Bamwe mu bakinnyi bakomeye baciye muri Mukura VS

Yanditswe na Admin ku wa 09.08.2015 saa 00:14 | Yasuwe : 2,816

Ikipe ya Mukura VS ni imwe mu makipe makuru yubashywe kandi afite amateka muri iki gihugu. Nubwo bwose itaratwara igikombe cya shampiyona kuva yabaho, ntibayibujije kuba ikipe ikomeye kandi yagize akainnyi b’ibitangaza ( Kanda hano usome amateka yayo  ).

Bamwe mu bakinnyi bakomeye mu Rwanda no ku rwego mpuzamahanga banyuze muri Mukura Victory Sports ikababera inzira igana ku kuba icyo bari cyo ubu ni nka Gasana Mémé Tchité, Gatete Jimmy, Nshimiyimana Canisius, Kagere Meddie .

Aba bose bageze muri Mukura mu myaka itandukanye baturuka ahantu hatandukanye ariko bose ntawari uzwi ku rwego rw’igihugu ariko mu myaka mike bamaze muri Mukura, amakipe yatangiye kubarambagiza ndetse bamwe bibahesha amahirwe yo guhamagarwa mu ikipe y’igihugu y’u Rwanda.

Mémé Tchité yageze muri Mukura ahagana mu mwaka wa 2000 avuye mu gihugu cy’u Burundi muri Prince Louis. Muri Mukura aho yakinaga nka rutahizamu yagaragaje impano idasanzwe bituma agurwa na Standard de Liège yo mu Bubiligi ndetse n’ikipe y’igihugu y’u Bubiligi itangira kumusaba ko yayikinira.

Umwe mu bakinnyi bafatwa nk’icyitekererezo hano mu gihugu rutahizamu Gatete Jimmy nawe yahereye muri Mukura muri za 1998 icyo gihe nta muntu wari umuzi ariko ibyo yakoze ntawakwirirwa abigarukaho hano. Ubu yaretse gukina yibera muri Leta zunze ubumwe z’Amerika.

gatkagmeme

Undi rutahizamu ukomeye mu karere wakiniye Mukura ni Kagere Meddie ukomoka muri Uganda yaje i Huye avuye muri Kiyovu. Muri Mukura ni bwo amakipe akomeye yamushatse aza kwerekeza muri Police aho yabaye umwe muri ba rutahizamu bakomeye bayo bikanatuma agurwa na FC Zarzis yo muri Tuniziya. Kagere Medie ubu ni rutahizamu ukomeye mw’ikipe ya Gor Mahia muri Kenyaakaba anaherutse kwigaragaza muri Cecafa Kagame cup yabereye  muri Tanzaniya uno mwaka.

Kagere ni umwe muri ba rutahizamu bafashije ikipe y’igihugu Amavubi mu myaka ine iherukakuko amaze kuyitsindira ibitego icyenda mu mikino 26 yayikiniye.

Nshimiyimana Canisius wavukiye mu karere ka Huye nta yindi kipe yigeze akinira mu mateka ye uretse Mukura. Uyu mugabo wafashije u Rwanda gukina igikombe cya Afurika cy’ibihugu muri 2004 ubu ni umutoza wungirije wa Mukura akaba anashinzwe abana bato b’iyi kipe.

Uretse aba, Mukura yakunze gufasha abakinnyi kumenyekana mu Rwanda no mu karere harimo n’abakomoka mu karere ka Huye cyangwa mu cyahoze ari intara ya Butare.

Ibi kandi byatumaga Mukura ikomeza gukundwa n’abanyarwanda b’ingeri zose kuko yitwaraga neza igahora mu makipe ya mbere kandi igakina umukino ushimisha abafana.

Umunyamabanga mukuru wa Mukura, Emmanuel Ntakirutimana avuga ko umwaka ushize wa Shampiyona abatoza ba Mukura bahaye amahirwe abasore bakiri bato b’i Huye kandi iyo ntego ubuyobozi bukaba buyikomeyeho. Emmanuel akomeza avuga ko umwaka utaha wa Shampiyona Mukura izongera guha amahirwe abana bakina mu ngimbi za Mukura bamwe muri bo bagakorana imyitozo n’ikipe nkuru abashoboye bagahabwa n’umwanya wo gukina.

Agira ati “Tuzakomza guteza imbere abana bafite impano y’umupira w’amaguru baturuka mu karere ka Huye no mu majyepfo. Bizatuma n’abafana bishimira kuza gushyigikira Mukura kuko bazaba baza kureba abana babo.”

Umunyamabanga Mukuru avuga ko mu gihe gito Stade Huye izaba yuzuye maze abanye Huye no mu nkengero zaho bakongera kubona ikipe yabo ikinira ku kibuga bahoze bita “IMBEHE ya Mukura”. Bikazafasha gutoza abana benshi bakiri bato ari nako bigishwa indagaciro za Mukura.

Bamwe mu basore bo mu karere ka Huye binjijwe mu ikipe ya mbere ya Mukura ni Gasongo Jean Pierre ukina nka rutahizamu. Uyu mwishywa wa Mulonda Jean Pierre wigeze gukinira Mukura ntiyahiriwe cyane na Shampiyona ariko umutoza Okoko Godefroid avuga ko amufitiye icyizere kandi akabona ko azavamo rutahizamu ukomeye nakomeza kumvira abatoza no gukora cyane.

Undi ni Ntakirutimana Valens wigeze gukina mu ngimbi za Mukura, nyuma akajya gukinira AS Muhanga kubera amasomo. Uyu nawe ni umusore umutoza afitiye icyizere kubera imyitwarire myiza n’ishyaka agaragaza mu kibuga.

Tanga igitekerezo na Facebook

Tanga igitekerezo