Bayisenge: Ntabwo ndamara igihe kinini mu mupira ni nk’imyaka 3, icyo nshaka ndakibona, mfite aho ntaha mbayeho neza, nta kibazo. Iyo nshaka kugenda mbona icyintwara(itike).

IN: Dukorere  ikipe y’abakinnyi 11 beza wabonye beza bo muri shampiyona y’u Rwanda

Bayisenge: Ko bigoye ra !!!, mu izamu  ni Ndoli Jean Claude, ba myugariro ni Mbuyu Twite,Nanjye sinisiga, Mwemere Ngirinshuti na Rusheshangonga Michel. Abandi ni Papy Faty, Migi, Haruna, imbere ni Karekezi Olivier, Iranzi Jean Claude na Bokota  Labama.

IN: Ninde mukinnyi w’ikitegererezo kuri wowe?

Bayisenge: Ni babiri, nakuze nkunda imikinire ya Mbuyu Twite. Ibyo nize byinshi nabyigiye kuri myugariro dukinana Nshutinamagara Ismael Kodo, navuga ko namukuriye iruhande. Hanze ni Laurent Konscienly wa Arsenal

IN:Ni izihe nama uha abana bifuza kuzaba nkawe?

Bayisenge: Bifuze kurenga ibyo nagezeho, ni ikinyabufura nta kindi. Niba uvuze ngo ugiye gukina umupira, wukunde ushyiremo imbaraga, wihanganire ibibamo byose, kuko utihangana ntiwabishobora. Ikindi bumvire abatoza, icya nyuma ni ugukora imyitozo yihariye ku giti cyawe ari nako wemera gukosorwa n’ukurusha.

IN:Turagushimiye

Bayisenge:Namwe murakoze.

Tanga igitekerezo na Facebook

Tanga igitekerezo