Bakame yongereye amasezerano muri Rayon Sports

Yanditswe na Admin ku wa 14.07.2015 saa 09:50 | Yasuwe : 2,360

Ku mugoroba wo kuri uyu wa mbere nibwo  umunyezamu w’ikipe ya Rayon Sports Ndayishimiye Eric  bita Bakame  yongereye amasezerano y’imyaka ibiri muri iyi kipe nk’uko byemezwa n’ubuyobozi bwa Rayon.

Uyu mukinnyi yifuzwaga na APR FC ariko akaba atifuje gusubira muri iyi kipe yahozemo yihitiramo gukomeza n’ikipe y’i Nyanza .

Tariki 13 Nyakanga 2013 nibwo Bakame yari yasinye amasezerano y’imyaka itatu avuye mu ikipe ya APR FC, ikipe yari abayemo kuva muri 2009.

Bakame w’imyaka 27 yibukwa cyane muri uyu mwaka wa 2009 ubwo yafashaga cyane ikipe ya ATRACO (itakibaho) kuvana igikombe cya CECAFA y’amakipe i Khartoum muri Sudan.

bakame1

Ikipe ya APR FC umunyezamu wayo Olivier Kwizera mu minsi micye arerekeza muri Africa y’Epfo aho ajya mu igeragezwa mu ikipe za Bidvest University na Super Sports zimushaka. Ibi nibyo byatumye ikipe ya APR FC igerageza kugarura uwari umuzamu wabo Bakame.

Aime Niyomusabye umuvugizi wa Rayon Sports yatangaje ko bishimiye kuba uyu muzamu agiye kugumana nabo indi myaka ibiri kuko ari umukinnyi mwiza.

Jean Luc Ndayishimiye ni umunyezamu wigaragaje cyane mu gihe cye we na mugenzi we Ndoli Jean Pierre basimburanye igihe kinini mu ikipe y’igihugu Amavubi.

Nyuma yo gutwarwa Djihad Bizimana na myugariro Faustin Usengimana wasinye imyaka ibiri muri APR FC kuri uyu wa mbere, Rayon Sports ubu ngo yaba nayo iri gushakisha undi rutahizamu ukomeye izavana mu mahanga.

Tanga igitekerezo na Facebook

Tanga igitekerezo