Bamwe mu bakinnyi ba Rayon Sports bashobora gutizwa no kwirukanwa

Yanditswe na Rwanda Football ku wa 21.08.2017 saa 10:29 | Yasuwe : 162

Ku mugoroba wo kuri uyu wa mbere tariki ya 21 Kanama 2017 nibwo biteganyijwe ko komite y’ikipe ya Rayon Sports ahanini igizwe n’abatoza bari bukore inama bagahitamo abakinnyi 25 muri 37 bari gukorera imyitozo muri iyi kipe bagomba kwifashisha muri uyu mwaka w’imikino wa 2017/2018.

Bamwe mu bakinnyi rero umutima ukaba utari mu gitereko kuko bashobora kwisanga barekuwe n’umutoza Karekezi Olivier.Iyi kipe yatangiye imyitozo tariki ya 25 Nyakanga 2017, yarimo abakinnyi benshi bakoreraramo imyitozo ku buryo uretse abo ubuyobozi bwatangaje ko bwamaze kubasinyisha no kongerera amasezerano byakugora kuba hari undi wakwemeza ko ari umukinnyi w’iyi kipe.

Abenshi muri aba bakinnyi bakaba bakoreragamo imyitozo mu rwego rwo gukora igeragezwa kugira ngo umutoza aramutse agize abo yashimye abe yabagumana bamufashe muri uyu mwaka w’imikino wa 2017/2018.

Kuri ubu bamwe mu bakinnyi bashya ndetse n’abasanzwe mu ikipe ya Rayon Sports igitima kiradiha bibaza niba bari mu bakinnyi umutoza Olivier Karekezi agomba kugumana mu ikipe dore ko uyu munsi kuwa mbere ari bwo imiryango yafunzwe ku bakinnyi bagombaga kwiyereka uyu mutoza, bityo ko ku munsi w’ejo kuwa kabiri azakorana imyitozo n’abakinnyi bagera kuri 25 bintoranywa muri aba bakinnyi bagera kuri 37 bari bamaze iminsi bakorera imyitozo muri Rayon Sports nk’uko yabitangaje.

Imyitozo yayobowe na Olivier Karekezi na Katauti Hamad Ndikumana umwungirije yitabiriwe n’abakinnyi 37 barimo abafite amasezerano n’abari mu igeragezwa.Uyu mutoza yabwiye abanyamakuru ko yishimiye uko abakinnyi be bari kwitwara. Yagize ati : “Ibintu biragenda neza. Nishimiye ko abakinnyi banjye bari mu ikipe y’igihugu nabo bahageze. Yari imyitozo ya nyuma ku bari mu igeragezwa kuko uyu munsi nyuma ya saa sita mfite inama n’ubuyobozi niho turi bwemereze abakinnyi batizwa, abo turekura bagashaka amahirwe ahandi, n’abo tugumana tukazabakoresha uyu mwaka.”

Alassane Tamboura (ibumoso) ntabwo aremeza abatoza ba Rayon Sports

Karekezi abajijwe kuri rutahizamu Alassane Tamboura bivugwa ko atishimiye urwego rwe yasubije ati: “We azakomeza gukora. Azakina imikino itatu ya gicuti dufite kuva ubu kugera tariki 2 (na AS Muhanga, Amagaju FC na SC Villa). Uko azitwara muri iyi mikino niko tuzamenya niba tumugumana cyangwa niba tuzamureka akigendera. Amakuru y’undi rutahizamu ushobora kuza ntacyo nyavugaho kuko njye mvuga ku bakinnyi mfite.”

Urutonde rw’abakinnyi 25 ba Rayon Sports bashobora tubona kugumana n’iyi kipe :

Ndayishimiye Eric Bakame, Mutuyimana Evariste, Manzi Thierry, Usengimana Faustin(washimwe n’umutoza Karekezi ndetse ashobora no gusinya vuba cyane), Rwatubyaye Abdoul, Mutsinzi Ange, Mugabo Gabriel, Irambona Eric, Nzayisenga Jean d’Amour (Mayor), Mugisha François, Rutanga Eric, Nyandwi Sadam, Kwizera Pierrot, Niyonzima Olivier Sefu, Niyonzima Ally, Muhire Kevin, Nova Bayama, Manishimwe Djabel, Habimana Yussuf, Tediane Kone, Bimenyimana Caleb Bonfils, Nahimana Shassir, Arasane Tamboura(Karekezi yavuze ko ataramweza ariko akaba yamuhaye kugeza ku itariki 2 Nzeri 2017, naba ataramwemeza nawe azirukanwa) na Mugisha Gilbert.Kuri aba bakinnyi uko ari 24 bashobora kwiyongeraho umuzamu ngo bitaganyijwe ko uzaturuka mu gihugu cya Kenya bakuzura 25.

Rwigema Yves ashobora kwisanga muri Mukura VS

Uretse aba bakinnyi hari n’abandi bakinnyi bari basazwe muri iyi kipe bashobora kwisanga batijwe mu ikipe ya Mukura Victory Sports. Biravugwa ko umuzamu wa gatatu w’iyi kipe Bashunga Abouba, ukongeraho abandi bakinnyi nka; Senyange Yvan, Frank Romami, Yves Rwigema na Niyigena Moise bashobora kwisanga batijwe mu ikipe ya Mukura wongereyeho abakinnyi bazamuye mu irerero ryabo ry’I Nyanza.Abandi bakinnyi bose batibonye muri ibi byiciro bazahita berekwa umuryango bajye gushakiriza ahandi.

Mwiseneza Djamal warukuwe na APR FC akaza gukora igeragezwa ari mu bakinnyi bashobora kwerekwa umuryango

Abakinnyi bazaba batoranyijwe n’umutoza Karekezi Olivier biteganyijwe ko mu rwego rwo kwishimira igikombe cya shampiyona batwaye umwaka w’imikino wa 2016/2017 bazakina umukino wa gishuti n’ikipe ya AS Muhanga kuwa gatanu tariki tariki ya 25 Kanama i Muhanga aho bazahita bakomeza bakarara i Nyanza maze kuwa gatandatu bagakora umuganda rusange n’abaturage b’i Nyanza, nyuma yawo hakaba umutambagiro uzava I Nyanza werekeza I Huye ahazabera umukino wa gishuti n’ikipe y’Amagaju FC.

Tariki ya 02 Nzeri iyi kipe ifite umukino wa gishuti na Villa yo muri Uganda mu rwego rwo kwerekana abakinnyi iyi kipe izakoresha mu mwaka w’imikino wa 2017/2018, ni umukino uzabera kuri Stade ya Kigali I Nyamirambo.

Romami Frank ashobora gutizwa muri Mukura VS

Tanga igitekerezo na Facebook

Tanga igitekerezo